Kinorejissor Cahangir Mehdiyevin 60 yaşı tamam olur

Tanınmış kino xadimi, rejissor Cahangir Mehdiyevin bu gün 60 yaşı tamamlanır. Ömrünün çox hissəsini kinoya həsr etmiş istedadlı sənətkar öz yaradıcılığı dövründə kinoda müxtəlif səpkili, parlaq və tamaşaçı tərəfindən sevilən filmlərə quruluş verib. Yubileyilə əlaqədar Azərbaycan Professional Kinorejissorlar Gildiyası Bürosunun rejissora ünvanladığı təbrik məktubunda sənətkarın həyat və yaradıcılıq yoluna nəzər salınıb, ona ünvanlanan xoş arzular öz əksini tapıb: “Cahangir Mehdiyev 1951-ci ildə Bakı şəhərində anadan olub. 1968-1973-cü illərdə Azərbaycan Dövlət İncəsənət İnstitutunun rejissorluq fakültəsində, 1974-1979-cu illərdə Moskvanın Kinematoqrafiya İnstitutunda G.Daneliyanın kursunda təhsil alıb. “Diplom işi” adlı qısametrajlı filmlə əla qiymətlə diplom müdafiəsini edən Cahangir Mehdiyev həmin filmlə beynəlxalq festivalda “Ən yaxşı tələbə işi” kimi ilk mükafatını alıb. Təhsilini bitirdikdən sonra 1979-cu ildən “Azərbaycanfilm” kinostudiyasında işləyib. Onun komediya janrında çəkdiyi “Vah!”, “Evlənmək istəyirəm”, “Kişi sözü”, “Gənc qadının kişisi”, “Girişmə öldürər” və digər filmləri öz dəsti-xətti ilə seçilərək tamaşaçılar tərəfindən rəğbətlə qarşılanıb və indi də sevilə-sevilə baxılır. Onun filmləri tamaşaçını cəmiyyətin mürəkkəb və ağır durumundan bir anlığa da olsa uzaqlaşdıraraq, filmin arzularla dolu qəhrəmanlarının aləminə qovuşdurur və ürəklərdə ümid qığılcımı və hərarət yaradır. Onun filmləri bir çox beynəlxalq festivallarda Azərbaycanı layiqincə təmsil etmiş və mükafatlara layiq görülüb. 1998-ci ildən Cahangir Mehdiyev “Mozalan” Studiyasının rəhbəri təyin olunur və vaxtı ilə planlı, iqtisadiyyatlı cəmiyyətin nöqsanlarının açılmasında çox böyük rol oynamış “Mozalan” satirik kinojurnalının müasir bazar iqtisadiyyatına uyğunlaşdırılması yolunda səylərini əsirgəmir. Azərbaycanın Əməkdar İncəsənət Xadimi fəxri adına layiq görülmüş Cahangir Mehdiyev Kinematoqrafçılar İttifaqının və Professional Kinorejissorlar Gildiyasının üzvü olaraq milli kinematoqrafın ictimai həyatında fəal iştirak edən, gənc kadrların hazırlanmasına və formalaşmasına öz töhfəsini verən, öz həmkarları və dostları arasında nüfuza və hörmətə malik olan bir sənətçidir. Hörmətli və əziz həmkarımızı 60 illik yubileyi münasibətilə ürəkdən təbrik edir, ona həyatda və sənətdə yeni-yeni uğurlar arzulayırıq”.

525-ci qəzet.- 2011.- 13 yanvar.- S.7.