“Elektron təhsil” layihəsinin təqdimatı olub

Təhsil Nazirliyində “Elektron təhsil” layihəsinin təqdimat mərasimi keçirilib. Mərasimdə çıxış edən təhsil naziri Misir Mərdanov ölkədə təhsil sisteminin informasiya-kommunikasiya texnologiyaları ilə təminatı məsələlərinə xüsusi diqqət yetirildiyini bildirib. Nazir “2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı” çərçivəsində 20 orta təhsil müəssisəsinin “Elektron məktəb” pilot layihəsinə qoşulduğunu, yaxın müddətdə isə daha 30 tədris ocağında bu yeniliyin tətbiq olunacağını nəzərə çatdırıb. Təhsil nazirinin dediyinə görə, layihənin əsas məqsədi təhsilin inkişafı, müasirləşdirilməsi, məktəbin idarəedilməsi prosesində və tədrisdə informasiya texnologiyalarının geniş istifadəsinin təmin olunmasıdır. Layihənin tətbiqi məktəbdə çevik idarəetməyə, valideyn-məktəb əlaqələrinin möhkəmlənməsinə, şagirdlərin dərsə davamiyyətinə nəzarət, məktəblərarası elektron əlaqələrin genişlənməsinə, şagirdlərin nailiyyətləri barədə məlumatlandırmaya zəmin yaradır. “Elektron məktəb” layihəsi çərçivəsində məktəblərə İKT avadanlığı verilib, lokal şəbəkə yaradılıb, proqram təminatı məsələləri həll edilib, müəllimlərin İKT bacarıqlarına yiyələnməsi sahəsində tədbirlər həyata keçirilib: “Təhsilin tam informasiyalaşdırılması üçün məktəblər Təhsil Nazirliyinin nəzdində olan Təhsilin İnformasiyalaşdırılması İdarəsində yerləşən təhsil şəbəkəsinə qoşularaq yüksək sürətli fibrooptik kabelli internetə qoşulub”. M.Mərdanov vurğulayıb ki, layihə tətbiq olunan təhsil müəssisələrində məktəbin idarəedilməsi daha şəffaf olur. Həm məktəb, həm də məktəbdənkənar tədris resursları müəllimlərə və şagirdlərə açıq olur, onlar xüsusi multimedia tədris məzmununa yönəldilmiş rəqəmsal materiallardan, tədris planına müvafiq onlayn kitabxanalardan istifadə edə bilirlər. Məktəbin bütün müəllimləri sinif otağında əlavə resurs kimi hazırlanan proqram təminatı alətlərindən istifadə etmək imkanı əldə edir, dərslər daha səmərəli planlaşdırılır, yaradıcı müəllimlər tədris resurslarını təkmilləşdirə, yaxud yeni resurslar yarada bilirlər. Bununla yanaşı müəllimlər İKT-dən testləşdirmə və nailiyyətlərin qiymətləndirilməsi prosesində istifadə edə bilir, şagirdlər isə özlərini qiymətləndirmək imkanı əldə edir. Təhsil naziri bildirir ki, layihə çərçivəsində şagirdlərin fəaliyyətlərinə nəzarəti təşkil etmək üçün təhsil müəssisəsinin saytındakı Elektron gündəlik sistemində hər bir şagirdin valideyninə məlum parolu olan ayrıca bölmə yaradılıb. Bu bölmədə şagirdin məktəbə gəlib-getməsi, dərsdə iştirak edib-etməməsi, hər fənn üzrə aldığı qiymətlər, onun dərs cədvəli, müəllimləri və bu kimi digər məlumatlar öz əksini tapır. Bu məlumatlar real vaxt rejimində daim yeniləşdirilir. Övladlarının nailiyyətləri haqqında məlumat almaq üçün valideynin məktəbə, valideyn iclasına getməyə imkanı olmadıqda kifayətdir ki, o məktəbin saytını açsın və bütün lazımi informasiyanı alsın. Qiymətlər yerləşdirilərkən həmin informasiyanı valideynin elektron poçtuna və ya SMS şəklində mobil telefonuna da göndərmək olar: “Proqram imkan yaradır ki, valideynlər uşaqlarının elektron gündəliklərinə məktəb saytı vasitəsilə istənilən zaman baxa bilir, məktəb forumunda cari məsələləri müzakirə edə bilir”.

Təhsil sistemində informasiya-kommunikasiya texnologiyalarının tətbiqinə görə Azərbaycanın MDB məkanında öncül yerlərdən birini tutduğunu qeyd edən “Ultra” şirkətinin prezidenti Tahir Mirkişili “Elektron Təhsil” layihəsi haqqında məlumat verib. Artıq ölkə üzrə 1000 məktəbdə elektron dərslərdən istifadə imkanının olduğunu vurğulayan T.Mirkişili Təhsil Nazirliyinin Təhsilin idarəolunmasının məlumat sistemləri (TİMS) şöbəsinin məlumatları əsasında 4500 məktəbin şagird və müəllim kontingenti barədə məlumatların Data Mərkəzə daxil edildiyini söyləyib.

“Elektron təhsil” layihəsinin həyata keçirilməsi istiqamətində görülən işləri nəzərə çatdıran “Ultra” şirkətinin şöbə müdiri Sərxan Məmmədov layihənin üstün cəhətlərini sadalayıb. “Elektron təhsil” layihəsinin Təhsil Portalı (www.edu.az), “Elektron məktəb” İdarəetmə Proqramı (ASM), Elektron Dərsləri İdarəetmə Proqramı (AeL), Elektron Dərslər (SCORM standartları) və Milli Təhsil Məlumat Bazasını (NED) özündə birləşdirdiyinə diqqət çəkən S.Məmmədov layihənin məktəb idarəetməsi, qiymətləndirmə, tədrisin səviyyəsinin yüksəldilməsi, valideyn-məktəb münasibətləri, təhsil sahəsinə dair müxtəlif statistik göstəricilərin vahid bazada toplanması baxımından əhəmiyyətli olduğunu qeyd edib.

Sonda iştirakçıları maraqlandıran suallar cavablandırılıb, “Elektron təhsil” layihəsinin gözlənilən nəticələri verməsi üçün həyata keçiriləcək tədbirlər müzakirə olunub.

Sevinc QARAYEVA

525-ci qəzet.- 2011.- 27 yanvar.- S.2.