“Müqəddəs bahar” əsasında hazırlanan yeni tamaşa şəhidlərə həsr olunub

Heydər Əliyev Sarayında rus bəstəkarı İqor Stravinskinin “Müqəddəs bahar” baletinin musiqisi əsasında yeni layihə-tamaşa balet göstərilib. Tamaşa 20 yanvar şəhidlərinin əziz xatirəsinə həsr olunub. Bədii rəhbəri və quruluşçu baletmeysteri Rusiyanın xalq artisti, professoru Edvard Smirnov olan “Müqəddəs bahar” layihəsi Mədəniyyət və Turizm Nazirliyinin təşkilatçılığı ilə hazırlanıb.Tamaşadan əvvəl çıxış edən xalq artisti Nurəddin Mehdixanlı Bəxtiyar Vahabzadə, Nəbi Xəzri və Nüsrət Kəsəmənlinin qanlı 20 yanvara həsr olunan şeirlərini səsləndirib. Tədbirdə Qara Qarayev və Azər Rzayevin musiqisi, Üzeyir Hacıbəyli adına Azərbaycan Dövlət Simfonik Orkestrinin, Azərbaycan Dövlət Rəqs Ansamblının solistləri çıxış ediblər. Daha sonra 20 Yanvar faciəsini əks etdirən videomateriallar nümayiş etdirilib. Videomateriallarda ulu öndər Heydər Əliyevin Azərbaycanın azadlığı, müstəqilliyi və ərazi bütövlüyü uğrunda canından keçən oğul və qızlarımızın xatirəsinə göstərdiyi böyük diqqət və qayğı əksini tapıb. Tədbirdə mədəniyyət və turizm naziri Əbülfəs Qarayev, mədəniyyət, incəsənət xadimləri, ölkə teatrlarının rəhbərləri və əməkdaşları iştirak ediblər.

HÜSNİYYƏ

525-ci qəzet.- 2011.- 25 yanvar.- S.7.