“Dolu”nun yaradıcı heyəti cəbhə bölgəsində

Dövlət sifarişi ilə “Azərbaycanfilm” kinostudiyasında çəkilişinə start verilən tammetrajlı “Dolu” bədii filminin yaradıcı heyəti cəbhə bölgəsinə səfər edib. Ağdam və Ağcabədidə əsərin həyatda qalan prototiplərilə ilə görüşdükdən sonra yaradıcı heyət birbaşa təmas xəttində əsgərlərin qonağı olub. Bu səfərdə məqsədlərdən biri də filmin naturadan çəkiləcəyi yerləri öyrənmək və müəyyənləşdirməkdi. Həm müharibə veteranları, həm də əsgərlər yaradıcı heyəti çox mehribanlıqla qarşılayıblar və onlara uğurlar arzulayıblar. Xatırladaq ki, Aqil Abbasın “Dolu” romanı Qarabağ savaşına və bu savaşda son damla qanınadək vuruşan qeyrətli oğullarımıza həsr olunub. Roman ölkədə böyük maraqla qarşılanıb, ədəbi hadisəyə çevrilib. Filmin ssenari müəllifi Aqil Abbas, quruluşçu rejissoru Elxan Cəfərov, quruluşçu operatoru Nadir Mehdiyev, quruluşçu rəssamı isə Rafiq Nəsirov, icraçı prodüsseri Nadir Əliyevdi. Filmin yaradıcı heyətinin bu günlərdə yenidən cəbhə bölgəsinə səfəri nəzərdə tutulub.

GÜNEL

525-ci qəzet.- 2011.- 18 yanvar.- S.7.