Azərbaycanın müstəqilliyi ən böyük nailiyyətimizdir

Azərbaycan xalqı tarixən azadlığa, istiqlala, müstəqilliyə can atmış bir xalqdır. Bunun üçün qurbanlar verib, mərhumiyyətlərə dözüb və addım-addım ona nail olmağa çalışıb. Tarixə qısa nəzər salsaq görərik ki, Şimali Azərbaycan iki əsrə yaxın əvvəl çar Rusiyasının, sonra isə Sovet imperiyasının əsarətində yaşayıb. XIX əsrin sonlarında Azərbaycan milli burjuaziyası çətinliklə özünə yol açmağa başlayıb. Onun mütərəqqi dairələri çarizmin müstəmləkəçilik siyasətinə qarşı çıxaraq sosial ədalətsizliyə qarşı çıxıb. 1918-ci il mayın 26-da Zaqafqaziya seymi buraxılandan sonra Azərbaycan demokratları mayın 28-də Milli Şuranın adından “İstiqlal bəyannaməsi”ni elan etdilər. Azərbaycan işğal edilib Rusiyaya birləşdirildikdən sonra ilk dəfə həmin gün Azərbaycan dövlətçiliyi bərpa olundu. Bu hadisə Azərbaycan xalqının tarixində yeni mərhələ oldu. Eyni zamanda bu, tam suverenliyə gedən yolun başlanğıcı idi. Lakin cəmi 23 aydan sonra imperiya siyasəti bir kabus kimi Azərbaycanın başının üstünü yenidən aldı. 1920-ci ildə xarici müdaxilə və daxili çəkişmələr nəticəsində Azərbaycan Xalq Cümhuriyyəti süquta uğradı. Bunun ardınca Şərqdə ilk demokratik respublikanın qurucularının bir qismi həbsxanalarda məhv edildi, bir qismi sürgünə göndərildi, bir qismi isə xaricə mühacirətə getməyə məcbur edildi. Amma buna baxmayaraq onlar Azərbaycanın gələcəyinə və bu dövlətin nə vaxtsa yenidən istiqlala yetişəcəyinə ümidlərini itirmədilər. Düz 70 il sonra bu ümidlər yenidən özünü doğrultdu. Tarixi ədalət yenidən bərpa olundu. XX əsrin əvvəlində oyanmağa başlanan milli şüur, milli müstəqillik ideyaları 1990-cı ildən sonra da susdurula bilmədi...

Çətinliklərə baxmayaraq Azərbaycan yenidən öz müstəqilliyinə nail oldu. 1991-ci ildə SSRİ dağıldıqdan sonra respublikalar müstəqillik əldə etdi. Xalqın tələbi ilə Ali Sovetin 1991-ci il oktyabrın 18-də toplanmış sessiyası “Azərbaycan Respublikasının Dövlət müstəqilliyi haqqında Konstitusiya Aktı”ni qəbul etdi. Bununla Azərbaycanın itirilmiş dövlət müstəqilliyi bərpa olundu. Müstəqillik əldə etmək çox böyük nailiyyət olsa da, bu müstəqilliyi qoruyub saxlamaq , onu əbədi olaraq yaşatmaq daha çətin və müqəddəs vəzifə kimi qarşıda dayandı. O zamankı siyasi hakimiyyətin yarıtmaz fəaliyyəti, vəzifə, şəxsi mənafe uğrunda savaşın genişlənməsi, hərc-mərcliyin baş alıb getməsi, ölkənin vətəndaş müharibəsinə sürüklənməsi Azərbaycanı müstəqilliyini itirmək təhlükəsi ilə üz-üzə qoydu. Ölkənin belə bir çətin vəziyyətində xalq bu bəladan qurtulmağın yeganə yolunu ulu öndər Heydər Əliyevin respublikaya dəvət edilməsində gördü. Xalqın təkidli tələbi ilə ikinci dəfə siyasi hakimiyyətə gətirilən ümummilli lider H.Əliyev ölkənin taleyüklü məqamında vacib tədbirlər həyata keçirərək, Azərbaycanı üzləşəcəyi bəladan xilas etdi. 1993- cü il oktyabrın 3-də Azərbaycan xalqı səs çoxluğu ilə Heydər Əliyevi Azərbaycan Respublikasının prezidenti seçdi. Elə həmin gündən Azərbaycan əsl müstəqillik yoluna qədəm qoydu. Ümummilli liderin hakimiyyətə qayıdışı Azərbaycanın siyasi və iqtisadi həyatında taleyüklü dəyişikliklərin başlanğıcı oldu. Heydər Əliyevin rəhbərliyilə Azərbaycanın hərtərəfli tərəqqisi, iqtisadiyyatın inkişaf etdirilməsi sahəsində bir sıra irihəcmli layihələrin həyata keçirilməsinə başlanıldı. Aparılan uğurlu siyasət nəticəsində dünyanın nəhəng neft şirkətlərinin iştirakı ilə 1994-cü ildə “Əsrin müqaviləsi” imzalandı. “Əsrin müqaviləsi”nin imzalanma mərasimindəki çıxışında Heydər Əliyev birmənalı şəkildə bəyan etdi ki, “Əsrin müqaviləsi” ilə qoyduğumuz təməl XXI əsrdə Azərbaycan xalqının inkişafı, firavan həyatı, müstəqil Azərbaycan dövlətinin suverenliyinin daha da möhkəmlənməsi üçün gözəl imkanlar yaradır və inanıram ki, XXI əsr müstəqil Azərbaycan dövləti üçün ən xoşbəxt dövr olacaqdır”. Doğrudan da, “Əsrin müqaviləsi”nin imzalanması Azərbaycan iqtisadiyyatında ciddi dönüş yaratdı, ildən-ilə ən müxtəlif fəaliyyət sahələrində ciddi nailiyyətlərə imza atıldı.

1995- cil noyabrın 12- də “Azərbaycan Respublikasının Konstitusiyası”” ümumxalq səsverməsi ilə qəbul edildi. Yeni konstitusiya ölkədə demokratik, hüquqi, dünyəvi və unitar dövlət qurulması işinə zəmin yaratdı. Bu ali sənədə əsasən hakimiyyətin yeganə mənbəyi Azərbaycan xalqıdır və biz müəllimlər də məktəblərdə Konstitusiya dərsini sevərək tədris edib, şagirdlərimizin öz hüquqlarını yaxından tanımasına dəstəyimizi göstəririk.

Dövlətimizin apardığı uğurlu siyasəti nəticəsində 2001-ci ildə Azərbaycan Avropa Şurasının tam hüquqlu üzvünə çevrildi. Avropa Şurasının Strasburq şəhərində yerləşən iqamətgahı qarşısında ölkəmizin dövlət bayrağı qaldırıldı və bu bizim üçün fəxredici bir hadisədir.

Respublikamızın müstəqilliyi bərpasından sonra xalqımız azad yaşayır, öz milli dövlətini möhkəmləndirərək inkişaf edir. Ölkəmiz qısa müddətdə siyasi, sosial-iqtisadi və mədəni sahələrdə böyük nailiyyətlər əldə edib. Hətta Azərbaycanın mədəniyyət və incəsənət xadimləri milli mədəniyyətimizin dünyaya çatdırılması istiqamətində daim çalışıblar və buna nail olublar. Bu istiqamətdə Heydər Əliyev Fondunun və onun rəhbəri Mehriban Əliyevanın fəaliyyəti əvəzsizdir. Fondun təşəbbüsü ilə Azərbaycan muğamı YUNESKO tərəfindən bəşəriyyətin mədəni irsi siyahısına daxil edilməsi, müxtəlif zamanlarda el sənətkarlarının düzəltdiyi əl işlərinin və toxuduğu xalçaların dünyanın məşhur muzeylərində mühafizə olunması buna əyani sübutdur.

Son 20 ildə aparılan məqsədyönlü siyasət nəticəsində ölkə həyatında əldə edilmiş nailiyyətlər göz qabağındadır. Respublikada demokratiyanın inkişaf etdirilməsi, əsaslı islahatların həyata keçirilməsini təmin edilib. Ölkədə ictimai – siyasi sabitlik yaranıb. Bu gün bölgələrdə və paytaxtda tikinti-abadlıq işləri aparılır. Görülən işlərin nəticəsində Azərbaycan hər cəhətdən böyük potensiala malik və yüksək inkişafa qadir bir ölkəyə çevrilib. Biz sərbəst yaşamağımıza, sakitlik, əmin-amanlığa görə Heydər Əliyevə və onun qurduğu Müstəqil Azərbaycan dövlətinə minnətdarıq.

Ümummilli liderin qurduğu müstəqil Azərbaycan bu gün daha da möhkəmlənir. Müstəqilliyimizin vur-tut 20 yaşı olsa da, bu gün dünyanın ən nəhəng dövlətləri Azərbaycanı tanıyır və onunla əməkdaşlıq etməyə çalışır.

20 illik müstəqil dövlətimizin qədrini bilmək, onu yaşatmaq, müstəqillik yaşının üstünə minlərlə yaş gəlməsini təmin etmək, onu qorumaq, inkişafına əlimizdən gələn köməyi göstərmək, dövlət bayrağımızın dünya ölkələrində və beynəlxalq təşkilatlarda əbədi və daimi dalğalanmasına nail olmaq hər birimizin və gələcək nəsillərin müqəddəs borcudur.

Ülviyyə İSMAYILOVA,

Xətai rayonundakı 55 saylı orta

məktəbin müəlliməsi

525-ci qəzet.- 2011.- 26 oktyabr.- S.2.