Bəstəkarlar
İttifaqında Ramiz Mustafayevin
85 illik yubileyi qeyd edilib
Azərbaycan
Bəstəkarlar İttifaqında (ABİ) bəstəkar, xalq
artisti Ramiz Mustafayevin 85 illik yubileyi qeyd olunub. APA-nın məlumatına
görə, tədbirdə çıxış edən
ABİ-nin sədri, xalq artisti Firəngiz Əlizadə Ramiz
Mustafayevin çox məhsuldar bəstəkar olduğunu qeyd
edib: “O, xüsusilə iri həcmli, monumental musiqi
janrlarında yazmağı çox sevirdi. Onun
yaradıcılığına miqyaslılıq çox
xasdır. Elə bunun üçün də Ramiz Mustafayevin yaradıcılığında
musiqili-səhnə əsərləri, simfonik və
vokal-simfonik bəstələr başlıca yer tutur”. Əməkdar
incəsənət xadimi Aida Tağızadə yubilyarın sənət
yoluna nəzər salaraq vurğulayıb ki, xalq artisti Ramiz
Mustafayevin musiqili-səhnə, vokal-simfonik əsərlərə
meyli onun keçdiyi mürəkkəb, lakin maraqlı həyat
yolu ilə də ciddi bağlıdır: “Müstəqil
yaradıcılıq yoluna qədəm qoyduqdan sonra onun
yaradıcılığında opera və operetta janrı
xüsusi əhəmiyyət kəsb edir. Yazdığı
beş opera arasında ona daha çox uğur gətirən
“Vaqif” operası olub”. Tədbirdə əməkdar incəsənət
xadimi Zemfira Qafarovanın “Ramiz Mustafayev” monoqrafiyası da təqdim
olunub. Tədbirin davamında Azərbaycan Televiziyası və
Radiosunun Cahangir Cahangirov adına Xoru öz ifasını səsləndirib.
525-ci qəzet.- 2011.- 29 oktyabr.-
S.18.