Bakı Slavyan Universitetində 20 Yanvar faciəsi anılıb

20 Yanvar faciəsinin iyirmi birinci ildönümünün keçirilməsi ilə əlaqədar olaraq Təhsil Nazirinin müvafiq əmri ilə təsdiq edilən tədbirlər planına uyğun olaraq Bakı Slavyan Universitetində geniş tədbirlər planı hazırlanıb. Bu tədbirlər planı çərçivəsində universitetin müəllim və tələbələrinin, Məktəb-Lisey Kompleksi şagirdlərinin Şəhidlər Xiyabanına ziyarəti təşkil edilmiş, universitet muzeyində Tələbə Gənclər Təşkilatı və Kölgə Kabinetinin təşkilatçılığı ilə 20 Yanvar hadisələrinə həsr edilmiş videofilm nümayiş etdirilmiş, Məktəb-Lisey kompleksində yanvarın Qanlı Yanvar faciəsinə həsr olunmuş xüsusu dərslər keçirlimiş və Gəncliyin Elmi-Mədəni İctimai Birliyi ilə birgə ədəbi kompozisiya hazırlanmış, “Tələbə dünyası” qəzetində 20 Yanvar faciəsinə həsr olunan məqalələr dərc edilib, dünən universitetin fakültə və şöbələrində, Məktəb-Lisey Kompleksində faciə qurbanlarının xatirəsi bir dəqiqəlik sükutla yad edilib, universitet rektorluğunun 20 Yanvar faciəsinin iyirmi birinci ildönümünə həsr olunan geniş iclası keçirilib. İclas 20 Yanvar faciəsi qurbanlarının xatirəsinin bir dəqiqəlik sükutla yad edilməsi ilə başladı. BSU-nun rektoru, professor Kamal Abdullayev çıxış edərək 20 Yanvar hadisələrinin öz azadlığı uğrunda mübarizə aparan Azərbaycan xalqının qəhrəmanlıq səhifəsi olduğunu qeyd etdi: “Həmin gün baş verən hadisələr Azərbaycan tərəfindən bütün dünyaya göndərilən SOS işarəsi kimi yadda qaldı. Bu Sovet imperiyasının süqutu demək idi. Həmin dövrdə bütün vəzifələrindən kənarlaşdırılmış bir şəxsiyyət, Azərbaycan xalqının Ümummilli lideri Heydər Əliyev öz ailə üzvləri, yaxınları ilə birgə bütün baş verə biləcək təhlükələrə baxmayaraq Azərbaycanın Rusiyadakı daimi nümayəndəliyinə gələrək jurnalistlərlə görüşmüş, SSRİ adlı imperiyanın riyakar siyasəti haqqında öz kəskin düşüncələrini dünya ictimaiyyətinə çatdırmışdı. Bu əsl qəhrəmanlıq addımı, hər bir azərbaycanlı gənci üçün nümunə dərsi idi. Allah şəhidlərimizə rəhmət eləsin ”. İclasda çıxış edən digər müəllim və tələbələr, məzun və valideynlər 20 Yanvar həqiqətlərindən danışaraq bu kimi tarixi hadisələrin dünya ictimaiyyətinə çatdırılmasının vacibliyindən və bu istiqamətdə gənclərin üzərinə düşən məsuliyyətdən danışıblar.

S.QARAYEVA

525-ci qəzet.- 2011.- 20 yanvar.- S.2.