Məhəmməd
Əmin Rəsulzadə
Əsərləri
Üçüncü cild
(1915-1916)
Nəşrin
redaktorları: prof. Şamil Vəliyev və elmi işçi
Samir Mirzəyevdir.
Ön söz
Azərbaycan
milli qurtuluş hərəkatının ideoloqu və lideri,
ilk həqiqi demokratik Xalq Cümhuriyyətimizin banisi M.Ə.Rəsulzadənin
zəngin ictimai-siyasi və ədəbi-bədii publisistik
irsinin I cildi (1903-1909) 1992-ci ildə, II cildi (1909-1914) 2001-ci ildə
işıq üzü görmüşdür. İndi onun 1915-1916-cı
illərdə dövri mətbuatda dərc olunmuş əsərlərinin
III cildini oxuculara təqdim edirəm. Zənnimcə,
10 ildə təmənnasız hazırladığım bu əsər
Azərbaycan tarixi və bütövlükdə I dünya
müharibəsi dövrü tarixi ilə maraqlananlar
üçün faydalı olacaqdır.
(Əvvəli
ötən şənbə saylarımızda)
Möhtəşəm və milli bir
gün
Gürcü
şairi Akakinin mərasimi-dəfnindən
Fevralın
8-i Tiflis üçün başqa, gürcülər
üçün özgə bir gün idi.
Nəcib
gürcü milləti “bəzən göyləri, bəzən
də yerləri inikas etdirən” böyük şairanə son
borcunu əda etmək üçün bütün qüvvəsini
toplayaraq bu gün bir araya gəlmişdi. Heç bir vəchlə təsviri-qail
olmayan bu mənzərə görülməli bir hal idi.
Görməlidi ki: “Dağları dərələrə əvəz
etmək istəyənlərlə öz millətini unudub da vətənə
xəyanət “edənlərə” minlərcə lənət!
“Yalan bir şan və şöhrət
üçün doğma dilini yadırqayanlara və hər dəqiqə
vətənin səadəti üçün
çalışmayanlara da min nifrət”-deyən böyük
şairini gürcü milləti nə kibi səmimi bir
hissiyyat ilə sevir və onun nəşini nə kibi bir əlaqə
ilə topraqlara nəql ediyordu.
Gözəl
və aydın bir gün. Xoş hava. Milli
amalın, hürriyyət düşüncələrinin
ürəklərə verdigi inşirah və bunun gözəl
gürcü simalarında hasil etdigi inikas... otuz minə qərib
xəlqin böyük bir ədəb, ehtiram və intizam ilə
yürüməsi... Nə ali bir mənzərə,
nə şairanə bir lövhə. Böyük
Akakinin qovmiriyyət qədər böyük bir iqtidara malik
olmaq istər ki, şairin ölümündən hasil olan bu
şairanə mənzərəni təsvir etmək
mümkün olsun.
Tiflisdəki
gürcülərin hamısı dışarıda: qoca,
qarı, ər, arvad, oğlan, qız, böyük, kiçik,
hamısı... Hamısı gəlmiş, evdə kimsə
qalmamış... Yalnız Tiflis gürcülərini
degil, Gürcüstanın hər tərəfindən, ən
uzaq guşələrindən dəxi bir çox nümayəndələr,
vəkil göndərilmiş. Yalnız gürcülərdən
degil, qonşu millətlərin hamısından hazır olanlar
var. Bunlar miyanında müsəlmanlar naminə gələn vəkillər
mümtaz bir mövqe tutmaqda...
Müsəlmanlar
naminə dəfn mərasiminə hazır olanlar arasında
atidəki zəvat görünüyorlardı. Bakıdan cəmiyyəti-xeyriyyə və
məarif müəssisələri naminə Əlimərdan bəy
Topçubaşov, Qasım Qasımov, müsəlman mətbuatı
tərəfindən – Məhəmməd Əmin Rəsulzadə,
“Kaspi” naminə: Həsənağa Hüseynov, Gəncədən:
bələdiyyə rəisi Xəlil bəy Xasməmmədov,
uyezdindən-Səməd bəy Zülfüqarov,
Borçalıdan: Həsən bəy Yadigarov, Tiflisdən:
polkovnik İbrahim Ağa Vəkilov, müəllim Nərimanov,
Mirzə Hüseyn Həsənzadə və müəllim
Rövşən Əfəndiyev ilə sairləri. İran cəmiyyəti-xeyriyyəsi nümayəndələri,
bunlarla bərabər başqa millətlərə nəzərən
mümtaz bir hal təşkil edərək Zaqafqasiya
şeyxülislamı Pişnamazzadə həzrətləri,
idareyi-ruhaniyyə əzası və mufti əvəzinə də
idareyi – ruhaniyyə əzasında Əlaələddin Əfəndi
ilə sair üləmayi-kiram hazır idilər. Ələlümum müsəlmanlar naminə igirmidən
ziyadə nümayəndə vardı.
Müsəlmanların
gərək bu heyəti-tammə ilə dəfn mərasimində
hazır bulunmaları və gərək İrəvan
meydanında bələdiyyə dairəsi qarşısında
rusca və türkcə (rusca Əlimərdan bəy, türkcə
Məhəmməd Əmin Rəsulzadə və Rövşən
Əfəndiyev) olaraq söylədikləri nitqlər görməlidi
ki, gürcü qonşularımız üzərində nə
kibi və gözəl təsir oyandıyor və müsəlmanlara
qarşı nə kibi məvəddət və məhəbbət
hissləri tovlid ediyordu. Bu gün deyə bilərəm ki,
mütəvəffi şairin tabutundan sonra gürcülərin
ikinci bir nöqteyi-nəzərləri haman
müsəlman nümayəndələri idi. Müsəlman
nümayəndələri hər tərəfdən ibraz olunan
səlamlar, iltifatlar, ibtisam və xoş ayəndlərə
qarşı nə dürlü təşəkkür edəcəklərini
bir dürlü bacarmıyorlardı. Keşişlər
varıncaya qədər gürcü xadimləri, mətbuat
müntəsiləri, mühərrir və advokatları əsilzadəgan
və ürəfası bir-bir gəlib müsəlman, bilxassə
Bakı nümayəndələrinin əllərini
sıxır, təşəkkür ediyorlardı.
Keşişlərdən birisi Əlimərdan bəyin nitqindən
bəhs edərək “siz bizim şairimizi bizdən əla dərk
etmişsiniz” dedi. Bir çoxları mənə müraciət
edib “sözünüzü məəttəəssüf dərk
etmədimsə də mükəmməl və səmimi bir
nitq söylədiginizə haman qənaət
yetirdim. Sanki siz bir şeir oxuyordunuz. Əlbəttə, tərcüməsindən qəzetə
vasitəsilə bizi məhrum etməzsiniz!!” – diyorlardı.
Cənazə
səhər saat 11-dən qaldırılmış, kilsədən
İrəvan meydanına gətirilmiş idi. Meydanda əksəri
gürcücə, bir azı rusca və ikisi də türkcə
olmaq üzrə bir çox nitqlər söyləndi. Nəhayət
islam üləması tərəfindən
başda Şeyxül-islam olduğu halda cənazəyə dua
oxundu və oradan qaldırılaraq nəşi Kalovinski ilə
götürülüb ehtifali-nam ilə Şeyx Sənan sovməəsinə
çıxarıldı və orada da İlya
Çavçavadze ilə bərabər basdırıldı. Mərasimdən ancaq saat 6-da
qurtarılmışdı.
Böylə
möhtəşəm və milli bir mənzərəni seyr
etdikdən sonra, nə qədər kiçik də olsa,
gürcü millətinə öz milliyyət həqq və
hüququni verməmək ədalətdən degildir. Akaki kibi dahi şairlər
yetirən və sonra da ona bu qədər qədir və qiymət
qoya bilən bir millət əlbəttə ki, istədigi bir cəhətlə
yaşamaq həqqinə malikdir. Bu günki
bu ixtifalda da şübhəsiz ki, gürcülər
burasını göstərmək istəmişlərdi.
Həmin bunu göstərmək
üçün şairin öz vəsiyyətinə rəğmən
onu Saçkere kəndində gömməyib Tiflisə gətirmiş
və Gürcüstan paytaxtına hakim və kabiri-müqəddəs
bir məkanda dəfninə qərar vermişlərdi.
Gürcülər şairinin iradəsi Saçkeredə
basdırılmaq idi... Onun bu iradəsinə ehtiram
üçün biz onun üçün orada bir yadigar dikəldəriz:
fəqət sevdigi millətinin iradəsi Şeyx Sənanda
basdırılmasıdır. İradeyi-millətisə
hakimdir. Akaki sağlığında millətin
idi, öldügündə də onun olmalıdır – diyorlar.
Milli hissiyyatlarını oxşayn və milli
amallarına xidmət etmək üçün bu nəzəriyyədə
böyük bir faidə görüyorlardı. Fevralın 8-dəki ehtişam bunun doğru
olduğunu göstərdi.
Akaki dəfninin
ehqaqində iştirak edən gürcü firqələri ilə
müxtəlif təbəqələri nəzər diqqətə
alırsa, həqiqətən iradeyi-millətin bir gün tam mənası
ilə müttəhid olduğu isbat edilmiş olur. Bütün gürcü
ürəfası və bütün gürcü milləti bu
gün burada idi. Sinif və firqə ixtilafi
gözləmədən bütün gürcülər bu
gün birləşmişlərdi. Tabuti-əzəmə
qarşı nitq edənlər arasında mültəci
gürcülər ilə yan-yana olaraq Qekeçqori kibi məşhur
sosial – demokratlar da vardı. Bu günki
gürcü qəzetələri dəxi eyni ilə böylə
bir ittihad əlaməti göstərmişlərdi.
Gürcülər
naminə söylənilən nitqlərin hamısı haman gürcücə idi. Qoca bir
müsəlman acarlının gürcücə söylədigi
nitqin də olduqca müəssər olduğunu söyləyirlərdi.
Qoca Acarlı böyük şairdən istimdad
ediyor, diləyordu ki, tapşır bizi də qardaş bilsinlər,
rəayət etsinlər. Yalnız bu
qardaşlıqdır ki, bu gün bizə gələn
müsibətləri yüngülləşdirə bilər.
Bu sətrləri
qaralayan aciz, məlum olduğu üzrə mətbuat nümayəndəsi
olaraq bu ehtifalə iştirak etmək şərəfinə
nail olmuşdur. Mətbuat naminə söylənilən nitq isə
aşağıda dərc ediliyor.
M.Ə.Rəsulzadə
“İqbal”,
11 fevral 1915, ¹862
İnşirah
– məmnunluq
Məvəddəm
– sevgi, məhəbbət
Tovlid –
doğma, səbəb olma
Sovməə
– ibadətgah, hücrə
Ehqaq – meydana
gətirmə
Mültəce
– pənah gətirən, qaçqın
Müsəlman mətbuatı nümayəndəsi
Məhəmməd Əmin Rəsulzadənin nitqi
Müsəlman
mətbuatı nəcib gürcü millətinə gələn
müsibətinə iştirak etmək və müsəlman əfkari-ümumiyyəsinin
təsəllisini müsibətzədə
qonşularımıza yetirmək üçün birləşdi. Birləşmiş müsəlman
mətbuatının böylə qardaşca hissiyyatını
sizə yetirmək üçün vasitə olmaq şərəfi
mənim öhdəmə düşmüşdür. Bununla həqiqətən iftixar edərim.
Nədir
müsəlman mətbuatını böylə bir iqdamə
vadar edən? Nədir səbəb ki, gürcü milləti ilə
bərabər müsəlmanlar da bu böyük şairi təqdir
ediyorlar. Məlum olduğu üzrə Akaki
amaliyyə və insaniyyə şairidir. Onun
istədigi odur ki, hər millət öz dili ilə
danışsın, öz yazısı ilə yazsın,
özi bildigi kibi Allahına ibadət etsin.
Bittəbii
böyümək, tərəqqi etmək və dəgərli
bir həyat keçirmək istəyən hər millət
üçün nəcib gürcü millətinin şairi tərəfindən
gözəl surətdə təsvir olunan bu əsas mənidardır,
əzizdir.
Fəqət
Akaki yalnız bununla qalmıyor idi, o öz millətini xoşbəxt
və mütərəqqi görmək istərkən, bu həqqi
başqa millətlər üçün də istiyor,
başqa millətləri də öz arzu və amalları
mövcibincə böyümək, artmağa həqli
görüyordu. İştə, onu yalnız gürcülərin
olmaqdan çıxarıb da ümumiləşdirən cəhət
də budur.
Mədəniyyət-bəşəriyyə,
ayrı-ayrı millətlərin mədəniyyətlərindən
əmələ gəlmiş bir hasildir. Dünyanın tərəqqisi
kamil olmaq üçün ayrı-ayrı millətlərin tərəqqisinə
əngəl olmamaq lazım. Gürcü
şairi bu nəzəriyyənin tərəfdarı və onun
müqtədir bir nümayəndəsi idi. Bunun üçün də o yalnız
Gürcüstanın degil, əvvəlcə bütün
Qafqasiyanın, sonra da bütün aləmindir. Bu nöqteyi-nəzərdən, ey nəcib
gürcü milləti, sənə gələn müsibətdə
özünü yalnız görmə, mili tərəqqilərini
hər bir qeydən qurtarmaq istəyən bütün millətləri,
bilxassə müsəlmanlar sənin ən səmimi dərddaşlarındır.
Ey
böyük şair, ey nəcib bir millətin yetirdigi ali düha, sən sağlığında
birlik və məhəbbət tərvic ediyordun. Öldün:
Fəqət əmin ola bilərsən ki, sənin
ruhun ölməmiş, o hala diridir. Bu nə idi, iştə
buraya kəmali-diqqətlə toplanmış on minlərlə
əhali burada, sevdigin gürcülər də birləşmiş,
mədəniyyətlərinə ehtiram etdigin qovmlər, dostlar
da hazır!...
Bu
günki bu münir lövhəyi-ittihadın baisi, ruhu sənsən,
sənin ilhamındır. Binaənileyhə, sənə ey dahi, minlərcə
ehtiram!
“İqbal”,
11 fevral 1915, ¹862
Şeyxülislamın təsdiqi münasibətilə
İki
gün əvvəl Petroqrad agentəsi bir az
şübhəli bir xəbər gətirmişdi. Teleqraf
diyordu ki: “İdareyi-ruhaniyyə əzası molla Məhəmməd
Axundzadə cənabları şeyxülislamlığa təsdiq
edilmişlərdir”.
İlk nəzərdə
öylə görünüyordu ki, guya hal-hazırda
Şeyxülislam olan zat Axund molla Məhəmməd
Pişnamazzadə cənabları məqamından əzl
edilmişlər də, yerinə başqa birisi: Molla Məhəmməd
Axundzadə nəsb olunmuşlardır. İdareyi-ruhaniyyə
əzasından Molla Məhəmməd Axundzadə namində
birisinin mövcud olmadığının nəzərdəki
bu şübhəni bittəbii bərtərəf edib
Pişnamazzadə əvəzinə teleqraf səhvi olaraq
Axundzadə deyə yazıldığına ihtiman verdiriyordu.
Öylə də oldu. Sonradan
gələn xəbərlərdən vüzuhilə
anlaşıldı ki, şiyəlik məqamına nəsb və
təsdiq olunan hal-hazırda məzkur məqami işğal etməkdə
olan zat özü, yəni Pişnamazzadə cənablarıdır.
Burada
bir təzad da bu qədər. Çünki, Pişnamazzadə
cənabları bu vəqtə qədər şiyəlik məqamında
yalnız Şeyxülislam vəzifəsini ifa etmək surətilə
duruyorlardı. Bunun səbəbi də var
idi.
Rusiyalıların
ümid və arzularını əyani-izhar edib hər millətin
istədigini tələb etməgə məxsus olan illərdə,
yəni 1905, 1906 sənələrində müsəlmanlar
arasında böyük bir cərəyan hasil olub və bu cərəyan
şeyxlik və müftilik mənsəbinə təyin olunacaq
zatların müsəlmanlar tərəfindən intixab
olunmasını tələb və ona bunun üçün
Zaqafqasiya müsəlmanları hökumətə müraciət
eləmişlərdi. Şeyxülislamlıq məqamının
münhəll qalması münasibətilə meydana
çıxan bu məsələ yuxarıda məzkur sənələrdə
gərək müsəlman mətbuatı və gərək
başqa milli məhfillərcə bir çox müzakirələrə
meydan vermişdi. O vəqtin mətbuatına inikas edən
arzuyi-milli şeyxülislamlıqda imdiki üsulun iqtiza elədigindən
daha artıq bir milliyyət və müsəlman xəlqi ilə
mərbutiyyət cəhətlərini düşünməkdə
idi. Ruhanilərə hələ onların
başçısı olan şeyxlər və müftilər
ilə cəmaətin arasında yaxın bir rabitə və
ruhani bir əlaqə bulundurmaq üçün Zaqafqasiya
müsəlman əfkari-ümumiyyəsi hökumətdən
istəmişdi ki, şeyxülislamların əhali tərəfindən
intixabına müsaidə verilsin. Bu məqsədlə
Bakıdan və Zaqafqasiyanın sair nöqtələrindən
böyük bir heyət Tiflisə getmiş və canişin həzrətlərindən
xahiş etmişlərdi ki, onların bu arzusunu məqamati-aliləyə
yetirib istədiklərini hasil etməgə səy buyursunlar.
canişin məhafilində o sıralarda
müsəlmanların təbii olan bu arzularına hüsni-nəzərlə
baxıb söz verilmişdi ki, xüsusda Petroqrad ilə
lazım gələn müzakiratda bulunülsun.
Bittəbii
dövlətcə mühüm bir məsələ təşkil
edən bu xüsusun həllini haman tez bir
zamanda gözləmək olmaz idi. Məmafiyə
bu məsələnin həlli babətdə olan bir çox
digər mühüm dövləti məsələlər
zümrəsinə keçmiş kibi sayılmaqda idi. Hətta bir aralıq Zaqafqasiya müsəlman əfkari-ümumiyyəsi
məsələnin istədikləri kibi həll
olunacağına ümidvar kibi görünmüş, ilk
intixab olunacaq həqiqi müsəlman şeyxinin şəxsindən
belə bəhs etmiş, bəzi namizədlər də
göstərilmişdi. Namizədlər
miyanında Molla Məhəmməd Pişnamazzadə cənabları
dəxi var idilər.
Pişnamazzadə
cənabları əslən gəncəli olub Qafqasiyanın
münəvvər və iqtizai zəmanə aşina üləmasından
ədd olunmaqda idi. Üsuli-cədid məktəbləri həqqində
bir çox məsaisi görülmüşdür.
Böylə
olmaqla bərabər məsələnin əsasən həllini
gözləməkdə olan müsəlmanlar Pişnamazzadə
cənablarının yalnız müvəqqətən təyinini
iltizam etmişlər və buna müvəffəq
olmuşlardı. Məqsəd məsələnin amali-milliyyəyə
müvafiq həllini gözləməkdən ibarət idi.
Pişnamazzadənin
şeyxülislamlığa degil, şeyxülislamlıq vəzifəsini
ifayə təyin olunması və bu sifəti illərcə
saxlaması ilə denilmək istənilir ki, bundan sonra
şeyxülislam olacaq zat yeni üsul ilə hissi-milli
intixabı ilə olmalıdır. Bu intixab əsli müsbət
olaraq həll edilincəyə qədər bu məqamda olan zat əsil
degil, fəri kibi qalacaqdır.
Fəqət
artıq bir əmri-vaqe şəklini alan təsdiq
göstəriyor ki, bir çox zamanlarda və sürüncmədə
qaldıqdan sonra məsələ qəti bir surətdə həll
edilmişdir. Fəqət heyhat ki, bu həll
amali-milliyyənin tələb elədigi vəchlə degil,
onun əksinə vaqe olmuşdur.
Şeyxülislamlıqların
intixabi-milli surətilə olması yalnız Zaqafqasiya müsəlmanlarının
tələbini degil, bütün Rusiya islamlarının
ümumi bir arzusunu təşkil etməkdədir.
Bu
arzunun ən şamil və ən kamil bir şəkil və
ibarəsini Ümumrusiya müsəlmanları idarəsinin məşhur
qətminaməsi göstərməkdədir.
Rüəsayi-ruhaniyyənin
milliləşdirilməsi və onların cəmaət tərəfindən
intixabı bütün Rusiya islamlarının əxzi-amalını
təşkil etməkdədir.
Rusiya
müsəlman mətbuatı tədqiq olunacaq olursa, bu
amalın zaman-zaman meydana çıxıb da ən
qırqı xətlərə meydan verdigi görünər.
Ümuri-ruhaniyəyə
aid keçən sənə ehqaq edən Petroqrad müsəlman
beyni münasibətilə vaqe olan nəşriyatda da bu
xüsus haman görünməkdə idi.
İmdiki
müdhiş bu müharibənin nəticəsində var-yoxunu
vətən müdafiəsinə həsr edərkən hər
kəsin ürəgində bəslədigi ən böyük
amalı haman düşməni basdıqdan
sonra Rusiyaya böyük islahat dövrü gələcəginə
iman etməkdən ibarətdir.
Müsəlmanlar
kəza gözlərlərdi ki, ümumi imtahan nəticəsində
gələcək səadətli günlər onların da
üzünü güldürsün. Onlar da arzu edirlərdi ki,
milli ümidlərinə yetişmək üçün
qarşılarında bir dürlü mane görməsinlər.
Fəqət heyhat ki, şeyxülislamlıq əsasına
təəllüq edən yuxarıdakı əsaslı məsələnin
məlum şəkildə həlli başqa bir təmayilin
mövsif bir əlamətidir.
Buradan
yalnız bir nəticə çıxarmaq qalıbdır ki, o
da amali-milliyəmizin hədəfə aldığı biganəlik
daşa toxunmuş olduğudur.
Əlbəttə,
bununla ümidimizi kəsr edib də tamamilə məyus
olmayalım. Biləlim ki, hər bir ana kibi Rusiya da ancaq ağlayan
cocuqlarına sud verir.
M.Ə.Rəsulzadə
“İqbal”,
13 fevral 1915, ¹864
Münhəll
– həll edilmiş
Məhfil – məclis,
heyət
Ehqaq –
aşkar etmə
Kəza – həmçinin
Təəllüq
– mənsub olma, asılı olma
Beyn –
aralıq, orta, iclas
Tanrıquliyevin benefisi
Cümə
gecəsi operaçılarımızdan müqtədir
aktiyorumuz Məhəmməd Hənəfi Tanrıquliyevin
benefisinə olaraq Üzeyir bəy Hacıbəyovun “Şah
Abbas və Xurşidbanu” operası mövqei-tamaşaya
qoyulmuşdu.
Bu gecə “Səfa”
cəmiyyəti tərəfindən fransız elektro
bioqrafında müsəlman hərbzədələrin mənfəətinə
bir tamaşa vaqe olub da əldə bilet satıldığı
və Mayılov teatrosunda digər bir dəstə tərəfindən
“Molla cəbi” operettası oynandığı halda
Tanrıquliyevin benefisinə oynanan operanın
oynandığı Tağıyev teatrosu da dolu idi.
Oyun
ümumən bəd keçmədisə də, bu gecəki
musiqinin idarəsi tam bir təsir bağışlamıyordu. Müslümbəy xəstələndigindən
müəllif cənabları özləri idarə
ediyorlardı.
Benefis
sahibi Tanrıquliyev bu gecə özü-özünə təfəvvüq
etmişdi. Sair aktyorlar da yoldaşlarının benefisinə
ehtiram edəcək bir əlaqə göstəriyorlardı.
Bilxassə. Sarabski ilə
Ağdamski vəzifələrini hüsni ifa ediyorlardı.
Tanrıqulov
Məstavər rolunda səhnəyə çıxarkən
üzərinə təbriki mütəzəmmin kağız
paralar satıldığı kibi, pərdə nahayəsində
xoristlər, müəllimlər müəllif və sairləri
tərəfindən benefis sahibinə töhfələr təqdim
edildi.
M.Ə.
“İqbal”,
15 fevral 1915, ¹865
Təfəvvüq
– üstünlük, yüksəklik
Mütəzəm
– içərisində
Bayramın yaxınlaşması münasibətilə
Mart gəliyor. Təbiət qışdan
çıxıyor. Sovuqların sövləti
qırılıyor. Havaya bir etidal, ruhlara bir tazəlik ariz oluyor. Şərqin şairanə ruhunu
oxşayan gözəl günlər, bütün heyvanat ilə
nəbatatə can verən havalarla ruhabəxş bəstələr
və nurlar gəliyor. İslam Şərqinin,
bilxüsusə Zaqafqasiya müsəlmanlarının əziz
bayramı novruz yaxınlaşıyor.
Novruz
adından da bəlli: yeni gün.
Fəqət
bu martın doqquzu bizim üçün həqiqətən də
bir yeni gün təşkil edəcəkmi?
Dəhşətli
müharibənin qanlı vaqeələri. Milli mübarizələrin cansuz faciələri
təbiətin ən gözəl bir gününü bayram
saxlayan bizim aləmə də az bəla və
az müsibət gətirmədi.
Zavallı
dindaşlarımızın, bəlalı millətdaşlarımızın
Kars və Ərdahan dağlarında çəkdikləri
ğədr və zülmləri, gördükləri fəlakət
və səfalətləri mümkün olsaydı da,
bütün təfsilatı ilə təsvir edə bilsəydik,
o zaman qarelərimiz bayrama degil, haman matəmə
hazırlanarlardı.
Fəqət
yalnız matəmə hazırlanmaqdan nə çıxar?
Təfsilən
olmasa da müxtəsərən bizə yetişən xəbərlərdən
anlıyoruz ki, Osmanlı sərhəddində olub da hərb
meydanı təşkil edən yerlərin müsəlmanları
olmazın bəlayə düçar olmuşlardır:
kişilər doğranmış, arvadlar
qaçırılmış, uşaqlar dağlara, meşələrə
pərakəndə olmuş, vilayət bir xarabazara
dönmüşdür.
Düçari-ğədr
olan mahallardan ətrafa qaçan zavallılar öylə səfil
bir haldadırlar ki, soyuqlara qarşı müdafiə
üçün degil, həyalarını saxlamaq
üçün belə arvadların bir carqadları da yox...
Qaçqınlar
ac, çıplaq və möhtacdırlar. Ehtiyac həddindən
artıqdır. Bu ehtiyacları rəf edə
bilmək üçün əvvəla mənəvi həmiyyət,
sonra da maddi müavinət lazımdır.
Bu vəqtə
qədər cəmiyyəti-xeyriyyə vasitəsilə toplanan
ianələrin yekunu 25 min radəsində bir şeydir. Sarıqamışdan kərbəlayi
Ağabala Quliyev ilə doktor Məhəmməd Rza Ağavəkilov
cənablarının teleqrafla istədiklərini göndərmək
üçün ilk sifariş olaraq haman 11
min manat sərf etmək lazım gəliyor. Demək
ki, bir daha böylə sifariş olursa ki, mütləq
olacaqdır, çünki sair yerlərin ehtiyacı
Sarıqamışdakindən yüz dəfə
artıqdır – iştə 25 min manat qurtardı. Buradakı ehtiyacı rəf edə bilmək
üçün minlər degil, yüz minlərə ehtiyac
vardır.
Xəlqimizə
əminiz ki, bu ehtiyacın rəfi üçün əldən
gələni əsirgəməz. Görüyoruz ki, Rusiya
müsəlman aləminin hər tərəfində
Qafqasiyadaki fəlakət xəbərləri bir təsir
oyatmış, bu təsirdən istifadə edə bilmək və
ondan zavallı hərbzədələr üçün də
bir faizdə çıxarmaq lazım.
İştə
qabağı bayram gəliyor.
Yəqinən
ki, imdidən belə bir çoxları bayram tədarükündədirlər. Fəqət bir kərə
düşünülsün insanlığını, müsəlmanlığını
və türklügünü hiss edib də qardaşlıq və
millətdaşlıq vəzifəsi ilə ruhlanan bir insan eyləyə
bilərmi ki, böylə qanlı ildə millətdaşının,
vətəndaşının, dindaş və
qardaşının başına min bəla gələn
böylə bir zamanda hüzuri-qəlb ilə bayram saxlaya
bilsin.
Bayram millətləri
ayrı-ayrı fərd olmaqdan çıxarıb bir təni-vahid
kibi hiss etdirən vasitələrdən biridir. Bayram olunca diri
olan millət bir adam kibi mübini-hissiyyatə
malik olmalıdır. Novruz bayramı da böylə
bayramlardan biridir. Bu günü məhdud bir dairəyə
alarsaq, bütün Zaqafqasiya özünü bir adam kibi hiss edib hamısı sevinər, şənlənər,
təbiətə qarşı gülümsünər. Fəqət Zaqafqasiya hər ilki kibi bu bayramda da sevinə
biləcəkmi?
Heyhat,
nasıl sevinə biləriz ki, bugünki gündə minlərcə
müsəlmanın çöllərdə səfil və sərgərdan
olaraq dolandıqlarını xəbər alıyoruz.
Nazpərvər
uşaqlarını başına toplayıb bayram süfrəsi
ətrafında şadman oturan bir ailə əcəba igirmi saətlik
bir fasilədə düçari-ğədr olan ailələri
unuda biləcəkmi? Əcəba
bayram ləzzətlərinə uyub da fəlakətləri
görmək istəməyənlərin nəzərində
keçən sənə bayram xonçəsi başında və
öz xanimanında oturub övladları ilə bərabər
zövq duyan bir zavallı arvadın imdiki halda yetim
qalmış balalarına “ana, acıq”-deyə zarıllayan
yavrularına qarşı xəcil və şərmənd
qalıb da daldalanmağa bir yer, istilənməgə bir paltar,
yeməgə yavan çörək tapmadığını təsəvvürlərindən
qova biləcəklərmi?
Müsəlman
imanı və türk qanı olan bir şəxs
övladına bayram libası geydirdikdə bu günü
yüngülləşdirmək üçün götürə
bilmədigi yavrularını qarlar içində buraxıb da
son bir bucəyi vidayla Allaha tapşıran fəlakətzədə
qaçqınları düşünməzmi?
Xayır,
böylə bir çox kabuslar və qan qarartan xəyallarla pərişan
olacaq bir bayramdan imtina edəlim. Qoy bu ilki bayramımız təntənəsiz
və şövkətsiz keçsin. Qoy bu
ilki bayram zahiri alayişlərdən, bəzəklərdən
mübərra olsun.
Bəli, qoy
bu ilki bayramımız mənəvi və həqiqi bir bəzəklə
zinətlənsin, zavallı qardaşlara müavinət zinətilə!
Demək
istiyoruz ki, ay müsəlmanlar, bu ilki bayrama sərf edəcəginizi
müsəlman hərbzədələri üçün
veriniz: veriniz də biliniz ki, şəkərləmələr,
noğullar və şirnilər verəcəyiniz bu pullar quru
çörək degil, arpa qorğasını belə tapmayan
acları doyduracaq.
Şair
bir ürəgin ələ gətirilməsini min həçdən
əfsəl görmüşdür.
Şübhəsiz
ki, fəlakətə uğramış bir zavallı
qaçqını geyindirib doyurmaq min bayram xönçəsindən
əfzadır.
Yaxınlarının
dərdini aldırmıyıb da öz keyflərindən
qalmıyan insanlar bilməlidirlər ki, onların keyfi də
tez pozula bilər.
Dindaşlarının
ağlar gözlərinə yazıqlanmayan ağalar Faiq əfəndi
dedigi kibi, öz gözlərinin qüvvətli olduqlarına
heç inanmasınlar.
Şadlıq
və bayram günlərində fəlakət və səfalətə
uğrayanlarını unudan bir millət əmin olsun ki, həqiqi
bir bayram üzü görməkdən məhrum olub qalar.
İştə
milli bir bayram gözliyor və həqiqi bir novruz
amalımızdan isə bu ilki novruza sərf edəcəgimizi
Kars və Ərdəhan hərbzədələrinə verəlim!
Həqiqi
bir müsəlman, rəhmdil bir insan üçün bu ən
mütəntən bayramın verəcəgi zövqdən min
dəfə artıq bir zövqi-ruhani bəxş edər.
M.Ə.Rəsulzadə
“İqbal”,
19 fevral 1915, ¹869
Sövlət
– şiddət
Etidal –
mülayimlik
Cansuz – qəlbi
yandıran
Ğədr
– zülm
Nazpərvər
– nazla bəslənən
(Ardı
var.)
Şirməmməd Hüseynov
525-ci qəzet.- 2011.- 29 oktyabr.- S.26-27.