“Müstəqilliyimizin bərpası Azərbaycanda kitabçılıq işinin inkişafına təkan verdi”

Dünən Milli Kitabxananın konfrans zalında II Bakı Beynəlxalq Kitab Sərgi-Yarmarkası çərçivəsində “Azərbaycanın dövlət müstəqilliyi və kitab sənətinin inkişafı” mövzusunda konfrans keçirildi. Konfransı giriş sözüylə açan professor Nizami Cəfərov Bakıda keçirilən Beynəlxalq Kitab Sərgi-Yarmarkasını təqdirəlayiq hadisə kimi dəyərləndirdi: “Bakıda artıq ikinci dəfədir keçirilən bu tədbir həm Azərbaycan, həm də dünya kitabını təbliğ etməyə yönəldiyi üçün yüksək səviyyəli bir mədəniyyət hadisəsidir. Bunu müstəqilliyimizin bir göstəricisi də saymaq olar. Dövlət müstəqilliyimizin bərpası Azərbaycanda kitabçılıq işinin inkişafına da təkan verdi. Əgər müstəqillik və iqtisadi inkişaf olmasaydı, biz belə bir tədbiri keçirə bilməzdik. Qədimdən bəri kitab alternativsiz bilik mənbəyi olub, amma televiziyanın, internetin inkişafı onu bir qədər arxa plana çəksə də, kitab yenə də alternativsiz olduğunu sübut etməkdədir. Parlamentdə mədəniyyət haqqında hazırlanan yeni qanunda da kitaba və onun təbliğinə xüsusi yer ayrılmışdır”.

Mədəniyyət və turizm nazirinin birinci müavini Vaqif Əliyev II Bakı Beynəlxalq Kitab Sərgi-Yarmarkasının əhəmiyyətindən və Azərbaycanda kitabçılığın tarixindən, perspektivlərindən danışdı. Nazir müavini artıq bu sahədə ciddi addımlar atıldığını, ölkə prezidentinin sərəncamına əsasən 2008-2013-cü illər ərzində kitabxana işinin inkişafı ilə bağlı xüsusi tədbirlər görüldüyünü vurğuladı. V.Əliyev bildirdi ki, sözügedən sərgi-yarmarka Azərbaycan kitabının və nəşr işinin artıq dünya miqyasına çıxmaqda olduğunu və böyük perspektivlər vəd etdiyini göstərir.

Yazıçı, millət vəkili Aqil Abbas da tədbiri sevinclə qarşıladığını, kitabın yenidən diqqət mərkəzinə çıxmasının fərəhli hal olduğunu bildirdi: “Bu gün Azərbaycan poliqrafiyası dünya poliqrafiyasından geri qalmır, bizdə standartlara uyğun, hətta daha da üstün kitablar çap edilir”. A.Abbas kitab satışının yetərli səviyyədə olmadığını, kitab mağazalarının azlığını bildirərək, bu sahəyə diqqətin artırılmasının vacibliyini qeyd etdi.

Tədqiqatçı Asif Rüstəmli paytaxtda kitabla bağlı bayram əhval-ruhiyyəsi olduğunu məmnunluqla vurğulayaraq, milli kitabçılıq işinin tarixinə və hazırkı mənzərəsinə nəzər saldı.

Konfransda Milli Kitabxananın direktoru Kərim Tahirov, professor Abuzər Xələfov, kitabşünas Bayram Allahverdiyev də öz fikirlərini bölüşdülər, ölkədə kitaba və nəşr sahəsinə marağın artmasını yüksək qiymətləndirdilər.

Pərviz SADIQOV

525-ci qəzet.- 2011.- 30 sentyabr.- S.7.