“Azərbaycan vahid və bölünməz Avropada”

Heydər Əliyev İrsini Araşdırma Mərkəzinin Azərbaycan və ingilis dillərində yeni nəşri işıq üzü görüb. “Azərbaycan vahid və bölünməz Avropada” adlı kitab Azərbaycanın Avropa Şurasına üzv qəbul edilməsinin 10 illiyinə həsr olunub. Kitaba ümummilli lider Heydər Əliyevin və Prezident İlham Əliyevin Avropa Şurasının nümayəndələri ilə görüşlərinin mətni və eləcə də, bu təşkilatın tədbirlərindəki çıxışları daxil edilib. Avropa Şurasının Ermənistan-Azərbaycan, Dağlıq Qarabağ münaqişəsi ilə bağlı qətnamə və tövsiyələri də kitabda yer alan sənədlərdəndir. Həmçinin burada Azərbaycan dövlət müstəqilliyini əldə etdikdən sonra dünya inteqrasiya proseslərinə qoşulmaq üçün olduqca əlverişli perspektivlər və real imkanlar qazandığı qeyd edilib. Bildirilib ki, bu dövrdən başlayaraq, Avropa dövlətləri, onları təmsil edən demokratiya institutları, qeyri-hökumət təşkilatları ilə intensiv əməkdaşlıq şəraitində Azərbaycanda hüquqi dövlət quruculuğu həyata keçirilib. 1992-ci ildə Azərbaycan Parlamenti “xüsusi dəvət edilmiş qonaq” statusu almaq üçün Avropa Şurasına müraciət etsə də, yalnız ümummilli lider Heydər Əliyevin başçılığı ilə həyata keçirilən məqsədyönlü tədbirlərin məntiqi nəticəsi kimi 1996-cı ildə Avropa Şurası Parlament Assambleyasının Bürosu Azərbaycana “xüsusi dəvət edilmiş qonaq” statusu verib. 2001-ci ildə isə Avropa Şurası Nazirlər Komitəsinin nümayəndələr səviyyəsində keçirilmiş iclasında Azərbaycan Respublikasının Avropa Şurasına tamhüquqlu üzv seçilməsi ilə bağlı qərar qəbul edilib. Qeyd edək ki, Heydər Əliyev İrsini Araşdırma Mərkəzinin Azərbaycan və ingilis dillərində nəşr etdirdiyi “Azərbaycan vahid və bölünməz Avropada” kitabı tədqiqatçılar, beynəlxalq münasibətlər üzrə mütəxəssislər, politoloqlar və tələbələr üçün dəyərli mənbədir. Kitabın ön söz müəllifi Milli Məclisinin beynəlxalq münasibətlər və parlamentlərarası əlaqələr daimi komissiyasının sədri, Azərbaycanın AŞPA-dakı nümayəndə heyətinin rəhbəri Səməd Seyidovdur. Elmi məsləhətçilər Almaniya-Azərbaycan Əlaqələrinin inkişafına Yardım Cəmiyyətinin sədri Eduard Lintner və Milli Məclisinin üzvü Elxan Süleymanovdur. Kitab Heydər Əliyev İrsini Araşdırma Mərkəzinin baş direktoru Fuad Babayevin rəhbərlik etdiyi yaradıcı heyət tərəfindən ərsəyə gətirilib.

Bəxtiyar MƏMMƏDLİ

525-ci qəzet.- 2011.- 25 yanvar.- S.4.