Budapeştdə Üzeyir Hacıbəylinin 126 illiyi və Azərbaycan Milli Musiqi Günü qeyd edilib

 

Sentyabrın 18-də Azərbaycanın Macarıstandakı səfirliyinin təşəbbüsü ilə dahi bəstəkar Üzeyir Hacıbəylinin anadan olmasının 126-cı ildönümü və Milli Musiqi Günü Budapeştdə təntənəli şəkildə qeyd edilib. Milli Musiqi Günündə “Dunay” simfonik orkestrinin və azərbaycanlı musiqiçilərin iştirakı ilə keçirilən bayram konsertində Azərbaycan və macar bəstəkarlarının yaradıcılıqlarından nümunələr səsləndirilib. Görkəmli Azərbaycan bəstəkarları Üzeyir Hacıbəylinin, Qara Qarayevin, Fikrət Əmirovun, eləcə də macar musiqisinin klassiki Bela Bartokun əsərləri, macar xalq musiqisi nümunələri iki ölkənin musiqiçilərinin ifasında mədəniyyətlərimizin tarixi-mənəvi yaxınlığı əhval-ruhiyyəsini daha da yüksəldib. Görkəmli tarzən, Xalq artisti, Bakı Musiqi Akademiyasının professoru Ramiz Quliyevin tarda virtuoz ifası daha böyük maraqla qarşılanıb. Dinləyicilər sənətkarı ayaq üstdə, sürəkli alqışlarla alqışlayıblar. Üzeyir Hacıbəylinin əsərlərindən seçmələrin və macar xalq rəqsi “Çardaş”ın orkestrin müşayiətilə tarda ifası iki fərqli musiqi mədəniyyətinin və ifaçılıq məktəbinin məharətli sintezi kimi diqqəti cəlb edib.

İstedadlı dirijor, beynəlxalq müsabiqələr lau+reatı Əyyub Quliyev də yüksək musiqi duyumunu və peşəkarlıq xüsusiyyətlərini bir daha nümayiş etdirib. Onun dirijorluğu altında “Dunaysimfonik orkestri qısa müddət ərzində Azərbaycan bəstəkarlarının milli özünəməxsusluğu ilə seçilən əsərlərini məharətlə ifa etməyə nail olub. Gənc pianoçu, Ferens List adına Budapeşt Musiqi Akademiyasının magistrantı Jalə Rəsulova royalda Azərbaycan bəstəkarlarının əsərlərindən solo parçaları səsləndirib. Konsertdən əvvəl tamaşaçılar qarşısında çıxış edən səfir Vilayət Quliyev Azərbaycanın mədəni və mənəvi həyatında Üzeyir Hacıbəyli fenomenindən, onun zəngin yaradıcılıq irsindən, bu günyaşayan ənənələrindən bəhs edib, ölkəmizdə qeyd olunan Milli Musiqi Günü haqqında məlumat verib. Böyük uğurla keçən konsertdə diplomatik korpusun nümayəndələri, Macarıstanın elmmusiqi ictimaiyyətinin təmsilçiləri, Azərbaycan diasporunun üzvləri iştirak ediblər. Macarıstanın “Dunay” və MTV televiziya kanalları konsertdən geniş reportaj hazırlayıb, Ramiz və Əyyub Quliyevlərlə müsahibələri, habelə Üzeyir Hacıbəyli yaradıcılığı haqqında məlumatları tamaşaçılara təqdim ediblər.

 

 

525-ci qəzet.- 2011.- 23 sentyabr.- S.7.