Müstəqillik
illərinin uğurları
İllər sürətlə bir-birini
əvəzləyir. Lakin bu
illər boş-boşuna ötüb
keçmir, əməllərlə, nailiyyətlərlə
xatirələrdə qalır. Bu il Azərbaycanımızın müstəqilliyinin
20 ili tamam olur. Bu möhtəşəm
yubiley respublikamızın ictimai-siyasi
və mədəni həyatında böyük
əks-səda doğurmuşdur. Azərbaycanda
iqtisadiyyatın inkişaf dinamikası,
investisiyaların həcmi, əhalinin sosial
rifahı xeyli artmışdır.
Müstəqilliyimizin
ilk illərində istər iqtisadiyyatda, istərsə də mədəni
həyatda ciddi böhranlar hiss olunurdu. Hər hansı bir
stabillikdən söhbət gedə bilməzdi.
Yoxsullaşmış insanlar Vətəndən qırağa
üz tuturdular, Azərbaycan faktik olaraq parçalanmanın, vətəndaş
müharibəsinin bir addımlığında idi.
Ümummilli lider Heydər Əliyevin xalqın təkidiylə
ikinci dəfə hakimiyyətə dönüşü Azərbaycanda
uğurlu inkişafın təməlini qoydu. Tezliklə
ölkəimizdə stabillik, əmin-amanlıq əldə
olundu, insanların həyat səviyyəsini və məişət
şəraitini yaxşılaşdırmaq üçün
real zəmin yaradıldı. Ötən əsrin ən
böyük iqtisadi layihələrindən olan “Əsrin
kontraktı” bağlandı. Təməli ulu öndər tərəfindən
qoyulmuş düzgün, inamlı dövlət quruculuğu bu
gün onun işinin layiqli davamçısı, möhtərəm
Prezidentimiz cənab İlham Əliyev tərəfindən daha
da inkişaf etdirilir. Azərbaycanın iqtisadi və mədəni
yüksəlişi artıq beynəlxalq aləmə
yaxşı məlumdur. Bu, dövlət strategiyamızın,
siyasətimizin düzgün prioritetlərə əsaslanmasından,
onların ciddi, düşünülmüş olmasından irəli
gəlir.
Müstəqilliyimizin 20 ili təhsil
sahəsində də yaddaqalan hadisələrlə zəngindir.
Təsadüfi deyildir ki, dövlətimiz müdafiə xərclərindən
sonra məhz təhsil sahəsinə geniş maliyyə vəsaiti
ayırır. Respublikamızda bir çox məktəblər
təmir edilmiş, çoxlu sayda təhsil ocaqları tikilib
istifadəyə verilmiş, müasir avadanlıqlarla,
kompüterlərlə təhciz olunmuşdur. Əlbəttə,
bu sahədə xüsusilə Heydər Əliyev Fondunun xidmətləri
böyükdür. İstər mədəni həyatımızda,
istərsə də təhsil sahəsində qazanılan
uğurlarımızda bu fondun və onun Prezidenti, YUNESKO və
İSESKO-nun xoşməramlı səfiri, millət vəkili
Mehriban xanım Əliyevanın böyük əməyi
özünü aydın büruzə verir. Azərbaycan
Dövlət Mədəniyyət və İncəsənət
Universiteti də (ADMİU) müstəqilliyimizin 20-ci ilinə
təhsil və yaradıcılıq nailiyyətləri ilə
qədəm qoymuşdur. Universitetimiz unikal xüsusiyyətləri
ilə diqqəti cəlb edir. Bu yaxınlarda 90 illiyini qeyd edəcək
universitet yarandığı ilk dövrlərdən etibarən
Azərbaycanda mədəniyyət və incəsənət
üzrə mütəxəssis hazırlayan yeganə ali məktəb
olmuşdur. Universitet öz başlanğıcını
1923-cü ildə yaradılmış Teatr məktəbindən
götürür. O zaman istedadlı sənətkarımız,
xalq artisti Şövkət Məmmədovanın təklifi və
təşəbbüsü ilə yaradılmış sənət
məktəbi böyük inkişaf yolu keçmişdir.
Universitetimiz bu gün respublikada yeganə təhsil
ocağıdır ki, mədəniyyət və incəsənətin
bütün əsas sahələrini tam əhatə edir, bu sahələr
üzrə mükəmməl kadr hazırlığı
aparır. Bu gün ADMİU təkcə Azərbaycan
üçün yox, bir sıra xarici ölkələr
üçün də müxtəlif ixtisaslar üzrə
mütəxəssis yetişdirir. Universitetin məzunları
dünyanın bir çox ölkəsində fəaliyyət
göstərir. Hələ 1991-ci ildə o zamankı Azərbaycan
Dövlət Mədəniyyət və İncəsənət
İnstitutu universitet statusu qazandı. Bu, respublikamızda ilk
analoji hadisə idi. Beləliklə, ADMİU o zaman Azərbaycanda
mövcud olan iki universitetdən (BDU ilə yanaşı) birinə
çevrildi. ADMİU-nun mədəniyyət sahələrini
kompleks şəkildə əhatə etməsi, çoxprofilli
ixtisas şəbəkəsinin yaradılması bu ali məktəbə
universitet statusunun verilməsi üçün hüquqi əsas
oldu. Onu da qeyd etmək istərdim ki, ötüb keçən
bu illər ərzində universitetimiz öz imkan və nailiyyətlərini
xeyli genişləndirmişdir. 20 il bundan öncə
kiçik binası, dörd fakültəsi olan, cəmi doqquz
ixtisasda kadr hazırlayan bu ali məktəb, indi böyük
binaya, geniş maddi-texniki bazaya, əhatəli ixtisas şəbəkəsinə
malik olan tədris müəssisəsi kimi tanınır. Bu
gün universitetimizdə 7 fakültə, 31 kafedra fəaliyyət
göstərir, 30-dan çox ixtisas üzrə kadr
hazırlığı aparılır. Mən yuxarıda
müstəqillik illərindəki nailiyyətlərimizi
sadalayanda universitetimizin əzəmətli binasının
adını təsadüfən çəkmədim. Xüsusi
qeyd etmək istəyirəm ki, Azərbaycan Dövlət Mədəniyyət
və İncəsənət Universitetinin indiki böyük
binası bizə xalqımızın ümummilli lideri Heydər
Əliyevin təşəbbüsü və
tapşırığı ilə verilmişdir. Universitetimizin
xarici əlaqələri ildən-ilə genişlənir ki, bu
da dövlət müstəqilliyimiz sayəsində
mümkün olmuşdur. Bu gün Azərbaycan Dövlət Mədəniyyət
və İncəsənət Universiteti dünyanın bir
çox ölkələrinin tanınmış ali məktəbləri
ilə yaradıcılıq əlaqələri saxlayır.
Universitetimiz Moskva Mədəniyyət və İncəsənət
Universiteti, Sankt-Peterburq Mədəniyyət və İncəsənət
Universiteti, Sankt-Peterburq Dövlət Teatr Sənəti
Akademiyası, Slovakiyanın Nitra Universiteti, Bolqarıstan Milli
Teatr və Kino Akademiyası, Bolqarıstan Milli Rəssamlıq
Akademiyası, Misir Ərəb Respublikasının Qahirə,
İsgəndəriyyə və Heluan Universitetləri,
İranın İncəsənət, Azadi İslam Universitetləri,
Gürcüstan Dövlət Teatr və Kino Universiteti və
başqaları ilə əməkdaşlıq haqqında
müqavilələr imzalamışdır. Qardaş Türkiyənin
tanınmış universitetləri ilə əlaqələrimiz
haqqında ayrıca söz açmağa dəyər.
Hazırda universitetimiz bu ölkənin bir çox universitetləri
ilə əməkdaşlıq müqavilələrinə
malikdir. Bunlardan İstanbul Beykent Universiteti, Memar Sinan Universiteti,
İsparta Süleyman Dəmirəl Universiteti, Ərciyəz
Universiteti, Sakarya Universiteti və başqa ali məktəbləri
göstərmək olar. Türkiyəli tələbələr
ADMİU-nun müxtəlif fakültələrində təhsil
alırlar. Universitetimizin 20 ildəki uğurlarından söz
açarkən ilk növbədə teatr təhsilini
xatırlamaq istərdim. Teatr təhsili bu ali məktəbin ən
qocaman tədris sahələrindəndir. Bugünkü Azərbaycan
Dövlət Mədəniyyət və İncəsənət
Universitetinin sələfi olan Bakı Teatr məktəbində
teatr təhsili tədrisin əsasını təşkil
edirdi. Vaxtilə universitetimiz Teatr İnstitutu da
adlandırılmışdır. Bu gün universitetimizin
ixtisas şəbəkəsi xeyli genişlənmişdir.
Bununla belə teatr təhsili, aktyorluq və rejissorluq təhsili
öz əvvəlki əhəmiyyətini qoruyub saxlayır.
Son dövrlərdə teatr təhsilində əhatəli
şaxələnmə baş vermiş, bu sahə ilə
bağlı olan ixtisaslar şəbəkəsi, yeni kafedralar
yaradılmışdır. Dram teatrı və kino, musiqili
teatr, estrada aktyoru ixtisasları teatr tədrisinin dərinləşməsindən,
onun, belə demək mümkünsə,
diferensiallaşmasından xəbər verir. Bu ixtisaslar
universitetimizin “Aktyor sənəti” fakültəsində qərarlaşmışdır.
Həmçinin bu illərdə respublikamızda ilk dəfə
olaraq ali təhsil səviyyəsində xoreoqrafiya sənəti,
aşıq sənəti ixtisasları
açılmışdır.
Teatr
təhsilinin keyfiyyətini yüksəltmək
üçün universitetimizə tanınmış sənət
xadimləri cəlb olunur. Hal-hazırda respublikanın xalq
artistləri – Cənnət Səlimova, Ağakişi
Kazımov, İlham Namiq Kamal, Bəsti Cəfərova, Firəngiz
Mütəllibova, Rafiq Əliyev və başqaları “Aktyor sənəti”
fakültəsində dərs deyirlər. Tələbə və
müəllimlərimiz müxtəlif ölkələrdən
yaradıcılıq dəvətləri alır, beynəlxalq
müsabiqələrdə iştirak edirlər. Bu ilin mart
ayında Tiflis şəhərində keçirilmiş Beynəlxalq
Tələbə Etüd festivalında tələbələrimiz
“Təmas” adlı kompozisiya nümayiş etdirmiş və
mükafat qazanmışlar. May ayında İstanbul
Kültür Universitetində keçirilən Beynəlxalq Tələbə
Tamaşaları Festivalından da tələbələrimiz
mükafatla qayıtmışdır. Belə misalların
sayını xeyli çoxaltmaq olar. Dövlətimizin mədəniyyət,
teatr sahəsinə göstərdiyi qayğı, bəzi
teatrlarımızın təmiri, onların texniki baxımdan
beynəlxalq standartlara cavab verməsi teatrlarımızın
yeni yüksəliş məhələsi keçirməsinə
şübhə yeri qoymur. Ötən il Bakıda
keçirilmiş Beynəlxalq Teatr festivalı bu sahədəki
irəliləyişlərimizi bir daha nümayiş etdirdi. Həm
də bütün dünya bunun şahidi oldu. Bu, dövlətimizin
mədəniyyət sahəsindəki siyasətinin məntiqi nəticəsi
kimi dəyərləndirilir. Əlbəttə, teatr təhsilinin
mühüm sahəsini rejissorluq təşkil edir. Müstəqillik
dövrü nailiyyətlərindən danışarkən
universitetdə “Rejissor sənəti” fakültəsinin fəaliyyətə
başlamasını xüsusi olaraq qeyd etməliyik. Bu gün
universitetimiz müxtəlif yönümlü rejissor
kadrları yetişdirir. Sənətdəki diferensiallaşma,
ixtisas peşəkarlığının dərinləşməsi
rejissura üçün də səciyyəvidir, həm də
mən deyərdim, daha artıq səciyyəvidir. Hazırda
universitetimiz dram, kino, televiziya, musiqili teatr, estrada, teatr
kollektivi, kütləvi tədbirlər və bayramlar rejissoru
kimi ixtisaslar üzrə mütəxəssis
hazırlığı aparır. Xatırladım ki, tədrisə
güclü peşəkarlar cəlb olunmuşlar. Fakültədə
xalq artistləri Azər Paşa Nemət, Eldar Quliyev, Oqtay
Mirqasım, Tofiq İsmayılov, Ramiz Əzizbəyli, həmçinin
əməkdar incəsənət xadimləri Bəhram Osmanov,
Yalçın Əfəndiyev, Tariyel Vəliyev, Amin Novruzov və
başqa sənətkarlar işləyir. Müstəqillik
dövründə nail olduğumuz əsas uğurların xeyli
qismi kino və televiziya təhsili ilə bağlıdır.
ADMİU-da kino ilə bağlı ixtisaslar üzrə (kino
rejissoru, kino operatoru, kino aktyoru, həmçinin kino və televiziya
rəssamı, kino tənqidçisi, kinoşünas, ssenarist
və s.) ciddi kadr hazırlığı prosesi gedir.
Xatırlatmaq yerinə düşərdi ki,
sadaladığım bu ixtisasların böyük əksəriyyəti
elə müstəqillik illərinin məhsuludur. Azərbaycanın
müstəqil ölkə olması, dünya birliyinə
çıxması milli kinomuzun və kino təhsilimizin də
inkişafına böyük təsir göstərmişdir.
Kino rejissoru ixtisası üzrə təhsil alan tələbələrimiz
bir çox sənətkarlıq uğurlarına imza
atmış, nüfuzlu beynəlxalq kino festivallarında
müxtəlif nominasiyalar üzrə mükafatlar
almışlar. Təkcə elə son illərdə tələbələrimiz
Beynəlxalq Berlin Kino Festivalında, “Kinotavr”da, Beynəlxalq Cənubi
Qafqaz “Yol ayrıcında” Kino Festivalında iştirak etmiş
və yüksək nəticələr göstərmişlər.
Bu il aprel ayında Almatıda keçirilən Beynəlxalq
“Bastau” festivalında universitetimizin iki təmsilçisi
iştirak etmiş və
mükafatlandırılmışdır. 20 illik
uğurlarımızdan danışarkən toxunulması vacib
olan başqa bir sahə rəssamlıqdır. Uzun illər boyu
respublikamızda rəssamlıq üzrə ali təhsil verən
yeganə müəssisə bizim universitet olmuşdur.
Universitetimizdə rəssamlıq təhsilinin yarım əsrlik
tarixi vardır. Vaxtilə burada Azərbaycanın böyük
sənətkarları – xalq rəssamları Tahir Salahov,
Mikayıl Abdullayev, Böyükağa Mirzəzadə, Nadir
Qasımov, Yusif Hüseynov, Rafiq Mehdiyev, görkəmli
xalçaçı rəssam Lətif Kərimov dərs
demişlər. 2000-ci ildə ulu öndər Heydər Əliyevin
fərmanı ilə ADMİU-nun Rəssamlıq fakültələrinin
bazasında Rəssamlıq Akademiyasının
yaradılması da bizim ali məktəbimizin
uğurlarından sayılmalıdır. Hal hazırda Rəssamlıq
fakültəsində xalq rəssamları Ağaəli
İbrahimov, Xanlar Əhmədov, əməkdar incəsənət
xadimləri Arif Əziz, Fəxriyyə Xələfova və
başqaları çalışırlar. Fakültədə
teatr, kino, televiziya, qrim, xalça rəssamı kimi maraqlı
ixtisaslar yaradılmışdır. Hələ müstəqilliyimizin
ilk dövrlərindən etibarən universitetimiz dövrün
tələblərindən irəli gələn yeniliklər
yoluna qədəm qoydu. Müasir ruhlu “Kulturologiya” fakültəsinin
yaradılması bu yeniliklərin bariz təzahür
formalarından biri idi. Belə bir fakültənin təşkil
edilməsi zamanla ayaqlaşmaq demək idi. Yeni fakültədə
yeni ixtisaslar şəbəkəsi də yaradıldı. Belə
ixtisaslardan mədəniyyət meneceri, muzeyşünas, beynəlxalq
mədəni əlaqələr və başqalarını
göstərmək olar. Bu ixtisaslar müstəqillik
yollarına qədəm qoymuş ölkəmizin vacib fəaliyyət
sahələri ilə uzlaşan ixtisaslardır. Müstəqilliyimizin
erkən mərhələsində yaradılmış
muzeyşünaslıq və tarixi-memarlıq abidələrinin
qorunması ixtisası da günümüzün
reallıqlarından irəli gəlirdi. Dövlət müstəqilliyini
elan etmiş respublikamız elə ilk günlərdən etibarən
təkcə hərbi-siyasi deyil, həm də mənəvi təcavüzə
məruz qalmışdı. Maddi mədəniyyət abidələrimiz,
mədəni sərvətlərimiz bəzən özgənin
adına çıxılır, ustalıqla dünyanın nəzərində
özgələşdirilirdi. Belə bir şəraitdə mədəni
tariximizə, abidələrimizə sahib çıxmaq,
onları mənəvi təcavüzdən qorumaq, dünyaya
öz adı ilə tanıtmaq müstəqil dövlətimizin
mədəni siyasətinin əsas məsələlərindən
birinə çevrildi. Universitetimizin müstəqillik dönəmində
gerçəkləşdirdiyi başqa bir mühüm ixtisas
beynəlxalq mədəni əlaqələr adlanır. Bu
ixtisasın beynəlxalq miqyasda əhəmiyyəti elə
adından bəlli olur. Axı müasirləşən, yeniləşən
Azərbaycan sürətlə dünya birliyinə inteqrasiya
etməkdədir.
Ulu
öndərimiz nahaq yerə demirdi: “Azərbaycan dünyaya
günəş kimi doğacaq”. Bu gün ulu öndərimizin
vaxtilə söylədiyi bu dahiyanə fikir tam gerçəkliyi
ilə reallaşmışdır. Həm də bu reallıq
gündən-günə inkişaf edir, genişlənir. Azərbaycanın
dünya birliyi ilə əlaqələri çoxplanlı
müstəvidə gerçəkləşdirilir. Əlbəttə,
əlaqələrimizin mühüm bir səhifəsini mədəniyyət
amili təşkil edir. Azərbaycanımızın qədim mədəniyyət
ocağı olması artıq dünyada maraq doğurur. Bu
reallığın dünya birliyinin diqqətinə
çatdırılmasında mədəni ənənələrimizi
və xarici dilləri yaxşı bilən mütəxəssislərə
böyük ehtiyac vardır. Beynəlxalq mədəni əlaqələr
ixtisası məhz belə mütəxəssislər
yetişdirmək, mədəniyyətimizi beynəlxalq miqyasda
təbliğ etmək, onu hüquqi baxımdan qorumaq məqsədi
ilə yaradılmışdır. Mədəniyyət, siyasət
və diplomatik missiya qovşağında qərarlaşan bu
ixtisasın perspektivli olması və dövlətçiliyimizə
mədəni siyasət sahəsində xeyir gətirəcəyi
şübhəsizdir. ADMİU-dakı digər nəzəri
ixtisaslar da ciddi maraq doğurur. Müstəqillik illərində
bizdə nəzəri ixtisasların da əhatəli şəbəkəsi
yaradılmışdır. Teatrşünas, sənətşünas
kimi “veteran” ixtisaslarla yanaşı, universitetdə müstəqillik
illərində yaradılmış ədəbi iş və
ekran dramaturgiyası, kinoşünas, kino tənqidçisi, nəşriyyat
və poliqrafiya işçisi kimi ixtisaslar da tədris olunur.
Onların yaradılması mədəniyyətlərarası
dialoqun inkişaf etdirilməsi, Azərbaycanın dünyaya
inteqrasiya etməsi prosesi üçün çox önəmlidir.
Bu ixtisaslarla bağlı fənlərin tədrisi
üçün respublikamızın tanınmış alimləri
ADMİU-ya dəvət olunmuşdur. Sənətşünaslıq
doktorları, professorlar Aqşin Babayev, İsrafil İsrafilov,
Məryəm Əlizadə, İlham Rəhimli, Nizaməddin
Şəmsizadə, Aydın Dadaşov, xalq artisti Həmidə
Ömərova, populyar kinoşünas, əməkdar incəsənət
xadimi Ayaz Salayev, tanınmış dramaturq, əməkdar incəsənət
xadimi Əli Əmirli və başqaları nəzəri
ixtisaslar üzrə dərs deyirlər. Xatırlatmaq istədiyim
başqa bir ixtisas özündə nəzəri və praktik cəhətləri
ehtiva edən kitabşünaslıq ixtisasıdır. Bu ixtisas
da yeni olub dövrün tələblərindən ərsəyə
gəlmişdir. Çünki müstəqillik illərində
respublikamızda kitab çapı da sürətlə
inkişaf edir. Görün bu gün Azərbaycanda nə
qədər nəşriyyat, mətbəə, mətbuat evi, poliqrafiya mərkəzi
fəaliyyət göstərir! Hazırladığımız
kadrlar məhz həmin sahələrə
yönəldilir, mədəniyyətin bir
qolu olan nəşriyyat-poliqrafiya
sahəsində çalışırlar. Əlbəttə, bunun üçün onlardan peşəkar bilik,
əhatəli dünyagörüşü
tələb olunur. Bu
məqsədlə universitetə ən layiqli,
tanınmış mütəxəssisləri, pedaqoqları cəlb
edirik. Yuxarıda söylənilənlər
bir daha sübut edir ki, bir çox
digər müəssisə və təşkilatlar kimi, Azərbaycan Dövlət Mədəniyyət
və İncəsənət Universiteti də
müstəqilliyimizin 20 illiyinə əliboş qədəm
qoymayıbdır.
Ötüb keçən illər ərzində
biz bir çox nailiyyətlərə imza atmışıq. Azərbaycanın
müstəqilliyi universitetimizin də inkişafına, beynəlxalq
aləmdə tanınmasına təkan vermişdir. Biz bu
imkandan istifadə edərək Azərbaycan mədəniyyətinin
dünyada tanınmasına çalışırıq.
Universitetimiz bundan sonra da müstəqilliyimizin bizim
üçün açmış olduğu geniş
yaradıcılıq imkanlarından bəhrələnəcəkdir.
Zəngin tarixi ənənələrə malik olan ADMİU
hazırda öz 90 illik yubileyi ərəfəsindədir.
Universitetimizin yubileyinin bu vaxta qədər qeyd
olunmadığını nəzərə alan kollektivimiz bu
işə ciddi hazırlaşır. Avropa İncəsənət
Universitetləri Liqasının (ELİA) üzvü olan
universitetimizin geniş beynəlxalq əlaqələri imkan
verir ki, yubiley çərçivəsində beynəlxalq
teatr festivalları və elmi-nəzəri konfranslar keçirək.
Ümid edirik ki, bu tədbirlərin keçirilməsi və
maddi-texniki bazamızın möhkəmləndirilməsi
üçün dövlət səviyyəsində
universitetimizə böyük qayğı göstəriləcəkdir.
Timuçin Əfəndiyev,
Azərbaycan Dövlət Mədəniyyət
və
İncəsənət
Universitetinin rektoru,
Professor
525-ci qəzet.- 2011.- 18 oktyabr.- S.5.