“Varlı qadın”ın Özbəkistan premyerası

Özbəkistan informasiya agentliyi “Uzinform”un verdiyi xəbərə görə Y. Şəkərcanov adına Fərqanə Vilayət Musiqili Dram və Komediya Teatrında Əli Əmirlinin məşhur “Varlı qadın” komediyası əsasında hazırlanmış eyni adlı tamaşanın premyerası baş tutub.

Tamaşanın quruluşçu rejissoru Özbəkistanın xalq artisti, dövlət mükafatları laureatı Muhammadsoli Yusupov tamaşada “hansı dövrdə, hansı quruluşda və şəraitdə yaşamasından asılı olmayaraq insan ümumbəşəri dəyərlərə və humanizm prinsiplərinə sədaqətli olmalıdır” fikrini qabartmağa çalışıb.

Pyesin süjeti sadədir: kasıblıq həddinə çatmış ailə birdən-birə varlanır, nəticədə mənəvi dəyərlər çox böyük sürətlə iflasa uğrayır, ailə ənənələri dağılmağa başlayır. Pyesin maddi cəhətdən varlanmış qəhrəmanları mənəviyyatca müflisləşirlər.

Tamaşanın baş qəhrəmanını oynamaq teatrın aparıcı aktrisası Məlahət Toirovaya həvalə edilib. Qalan rollarda isə Ədhəm Kirgizbəyov, Akmal Mirzəyev, Əlişir Qafurov çıxış edirlər. Rejissorun fikrinə görə tamaşanın epataj obrazlarından olan Pəhləvan rolunda Özbəkistanın Əməkdar artisti Xolmat İkromovun oyunu çox təsirlidir.

Qeyd edək ki, Ə.Əmirlinin bu komediyası 2008-ci ildə M.Vohidov adına Tacikistan Dövlət Gənclər Teatrının ifasında Alma-Atada Orta Asiya ölkələrinin ll Beynəlxalq Teatr festivalında iki nominasiya üzrə qızıl medala layiq görüləndən sonra Orta Asiya respublikalarının və Dağıstanın səkkiz teatrında rus, qazax, qırğız, tacik, kumık, ləzgi və özbək dillərində tamaşaya qoyulub. “Krımskaya pravda” qəzetinin verdiyi xəbərə görə “Varlı qadın” hazırda Krım Muxtar Respublikasının paytaxtı Simferopol şəhərində Akademik Krım-Tatar Musiqili Dram Teatrında tamaşaya hazırlanır.

HÜSNİYYƏ

525-ci qəzet.- 2012.- 25 aprel.- S.7.