Xəyyam Mirzəzadənin “Fikirlər, düşüncələr və məqalələr”i təqdim olunub

Ötən gün Azərbaycan musiqi mədəniyyətinin görkəmli nümayəndəsi, bəstəkar Xəyyam Mirzəzadənin “Fikirlər, düşüncələr və məqalələr” adı kitabının təqdimat mərasimi gerçəkləşib. Mərasimdə giriş sözü ilə çıxış edən xalq şairi Vaqif Səmədoğlu X.Mirzəzadə haqqında fikirlərini bölüşüb: “Xəyyam Mirzəzadənin peşəkarlığı yalnız musiqi ilə çərçivələnmir. Məsələn, ədəbiyyata baxışı elədir ki, istənilən ədəbiyyatçı onun danışdıqlarını müzakirə kimi dinləyə bilər. Bundan başqa Xəyyam Mirzəzadə Bakını, İçərişəhəri çox gözəl tanıyır. Şəxsən mən məmnuniyyətlə Xəyyamı Bakının meri təyin edərdim. Mən musiqi savadımın yarısını müəllimlərimə, yarısını da Xəyyam Mirzəzadəyə borcluyam. O mənə musiqiyə peşəkar şəkildə qulaq asmağı öyrədib”. V.Səmədoğlu, həmçinin, təqdim olunan kitab haqqında düşüncələrini dilə gətirib: “Bu kitab dövri mətbuatda dərc olunan məqalə və müsahibələrini əhatə edən ilk topludur. Kitab ali məktəblərin müəllim və tələbələri, musiqişünaslıq üzrə mütəxəssislər və ümumilikdə bəstəkarın yaradıcılığı ilə maraqlanan geniş oxucu kütləsi üçün nəzərdə tutulub. Xəyyam Mirzəzadənin bu kitabı həm elmi populyar, həm də monoqrafik xarakter daşıyır. Hər bir hissənin materialları tarixi xronoloji ardıcıllıqla təqdim olunaraq görkəmli sənətkarın yaradıcı və elmi təkamül yolunu izləməyə imkan verir”. Daha sonra Xəyyam Mirzəzadə çıxış edərək kitabın məzmunundan danışıb: “Bu kitabda 50-ci ildən bu günə qədər mətbuatda çıxan məqalələr əksini tapıb. Kitabın ikinci hissəsində isə mənim jurnalistlərə verdiyim müsahibələrim çap olunub. Kitabın tərtibçisi sənətşünaslıq namizədi Kəmalə Ələsgərlidir”. Qeyd edək ki, kitab Xəyyam Mirzəzadənin 75 illiyilə əlaqədar nəşr olunub və 500 nüsxə tirajla çapdan çıxıb. Təqdimat mərasimində X.Mirzəzəadə musiqilərindən ibarət disklərin hazırlandığını da diqqətə çatdırıb. Onun sözlərinə görə, disklər toplusu Mədəniyyət və Turizm Nazirliyinin təşəbbüsü ilə işıq üzü görəcək.

HÜSNİYYƏ

525-ci qəzet.- 2011.- 13 yanvar.- S.7.