Təhsil Nazirliyində İctimaiyyətlə əlaqələr şöbəsinin və Bakı Şəhəri üzrə Təhsil İdarəsinin hesabatı dinlənilib

Dünən Təhsil Nazirliyində nazirliyin İctimaiyyətlə əlaqələr şöbəsinin və Bakı Şəhəri üzrə Təhsil İdarəsinin 2010-cu il ərzində görülən işlərə dair hesabat iclası keçirilib.

İclasda çıxış edən İctimaiyyətlə əlaqələr şöbəsinin müdiri Bayram Hüseynzadə bildirib ki, 1999-cu ildə Təhsil Nazirliyində Mətbuat və informasiya xidməti yaradılıb. 2000-ci ildən Aparatın nəzdində İctimaiyyətlə əlaqə şöbəsi, 2003-cü ildən İctimaiyyətlə əlaqə sektoru kimi fəaliyyət göstərib. 2004-cü ildən müstəqil şöbədir. Şöbənin əsas vəzifələri nazirliyin fəaliyyətinə dair məlumatların ictimaiyyətə çatdırılması, nazirliyin tabeliyində olan qəzet və jurnalların, elektron kütləvi informasiya vasitələrinin fəaliyyətinin düzgün istiqamətləndirilməsi, nazirliyin rəsmi internet saytının idarə olunmasıdır. Fəaliyyət istiqamətləri isə Mətbuat konfransları, brifinqlər, ictimaiyyəti daha çox maraqlandıran mövzular üzrə dəyirmi masalar və diskussiyaların, Təhsil Nazirliyi rəhbərliyinin və digər məsul əməkdaşların kütləvi informasiya vasitələrində çıxışlarının təşkili, nazirliyin keçirdiyi tədbirlərdə kütləvi informasiya vasitələri nümayəndələrinin iştirakının təmin edilməsi, şöbəyə daxil olan müraciətlərə baxılması, nazirliyə daxil olan informasiya sorğularının qanunvericilikdə müəyyən edilmiş müddətdə cavablandırılmasının təmin olunmasıdır. Nazirliyin müvafiq sərəncam və əmrlərinin, normativ-hüquqi aktların şərh edilməsi, aktual məsələlərlə bağlı nazirliyin məsul əməkdaşlarının rəsmi mövqeyinin ictimaiyyətə çatdırılmasının təşkili, nazirliyin xətti ilə keçirilən mühüm tədbirlərin foto və video çəkilişlərinin aparılmasının təmin olunmasıdır: “Şöbə müdirinin əsas vəzifəsi şöbənin fəaliyyətinə ümumi rəhbərlik və nəzarətin həyata keçirilməsi,

“Azərbaycan müəllimi” qəzetinin idarə olunması, Təhsil Nazirliyinin rəsmi internet saytına ümumi rəhbərlik və koordinasiyadır. Şöbənin aparıcı məsləhətçisi Billurə Hacızadənin əsas vəzifəsi kütləvi informasiya vasitələri ilə işin təşkili, nazirliyin keçirdiyi tədbirlərdə kütləvi informasiya vasitələri nümayəndələrinin iştirakının təmin olunması, tədbirlərdə iştirak və məlumatların hazırlanması, şöbəyə daxil olan sənədlərin icrasıdır. Şöbənin məsləhətçisi Ceyran Eyvazzadənin əsas fəzifəsi isə nazirliyə ünvanlanan informasiya sorğularının cavablandırılması, press-relizlərin hazırlanması, nazirliyə tabe olan pedaqoji mətbuat orqanları ilə iş, dünya təhsilində baş verən yeniliklər barədə məlumatların hazırlanmasıdır”. Şöbə müdiri qeyd edib ki, təhsillə bağlı keçirilən 200-ə yaxın tədbirdə media nümayəndələrinin iştirakı təmin olunub, təhsillə bağlı mühüm yeniliklərin ölkə ictimaiyyətinə çatdırılması məqsədi ilə mətbuat konfransları keçirilib, ictimaiyyətin məlumatlandırılması məqsədilə nazirliyin 30-dan çox əməkdaşının, tanınmış təhsil mütəxəssislərinin, beynəlxalq məsləhətçilərin müxtəlif televiziya və radio verilişlərində iştirakı, 450-yə yaxın müsahibəsinin təşkili təmin olunub, 2010-cu il ərzində təhsil sahəsində həyata keçirilmiş islahatların, reallaşdırılmış mühüm layihələrin ictimaiyyətə çatdırılması və normativ-hüquqi aktların şərh edilməsi istiqamətində iş aparılıb. Nazirliyin rəsmi məlumatları, press-reliz və təqdimatlar kütləvi informasiya vasitələrinə çatdırılıb, nazirliyin fəaliyyəti ilə bağlı ictimaiyyətin məlumatlandırılması məqsədilə “525-ci qəzet”lə əməkdaşlıq haqqında müqavilə imzalanıb, müqaviləyə əsasən bu mətbu orqanda təhsil sahəsində görülmüş işlərə, müxtəlif problemlərə dair yazıların dərc olunması təmin edilib. Təhsil Nazirliyi və Mətbuat Şurası KİV-lə əməkdaşlığın daha da təkmilləşdirilməsi məqsədi ilə 2010-cu ilə dair Fəaliyyət Planı təsdiq edib. Bu sənədə uyğun olaraq, şöbə nəzərdə tutulan tədbirlərin həyata keçirilməsini təmin edib. Fəaliyyət Planına əsasən Bakıdakı 60 nömrəli məktəbdə Mətbuat Şurası, Prezident yanında Kütləvi İnformasiya Vasitələrinin İnkişafına Dövlət Dəstəyi Fondu və Bakı Şəhəri üzrə Təhsil İdarəsi ilə birgə “Təhsil müəssisəsi və media: qarşılıqlı münasibətlər” mövzusunda dəyirmi masa keçirilib. Tədbirdə təhsil müəssisələri ilə media nümayəndələri arasında münasibətlərin tənzimlənməsi istiqamətində məsələlər müzakirə olunub. Füzuli rayonunun Horadiz şəhərində Təhsil Nazirliyi, Prezident yanında Kütləvi İnformasiya Vasitələrinin İnkişafına Dövlət Dəstəyi Fondu və Mətbuat Şurasının birgə təşkilatçılığı ilə “Təhsil və mətbuat” mövzusunda regional konfrans təşkil olunub. Azərbaycan Mətbuatının 135 illiyi ilə əlaqədar Təhsil Nazirliyi, Prezident yanında Kütləvi İnformasiya Vasitələrinin İnkişafına Dövlət Dəstəyi Fondu və Mətbuat Şurası jurnalistlər arasında “Təhsil və media: peşəkarlığın artırılmasına dəstək” mövzusunda yazı müsabiqəsi keçirib. Müsabiqənin nəticələrinə əsasən 1 nəfər I, 2 nəfər II, 3 nəfər III yerin qalibi olub, 10 nəfər isə həvəsləndirici mükafata layiq görülüb: “Təhsil Sektorunun İnkişafı üzrə İkinci Layihənin ictimaiyyətin məlumatlandırılması alt komponenti çərçivəsində Təhsil Nazirliyi ilə İctimai Televiziya və Radio Yayımları Şirkəti arasında müqavilə imzalanıb. Nazirliyin müvafiq şöbələri ilə birgə müəyyənləşdirilmiş mövzular əsasında çəkilmiş 8 reklam çarxı İctimai və “Azad Azərbaycan” televiziya kanallarında yayımlanıb. Kurikulum əsasında tədris olunan dərsin üstün cəhətləri və əhəmiyyəti, uşaqların məktəbəqədər təhsilə cəlb edilməsinin zəruriliyi, ümumtəhsil məktəblərində vakant müəllim yerlərinə işə qəbul olunmaq üçün tətbiq edilən yeni qaydaların ictimaiyyətə çatdırılması və sair mövzular üzrə reklam çarxları hazırlanıb. Təhsil Nazirliyinin rəsmi internet saytı “Elektron hökumət haqqında” Qanunun tələblərinə uyğun yenidən təkmilləşdirilərək istifadəyə verilib. Sayt məzmun, dizayn və funksionallıq baxımından müvafiq tələblərə cavab verir. Saytda dövlətin təhsil siyasətinə uyğun olaraq, təhsil sahəsinin müxtəlif istiqamətləri üzrə görülən işləri əks etdirən məlumatlar yerləşdirilir. Saytda Təhsil Nazirliyi rəhbərliyinin qəbul günləri, nazirliyin struktur rəhbərlərinin əlaqə telefonları və elektron poçt ünvanları qeyd olunub. Saytda Təhsil Nazirliyi sistemində fəaliyyət göstərən “Qaynar xətt” xidmətləri barədə məlumat verilir. Saytda ölkənin bütün ali, orta ixtisas və texniki peşə təhsili müəssisələrinin siyahısı, ünvanı, əlaqə telefonu, rəsmi saytı, elektron poçt ünvanları və digər məlumatlar yerləşdirilib. 2010-cu ildə saytın rus və ingilis versiyaları hazırlanıb. Daxil olan məlumatlar qısa müddət ərzində tərcümə olunaraq müvafiq səhifələrdə yerləşdirilir”. B.Hüseynzadənin dediyinə görə, ötən il nazirliyin internet saytına ümumilikdə 3000-dən çox məlumat və informasiya daxil edilib, son bir il ərzində sayta 2 500 000-ə yaxın istifadəçi daxil olub. İstifadəçilərin sayına görə nazirliyin saytı ölkənin ən aparıcı saytları arasında yüksək mövqeyini qoruyub saxlamaqdadır, ölkənin aparıcı reytinq saytlarının göstəricilərinə görə nazirliyin saytı təhsil saytları içərisində daim birinciliyi qorumaqdadır. Təhsil Nazirliyinin rəsmi internet saytına son bir ay ərzində (15.12.2010-15.01.2011) daxil olan istifadəçilər Böyük Britaniyadan 433 nəfər, Türkiyədən 232, ABŞ-dan 176, Küveytdən 174, Polşadan 131, Koreyadan 112, Rusiyadan 102, Almaniyadan 42, Kanadadan 41, Fransadan 31 nəfər: “Təhsil Nazirliyinin rəsmi internet saytı “Milli Net-2010” müsabiqəsinin qalibi olub. Nazirliyin rəsmi internet saytı ölkənin İKT sahəsi üzrə ixtisaslaşmış 23 ən nüfuzlu təşkilatının rəhbərliyi ilə keçirilmiş “Milli Net-2010” Milli İnternet müsabiqəsində 309 sayt arasında “Dövlət və bələdiyyə saytları” nominasiyası üzrə ən yüksək mükafata layiq görülərək I yeri tutub. Ötən il “Azərbaycan müəllimi” qəzetinin tərtibatında, forma və məzmununda əhəmiyyətli dəyişikliklər edilib. Ötən ildən “Azərbaycan müəllimi” qəzeti A3 formatında, rəngli, 16, 24 və 32 səhifə həcmində nəşr edilir. 2010-cu ildə “Azərbaycan müəllimi” qəzetinin yeni internet saytı da istifadəyə verilib. Misir Mərdanovun rəhbəri olduğu layihələr əsasında son illərdə ümumilikdə 6 kitabın hazırlanması və arxiv materiallarının toplanması işinə köməklik göstərilib. Nazirin rəhbəri olduğu layihə əsasında “Azərbaycanın təhsil nazirləri” kitabının hazırlanması və arxiv materiallarının toplanması işinə köməklik göstərilib. Bu sahədə ilk təşəbbüs olan kitabda XX əsrin əvvəllərindən indiyədək Azərbaycanın təhsil sisteminə rəhbərlik etmiş şəxslər və onların fəaliyyəti haqqında məlumatlar əksini tapıb, ötən il nazirlikdə və nazirlikdən kənarda keçirilən bütün tədbirlərin foto, bir sıra tədbir-lərin isə video çəkilişi aparılıb”. Qarşıda duran vəzifələrdən söz açan B. Hüseynzadə vurğulayıb ki, şöbə ötən il başa çatdırılmamış layihələrin davam etdirilməsi, Mətbuat Şurası ilə birgə 2011-ci il üzrə Fəaliyyət Planının hazırlanması, şöbənin və “Azərbaycan müəllimi” qəzeti əməkdaşlarının bilik və bacarıqlarının təkmilləşdirilməsi, peşəkarlıq səviyyələrinin yüksəldilməsi məqsədilə onların müvafiq seminarlarda iştirakının təmin edilməsi, qəzetdə “Dünya universitetləri” layihəsi çərçivəsində dərc olunan materiallar əsasında kitabın hazırlanması, təhsildən yazan jurnalistlərin peşəkarlıq səviyyəsinin artırılması məqsədilə seminar və treninqlərin keçirilməsini nəzərdə tutub.

Bakı Şəhəri üzrə Təhsil İdarəsinin (BŞTİ) müdiri Nailə Rzaquliyeva bildirib ki, BŞTİ hazırda 13 sektor, Metodik Mərkəz və onun beş bölgə üzrə metodik bölmələri, həmçinin Mərkəzləşmiş mühasibat sektorunun 5 Xidmət bölməsi ilə fəaliyyət göstərir. İdarənin fəaliyyətə başlamasından dörd ildən çox vaxt ötür. Bu müddətdə qarşıya qoyulan vəzifələrin yerinə yetirilməsi sahəsində Təhsil İdarəsi müəyyən nəticələrə nail ola bilib. N.Rzaquliyevanın söylədiyinə görə, Bakıda pedaqoji kadrların işə qəbulunun vahid mexanizminin tətbiq edilməsi və bu mexanizmin daim təkmilləşdirilməsi, nəhayət, vakant yerlərə müsabiqə yolu ilə müəllim qəbulu məktəblərin keyfiyyətli kadr təminatında mühüm rol oynayıb: “Yeni müəllim işə götürülərkən məktəbdə həmin ixtisas üzrə müəllimlərin orta dərs yükünün ən azı 18 saat olması ciddi tələb kimi həyata keçirilib. Yığma saatlar hesabına işləyən müəllimlərin sayı 2006-cı ildə 1400 nəfər olduğu halda, 2010-cu ildə bu say 770 nəfərə qədər azalıb. Müəllimlərin işə qəbulunun Təhsil Nazirliyi tərəfindən elektron vasitələr əsasında iki mərhələli müsabiqə yolu ilə həyata keçirilməsi təhsildə müəllim sıxlığının qarşısını almaqla yanaşı, işə qəbul prosesinin daha obyektiv şəkildə hayata keçirilməsini də təmin etdi. Beləliklə, 2009 – 2010 – cu tədris ilində paytaxtın ümumtəhsil məktəblərində 360 müəllim yeri vakant olaraq müsabiqəyə çıxarıldı və onlardan 284 yer tutulub. Boş qalan və digər vakant yerlərə qəbul üçün ikinci dəfə elan verildi. Müsabiqəyə çıxarılan 226 vakant yerdən 159 – na müəllim işə qəbul edildi. 2010 – 2011 – ci dərs ilində 198 müəllim yeri müsabiqəyə çıxarıldı, həmin yerlərdən 165 – i müsabiqə yolu ilə tutuldu.

Məlum olub ki, 30 – a yaxın vakant yer dəfələrlə müsabiqəyə çıxarılsa da, həmin yerlərə ya iddiaçı olmamış, ya da müsabiqədən keçənlər yolun uzaqlığını əsas gətirərək işləməkdən imtina etmişlər. Bunun bir səbəbi həmin məktəblərin şəhərin ucqar kəndlərində yerləşməsidirsə, digər səbəb yerli kadrların peşəkarlıq səviyyəsinin aşağı olmasına görə müsabiqədən keçə bilməməsidir”. N.Rzaquliyevanın dediyinə görə, hazırda BŞTİ-nin tabeliyində olan 307 məktəbəqədər təhsil müəssisəsindən 7 müəssisə istisna olmaqla 300 məktəbəqədər təhsil müəssisəsi 1387 qrupla fəaliyyət göstərir. Bu qrupların 1204 – də təlim- tərbiyə Azərbaycan dilində 183 – də isə rus dilində aparılır.

Hazırda fəaliyyət göstərən 300 müəssisədən 186 – sı birtipli layihə əsasında tikilib. 114 müəssisə uyğunlaşdırılmış binalarda fəaliyyət göstərir. İdarənin fəaliyyəti dövründə 29 bağçada əsaslı, 55 müəssisədə isə cari təmir işləri aparılıb, bir sıra müəssisələrin istilik sistemləri, dam örtükləri, hasarı, mətbəxləri, sanitar qovşaqları təmir edilib. Məktəbəqədər təhsilin əhatə dairəsinin genişləndirilməsi istiqamətində Təhsil Nazirliyinin müvafiq əmrinə əsasən 2008-ci ildə eksperiment olaraq Xətai rayonunda 8 məktəbəqədər müəssisədə qısamüddətli və çevik vaxt cədvəli ilə işləyən qruplar yaradılıb. Çevik qruplarda işləyən tərbiyəçilərlə müntəzəm treninqlər və seminarlar keçirilməsi həmin qruplarda işin müsbət nəticə verməsinə səbəb olub: “Hesabat ilində “Təhsil haqqında” Qanununa müvafiq olaraq 5 yaşlı uşaqların məktəbəqədər təhsilə cəlb olunması işi də yaxşılaşıb. 2010-11-ci dərs ilində isə 9646 uşaq cəlb olunub. Bu göstəricilərə əsaslanıb demək olar ki, müsbət dinamika var.

Lakin məktəbəhazırlıq qruplarının şəbəkəsinin daha da genişləndirmək imkanı olsa da, indi Bakı şəhərində birinci sinfə uşaqların heç də hamısı məktəbəhazırlıq qruplarından getmir. Bu problemin həlli istiqamətində görülən işlər və aparılan təhlillər göstərir ki, Bakı şəhərindəki uşaq bağçalarının mövcud bazası bu işin öhdəsindən gələcək səviyyədə deyil. Belə ki, 300 uşaq bağçasında mövcud olan qrup otaqlarından 1009-dan təyinatı üzrə istifadə olunmur. Həmin otaqlardan istifadə olunmamasının səbəbi onlardan 38-nin təmirsiz olması, 700-də qaçqınlar və məcburi köçkünlərin yaşaması, 271 otaqda isə müxtəlif məktəbdənkənar təhsil müəssisələrinin, bəzi halda isə təhsilə aidiyyəti olmayan təşkilatların yerləşməsidir”. İdarə müdiri vurğulayıb ki, hazırda İdarənin tabeliyində 3 ümumi orta, 108 tam orta, 3 yardımçı, 1 evdə təhsil, 7 xüsusi axşam məktəbi fəaliyyət göstərir. Bu məktəblərdə 322731 nəfər şagird təhsil alır, 32 min 270 nəfər müəllim işləyir. 2006-08-ci illərdə Bakı şəhərində 22 yeni məktəbin, 28 tədris korpusunun istifadəyə verilməsi dövlətin təhsilə, onun inkişafına qayğısının bariz nümunəsidir. Dövlət Proqramı əsasında Bakının məktəblərinə 9550 ədəd kompyuter verildi və V-XI siniflərdə 22 şagirdə bir kompyuter nisbəti təmin edilib. Hal-hazırda Təhsil İdarəsinin tabeliyində olan məktəblərin 264-ü bu şəbəkəyə, bütün məktəblər isə lokal şəbəkəyə qoşulub: “Ötən dərs ilində Bakı məktəblərinin həm 9, həm də 11-ci siniflərdə aparılan buraxılış imtahanları şagird nailiyyətlərinin qiymətləndirilməsində obyektivliyin təmin olunması zərurətindən irəli gəlmişdir. İmtahanlara buraxılan 22 min 353 nəfərdən 142 nəfər imtahanlarda iştirak etməmiş, 1534 nəfər isə “qeyri-kafi” qiymət almışdır. İmtahanların yekunlarına əsasən 20 min 677 nəfər həmin ilin məzununa və əvvəlki illərdə attestat ala bilməyən 709 nəfərə orta təhsil haqqında attestat verilib. Ötən illərlə müqayisədə 2010-2011-ci dərs ili üçün ali məktəblərə tələbə qəbulunda Bakı məktəblərinin xüsusi çəkisi artmış, abituriyentlərin 44,83 faizi tələbə adını qazanıb. Xarici ölkələrin ali məktəblərinə və ölkənin xüsusi təyinatlı ali məktəblərinə qəbul olanları da buraya əlavə etsək bu rəqəm 48 faizə çatır. Son bir ildə abituriyentlərin orta balı 241-dən 264-ə qalxmış, başqa sözlə 9 faiz artıb.Təhsilin keyfiyyət göstəricisi kimi 500 və 600-dən çox bal toplayanların sayını göstərən rəqəmlər də ürəkaçandır. Belə ki, 2010-cu ildə 2009-cu ilə nisbətən 500 baldan yuxarı nəticə göstərənlərin sayının 1727-dən 2062-yə yüksəlməsi, 600 –dən yuxarı bal toplayanların sayının 159 nəfər, yaxud 40 faiz artması bizi sevindirir. 2010 – cu ildə qəbul olunanlardan 2 nəfər maksimum 700, hər 15 əfərdən biri 600-dən yuxarı bal toplayıb.

Hər 4 nəfərdən biri 500-dən yuxarı balla tələbə adını qazanıb”. N.Rzaquliyeva qeyd edib ki, BŞTİ müəllimlərin metodik hazırlığının səviyyəsini yüksəltmək sahəsində də müəyyən işlər görüb. Təhsil İdarəsinin “Metodik işin təşkili haqqında” əmrinin icrası ilə əlaqədar olaraq dayaq məntəqələri üçün nümunəvi fəaliyyət planı hazırlanıb, onun icrasi təmin edilir. Ötən dərs ili ərzində 5867 nəfər müəllim ixtisasartırma kurslarını, 2014 müəllim müxtəlif tematik kursları, 1681 nəfər I-III siniflərdə dərs deyəcək müəllim isə kurikulum kurslarını bitirib. Təhsil Nazirliyinin “Rus dilinin intensiv tədrisi üzrə layihənin tətbiqi barədə” əmrinin icrası ilə əlaqədar I və V siniflərdə Rus dili intensiv tədris edilən 35 ümumtəhsil məktəbin metodbirləşmə sədri və təcrübəli müəllimləri ilə keçirilən seminar-müşavirədə Rus dili proqramı, dərslik, dərs vəsaitlərinin tətbiqi mexanizmi ilə əlaqədar mövcud problemlər, onların aradan qaldırılması barədə fikir mübadiləsi aparılıb. İl ərzində 232 təhsil müəssisəsində, o cümlədən 182 məktəbdə metodiki işlərin təşkili, fənlərin tədrisi və sair məsəllər üzrə vəziyyət öyrənilib, müzakirə edilərək nəticələrə əsasən müvafiq metodik köməklik göstərilib. Məktəblərin dərsliklərlə təminatı sahəsində də Təhsil İdarəsi öz üzərinə düşən vəzifələri yerinə yetirib. 2010-2011-ci dərs ilində 91 adda 1 milyon 109 min 522 ədəd dərslik məktəblərə çatdırılması və şagirdlərə paylanması təmin olunub: “Məlum olduğu kimi vahid məktəbli formasına keçilməsi barədə 2007-ci ildə Bakı Şəhəri üzrə Təhsil İdarəsinin təşəbbüsü Təhsil Nazirliyi tərəfindən dəstəkləndi və dərs ili ərzində şagirdlərin 80 faizi məktəbli formasına keçdi. Növbəti illərdə bu proses davam etdirildi. Lakin hər məktəbin öz formasının olması bir sıra problemlər yaratdığından bütün məktəblərin eyni formadan istifadə etməsi gündəmə gəlib. Növbəti dərs ilində isə V-XI siniflərin də vahid formaya keçməsi təmin ediləcəkdir. Son zamanlar ictimaiyyətin diqqətində olan hicab məsələsi də özünü qabarıq şəkildə göstərməyə başladı. Qeyd edim ki, bunu dini inancla bağlamaq, həddi-buluğa çatmış qızların öz iradə və istəkləri ilə hicab geyinməsi fikri bizim araşdırmalarımız zamanı özünü doğrultmadı. Bunu Nardaran kəndində yerləşən iki məktəbin nümunəsində görmək olar. Belə ki, burada yerləşən 130 və 295 nömrəli məktəblərdə IX-XI siniflərdə cəmi 5 hicablı qız olduğu halda, I-IV siniflərdə onların sayı 55 nəfərdir. Bu vəziyyət göstərir ki, burada dini inancla bağlılıq yoxdur və çox uzaq məqsədə hesablanmış bir məsələdir. Lakin bizim də mövqeyimiz qətidir. Hesabat ili ərzində məktəbdənkənar təhsil müəssisələrinin fəaliyyətinə də diqqət və qayğı göstərilib. Məktəbdənkənar təhsil müəssisələrinin tərbiyə sahəsində mühüm rolunu nəzərə alan Təhsil İdarəsi bu sahənin inkişafına yönələn tədbirlər həyata keçirib. Həmin müəssisələrin maddi-texniki bazasının möhkəmləndirilməsi, idman avadanlıqları və inventarla təchizatı yaxşılaşdırılıb”. İdarə müdiri deyir ki, idarə qazanılan uğurları son nəticə hesab etmir: “Bizcə təhsilin inkişaf etdirilməsi, keyfiyyətin yüksəldilməsi sahəsində daha yaxşı nəticələr əldə etmək mümkündür. Buna həm kadr potensialı, həm maddi-texniki baza, həm də son illərdə formalaşmış təhsil mühiti imkan verir. Təhsil İdarəsi görülən işləri təhlil edərək gələcək fəaliyyətini aşağıdakı vəzifələrin yerinə yetirilməsi istiqamətində quracaq”.

Sevinc QARAYEVA

525-ci qəzet.- 2011.- 19 yanvar.- S.5.