Kitablar arasında yaşanan ömrün işığı

 

 Bu gün kitabxana bir sosial institut olaraq cəmiyyətin həyatında hansı müsbət rolu oynayırsa, bu prosesdə kitabxana əməkdaşlarının, xüsusən də kitabxanaçı peşəsinin mahiyyətini, cəmiyyətin müsbət istiqamətdə inkişafına təsirini anlayan əsl kitabxanaçı kadrların xüsusi əməyi var. Ziyalılarımızın elm məbədi adlandırdıqları M.F.Axundov adına Milli Kitabxananın Sorğu-informasiya xidməti şöbəsinin müdiri Zemfira Əliyeva da bu vəzifəni ləyaqətlə yerinə yetirmək üçün öz üzərində yorulmadan çalışır. O, kollektivin sevilən, hörmət edilən üzvlərindəndir.

O, 1959-cu il yanvarın 18-də Odlar Yurdunun sirli-sehrli, nağılabənzər, əslində isə “həqiqi nağıl” dünyasından, “Şahlar sarayı”nın, Qız qalasının bina olduğu, Mir Möhsün Ağa ruhunun dolaşdığı, Tanrı sevgisi ilə bu günümüzə qədər qorunub saxlanan Qala şəhərdən – İçərişəhərdən boylandı dünyaya. Üç bacının ortancılı olan Zemfira xanım telinə sığal çəkilə-çəkilə böyüdü, çox uşaqların əlçatmaz arzusu olan bu “həqiqi nağıl” dünyasında. Bu gün 50 yaşın pillələrini xanım-xatın yerişi ilə qalxan Zemfira xanım indi qayğısız gəncliyini, ərköyün uşaqlığını da elə o dar dalanlarda, sehrli aləmdə axtarır.

O, 1979-cu ildə Azərbaycan Dövlət Universitetinin Kitabxanaçılıq fakültəsinə daxil olub, 1984-cü ildə isə həmin ixtisası kitabxanaşünas-biblioqraf ixtisası üzrə bitirib. Zemfira xanım 1982-ci ildən M.F.Axundov adına Dövlət kitabxanasının Komplektləşdirmə şöbəsində adi kitabxanaçı kimi fəaliyyətə başlasa da, şöbədə baş kitabxanaçı vəzifəsinə kimi yüksələ bilib. Hazırda Sorğu-informasiya xidməti şöbəsinin müdiri vəzifəsində çalışır. Bu vəzifədə də, gülərüz, xoşrəftar Zemfira xanım işçilərin rəğbət və məhəbbətini tezliklə qazanıb. Böyüklərə övlad, kiçiklərə ana qayğısı ilə yanaşan Z.Əliyeva uzun illər ərzində qazandığı bilik və təcrübəni tabeçiliyində olan hər bir işçi ilə bərabər bölüşür. Uzun illər boyu kitabxanaya daxil olan dövri mətbuatın, elmi əsərlərin komplektləşdirilməsi, abunəsi, qeydiyyatı, uçotu, kartoçkaların baş və oxucu kataloqunda düzülüşü işi ilə bilavasitə məşğul olan Zemfira xanım bu gün həmin nəşrlər üzrə oxucu sorğularını tam, dolğun şəkildə cavablandırmaqda, axtarışı vaxt itirmədən tez və dəqiq yerinə yetirmək işində gənc işçilərə öz əməyini əsirgəmir. Zemfira xanım son illər şöbə əməkdaşlarının müxtəlif istiqamətlərdə tərtib etdikləri biblioqrafik göstəricilərin tərtibində onlara rəhbərlik etməklə yanaşı özü də bu işdə fəal çalışır. Bunlardan kollektivin tərtib etdiyi, ulu öndər Heydər Əliyevin “Müstəqilliyimiz əbədidir” çoxcildliyinin ilk 9 cildinə tərtib edilən köməkçi aparatın ərsəyə gəlməsində yaxından iştirak edib. Azərbaycan muğamlarına həsr olunmuş annotasiyalı biblioqrafik göstəricinin muğamla bağlı rusdilli ədəbiyatın toplanmas və biblioqrafik qaydada işlənməsinin yekun mərhələsində olduğunu söyləyən Zemfira xanım qarşıda oxucu maraqlarına uyğun bir çox işlərində onları gözlədiyini bildirib. O, kitabxananın təşkil etdiyi bir çox kursların iştirakçısı olmaqla bərabər Tədris Mərkəzində də müəllim-trener kimi fəaliyyət göstərib. Zemfira xanıma cansağlığı, peşəsinə olan məhəbbətinin azalmasını arzulayır, eyni zamanda ad günü münasbətilə kollektivin, xüsusən də şöbənin əməkdaşları adından təbrik edir, şəxsi həyatda və işində uğurun onu izləməsini diləyirik. Zemfira xanım, Tanrı sizin simanızda bütün xeyirxah və əməlisaleh insanları dünyamız üçün qorusun!

 

 

Azadə NOVRUZOVA

 

525-ci qəzet.- 2011.- 18 yanvar.- S.7.