“Euronews” telekanalının rəhbərləri Əbülfəs Qarayevlə görüşüblər

Dünyanın ən nüfuzlu telekanallarından olan “Euronews”un rəhbərləri – kanalın Müşahidə Şurasının sədri Pyer Luici Malezani və baş icraçı direktoru Filip Kayla Bakıda səfərdədir. Mədəniyyət və Turizm Nazirliyində qonaqlarla görüş keçirilib. Adıçəkilən nazirliyin mətbuat xidmətindən verilən məlumata görə, nazir Əbülfəs Qarayevin “Euronews” telekanalının Müşahidə Şurasının sədri Pyer Luici Malezani və telekanalın baş icraçı direktoru Filip Kayla ilə görüşündə telekanalın 2011-ci ilin aprel ayında Bakıda keçiriləcək Dünya Mədəniyyətlərarası Dialoq Forumunun tərəfdaşı qismində çıxış etməsi, tədbirin telekanal vasitəsilə yayımlanması və təbliğinə dair müzakirələr aparılıb. Telekanalın baş icraçı direktoru Filip Kayla bu məsələlərə dair müsbət rəy bildirib. Qeyd olunub ki, “Euronews” telekanalına Dünya Mədəniyyətlərarası Dialoq Forumu ilə bağlı “Tərəfdaşlıq təklifləri” göndərilib və hazırda həmin təkliflərin həyata keçirilməsi imkanları araşdırılır.

HÜSNİYYƏ

525-ci qəzet.- 2011.- 15 yanvar.- S.17.