Ramiz müəllim haqqqında bir əlifba

Haqqında danışmaq istədiyim adamı tanımayan çox azdır. Amma yenə məziyyətlərindən söz açmağa, başqalarına nümunə ola biləcək cəhətlərinə diqqət yetirməyə, yorulmadan çalışmasından, yolundan dönməzliyindən, riyakarlıqla barışmazlığından, böyüklə böyük, kiçiklə kiçik ola bilmək məharətindən danışmağa ehtiyac var. Çünki yaxşıya vaxtında yaxşı deməyə, layiqlinin dəyərini vaxtında verməyə, təmənnasız xidməti heç olmasa xoş sözlə təqdir etməyə, əfsuslar olsun ki, öz xəbisliyimizə, cılızlığımıza görə çətinlik çəkirik.

Əməllərindən mümkün qədər çox adamın xəbərdar olmasını istədiyim insanlar barəsində yazı hazırlayanda ilk növbədə onu başqalarından seçən cəhəti axtarır, bayağı tərif, yorucu təkrarlardan, sönük epitetlərdən qaçmağa çalışıram. Bu dəfə isə məsələ tamamilə başqa cürdü. Hansı təyinin, hansı sifətin qəhrəmanıma daha çox yaraşdığını kəsdirə bilmirəm. Hər təyin o birindən çox yaraşır.Tərəddüdlərim qəribə qərara gətirib çıxartdı məni. Gördüm ki, Ramiz Abutalıbovu tanıtmaq üçün dilimizdə o qədər söz var ki, bir yazıya sığışdırmağa oğul istəyir. Eləmədim tənbəllik, aldım əlimə ana dilimizin əlifbasını və yuxarıdan aşağıya yol başladım.

A—Təkcə yetkin yaşına görə yox, mövqeyinə və davranışına görə Ağsaqqlıdı, Alicənabdı, Azdanışandı, Ailəcanlıdı və ən əsası Arif Adamdı.

B—Türklər demiş, Babacandı, rəqibinə qarşı Barışmazdı, “qədeşlərin” sevdiyi “Bakılıdu”.

C—Bakılılar demiş, Cəsarətli, “Can-Cigərdü”, Caz vurğunudu.

Ç—Çalışqan, Çayxordu.

D—Dəyanətli, Dəqiq, Dinc, Dürüst Diplomatdı.

E—Etibarlı, Ehtiyatlı Elm adamıdı.

Ə—Əsilli-nəcabətlidi.

F—Fərasətli “fransızdı” (Orada olduğu müddətdən Azərbaycan üçün maksimum səmərəli istifadə edib).

G—Genişqəlblidi.

H—Həssas, Hörmətcil, Həmişəcavandı.

X—Xeyirxahdı.

İ—İstiqanlı, İşgüzar və İnadkardı.

J—Jurnalistdi.

K—Kamil tədqiqatçıdı, Kitabsevərdi, yaşı ilə yox, sanbalı ilə Köhnə Kişilərdəndi.

Q—Qabiliyyətli, Qayğıkeş, Qeyrətlidi. Qeybətçi deyil.

L—Ləyaqətli “Legionerdi” (Fransanın “Fəxri legionçu” ordeninə layiq görülüb)

M—Məccani (Müftə) çalışmağı sevən, Mehriban, Müdrik Müəllimdi, Maarifpərvərdi, Meyxananı və Muğamı sevir. Mənəm-mənəmliyi Mərəz sayır.

N—Nümunəvi Naxçıvanlıdı.

O—Təəssübkeş Ordubadlıdı.

Ö—Örnək olacaq qədər Özündən narazıdı.

P—Prinsipial və Peşəkar “parisli”di.

R—Rəssamların Ramiz dostudu.

S—Sədaqətli, Səmimi, Sözü Sağ, Sənət Sevərdi.

Ş—Şəkililərin Şıq geyinməyini sevən kürəkənidi.

T—Təvazökar, Tiryakidi (siqaret çəkəndi).

U—Uşaq kimi Utancaqdı.

Ü—Ünsiyyətsevərdi.

V—Vətənpərvər və Vəfalıdı.

Y—Yaxşı mənada Yerlipərəstdi, Yerlibaz deyil.

Z—Zərif Zövqlü, Zarafatcıl, Zəhmətkeşdi.

Bu siyahıda ğ və ı hərfləri yoxdur, çünki dilimizdə həmin hərflərlə başlanan söz yoxdur.

Yaşının yetkin dövrünü məhsuldar kitab müəllifi və naşiri kimi qarşılayan Ramiz müəllimin Vətənin azadlığı və müstəqilliyi uğrunda mübarizəyə görə didərgin olmuş, ömürlərini qürbətdə tamamlamış övladlarının yenidən Vətənə qazandırılmasındakı xidmətləri dəfələrlə müxtəlif məqalələrdə işıqlandırılıb. Onu tanıdığım müddətdə başqasının fikrinə onun qədər hörmətlə yanaşıb, öz fikrindən də asanlıqla dönməyən az adamı görmüşəm. Uzun təriflərdən həqiqətən xoşu gəlmədiyini bilirəm. Təvazökarlığı ilə gerçək varlığı düz mütənasib deyil. Onun xidmətlərinin onda biri qədər xidməti olmayan çoxlarını tanıyıram ki, az qalırlar adami tapdalasınlar, könüllərindən keçəni dilə gətirmək belə ayıbdır. Necə deyərlər, babalı onların boynuna.

Ramiz müəllimi yubiley ilində təbrik etmək, ona istədiyi ovqatda mümkün qədər çox qalmağı arzulamaq, başlıcası isə, təbriketmə marafonunun qırmızı lentini kəsmək imkanına görə mən də özümü xoşbəxt sayıram.

Moskva,

1 avqust 2012-ci il

Cəfər SADIQ

525-ci qəzet.- 2012.- 18 avqust.- S.25.