“Ən yaxşı ümumtəhsil məktəbi” müsabiqəsində iştirakçılar düzgün və ədalətli şəkildə qiymətləndirilir”

Prezident İlham Əliyevin xüsusi tapşırığı ilə əsaslı şəkildə yenidən qurulmuş dördmərtəbəli 132-134 nömrəli Təhsil Kompleksində həm müəllimlərin yüksək səviyyədə fəaliyyəti, həm də şagirdlərin biliklərin əsaslarına mükəmməl yiyələnmələri üçün hər cür şərait yaradılıb. Bilik ocağında keyfiyyət, müasirlik və yüksək zövq vəhdət təşkil edir. İndi bu məktəb maddi-texniki bazasının zənginliyinə görə ölkəmizdə müasir təhsil komplekslərindən birinə çevrilib. Təhsil ocağının əsas məqsədi milli mənəvi dəyərlərə, yaradıcı təfəkkür və məntiqi yanaşmaya malik gənclərin dünyaya inteqrasiya edilməsi, müstəqil şəxsiyyət kimi formalaşdırılmasından ibarətdir. Təlim-tərbiyə yeni və səmərəli təhsil yanaşmaları, müasir metod və texnologiyalar üzərində qurulur. Məktəb fundamental və tətbiqi biliklərin öyrədildiyini əsas tutaraq, tədris prosesinin tədqiqatyönümlü olmasına şərait yaradır, şagirdləri yaradıcılığa və axtarışa həvəsləndirir, onların istedadını müxtəlif yollarla üzə çıxarır, nümayiş etdirir və dərsdənkənar təlim imkanlarını genişləndirir. Şagirdlərdə vətənpərvərlik, səmimilik, dözümlülük, tolerantlıq, xalqa məhəbbət duyğuları tərbiyəsi ön plana çəkilir, dövlətçilik prinsiplərinin qorunması hər bir şagirdə aşılanır.

Xalqın maarifləndirilməsində, Azərbaycan elminin inkişaf etdirilməsində böyük xidmətləri olan yüzlərlə alimə ilk savad verən bu təhsil ocağında bu gün minədək şagirdin təlim-tərbiyəsi ilə onlarla müəllim məşğuldur. Kompleksə əməkdar müəllim Sara Xanlarova rəhbərlik edir. S.Xanlarova Dillər Universitetini bitirib və 14 il ixtisası üzrə müəllim işləyib. Sonra yüksək pedaqoji fəaliyyəti nəzərə alınaraq paytaxt məktəblərindən birinə təlim-tərbiyə işləri üzrə müdir təyin olunub. S.Xanlarova bir müddət təhsil şöbəsinin müdiri vəzifəsində çalışıb.

Artıq neçə ildir ki, bu təhsil oçağının direktorudur. S.Xanlarova yenilikçi, təhsilin inkişafına xidmət edən yeni ideyaları dəstəkləyən, işinə böyük məsuliyyət hissi ilə yanaşan direktor kimi tanınır.

S.Xanlarova deyir ki, rəhbəri olduğu təhsil müəssisəsi 2009-cu ildə “Ən yaxşı ümumtəhsil məktəbi” adına layiq görülüb. Təhsil Nazirliyi tərəfindən keçirilən “Ən yaxşı ümumtəhsil məktəbi” müsabiqənin keçirilməsində başlıca məqsəd innovativ təhsil proqramlarının tətbiqi ilə təlim-tərbiyə sahəsində uğurlu nəticələrə nail olan, keyfiyyət göstəricilərinə görə fərqlənən ümumtəhsil məktəblərini müəyyən etmək, yaradıcı pedaqoji kollektivlərin qabaqcıl təcrübəsini respublika miqyasında geniş yaymaq, təhsil müəssisələri arasında yenilikçilik uğrunda sağlam rəqabətin güclənməsinə real zəmin yaratmaq və ictimaiyyətin, valideynlərin, xeyriyyəçi iş adamlarının, biznes qurumlarının diqqətini ümumtəhsil məktəblərinin inkişafı ilə bağlı məsələlərə fəal cəlb etməkdən ibarətdir: “Müsabiqə hər tədris ili üzrə Təhsil Nazirliyi tərəfindən keçirilir. Müsabiqədə bu qaydaların 2-ci bölməsi ilə müəyyən edilmiş şərtlərə cavab verən hər bir ümumtəhsil məktəbi iştirak edə bilər. Müsabiqənin keçirilməsinə rəhbərlik və nəzarət, tərkibi Təhsil Nazirliyi tərəfindən təsdiq edilən və ictimai əsaslarla fəaliyyət göstərən “Ən yaxşı ümumtəhsil məktəbi” müsabiqəsinin keçirilməsi üzrə Təşkilat komitəsi tərəfindən həyata keçirilir. Təşkilat komitəsinin tərkibinə beynəlxalq və qeyri-hökumət təşkilatlarının və ictimaiyyətin nümayəndələri də daxil edilə bilərlər. Müsabiqə prosesində mərhələlər üzrə qiymətləndirmə balları Təşkilat komitəsi tərəfindən müəyyən edilir. Müsabiqə şərtlərinə əsasən müsabiqədə iştirak etmək arzusunda olan məktəbin son üç ildə məzunlarının ali məktəblərə qəbul faizinin yüksək olmalı, məzunları qəbul imtahanlarında yüksək bal toplamalı, müasir təlim texnologiyalarının tətbiqi üzrə layihələrdə, habelə digər inkişafyönümlü innovativ təhsil proqramlarında iştirak etməlidir. Məktəbin yarışlarda, festivallarda, olimpiadalarda, eləcə də, beynəlxalq müsabiqələrdə iştirakı və uğurlu nəticələri, məktəbin inkişaf xətti, tədris şəraiti, müasirliyi əsas şərtlərdəndir”.

S.Xanlarovanın dediyinə görə, müsabiqə üç mərhələdə keçirilir. Müsabiqənin mərhələlər üzrə keçirilmə müddətləri hər il üçün Təhsil Nazirliyi tərəfindən müəyyən edilir. Birinci mərhələdə iddiaçı ümumtəhsil məktəblərinin rəhbərləri müsabiqədə iştirak etmək barədə ərizə ilə müvafiq quruma müraciət edir. İlkin mərhələdə iştirakçı məktəb haqqında bütün məlumatlar toplanır. Məktəbin nailiyyətləri, tarixi, tədris prosesi, məzunların göstəricilərinə xüsusi diqqət yetirilir. Təqdim edilmiş sənədlərin ekspertizası prosesində meydana çıxan, ümumtəhsil məktəbinin əhəmiyyətli göstəriciləri hesab oluna biləcək xüsusi hallar da nəzərə alınmaqla, ümumtəhsil məktəbinin iştirak üçün müəyyən olunmuş şərtləri hansı səviyyədə ödəməsi ayrılıqda müvafiq balla qiymətləndirilir. Ekspertizanın yekununa görə daha çox bal toplamış ümumtəhsil məktəbləri ekspert qrupunun təqdimatı əsasında Təşkilat komitəsinin qərarı ilə ikinci mərhələyə buraxılırlar: “Müsabiqənin ikinci mərhələsi yerlərdə təşkil edilir. Bu mərhələdə iştirakçı məktəblərin IX və XI sinif şagirdlərinin bilik səviyyəsi hər il Təşkilat komitəsinin müəyyən etdiyi fənlər üzrə xüsusi testlər vasitəsilə yoxlanılır. Testlərin hazırlanmasını, yoxlamaların keçirilməsini və nəticələrin qiymətləndirilməsini həmin məqsədlə Təşkilat komitəsi tərəfindən yaradılmış ekspert qrupları həyata keçirirlər. Bu mərhələnin yekunları barədə ekspert qrupları tərəfindən müəyyən edilmiş müddətdə Təşkilat komitəsinə hesabat təqdim edilir. Müsabiqənin üçüncü mərhələsi isə bilavasitə Təşkilat komitəsi tərəfindən keçirilir. Bu mərhələnin iştirakçısı olan ümumtəhsil məktəbləri müsabiqədə 3-5 nəfərdən ibarət nümayəndə heyəti ilə təmsil edilə bilərlər. Üçüncü mərhələdə iştirakçı məktəbin rəhbəri ümumtəhsil məktəbinin fəaliyyəti barədə 10 dəqiqəlik təqdimatla çıxış edir və verilən suallara cavab verir. 25 nəfərdən ibarət Təşkilat komitəsinin hər bir üzvü təqdimatı fərdi qaydada qiymətləndirir. Yekun qiymətləndirmə balı isə aparılan ümumi müzakirənin nəticəsinə görə müəyyən edilir. Təqdimatın qiymətləndirilməsi zamanı bir sıra göstəricilər nəzərə alınır. Təqdimat üçün maraqlı və orijinal formanın seçilməsi, təqdimatın tamlığı və zəruri məsələləri əhatə etməsi, ümumtəhsil məktəbinin inkişafyönümlü fəaliyyətinin, yaradıcı iş üslubunun, informasiya və kommunikasiya texnologiyalarından səmərəli istifadə edilməsinin real faktlarla diqqətə çatdırılması, suallara cavabların əsaslandırılmış, inandırıcı xarakter daşıması, ümumtəhsil məktəbini təmsil edən nümayəndə heyətinin vahid məqsəd ətrafında birlik nümayiş etdirməsi, ümumtəhsil məktəbinin fəaliyyətinin perspektivləri, yaxın 3 ildə gözlənilən nəticələri haqqında aydın təsəvvürlərin yaradılması. 25 nəfərlik Təşkilat komitəsi qarşısında mən məktəbin fəaliyyəti barədə 10 dəqiqəlik təqdimatla çıxış etdim. Mənim təqdimatım Təşkilat komitəsi tərəfindən çox bəyənildi. Bu müsabiqənin iştirakçısı olan bir məktəb rəhbəri kimi qeyd edim ki, “Ən yaxşı ümumtəhsil məktəbi” müsabiqəsi çox şəffaf keçirilir. Təşkilat komitəsinin hər bir üzvü başda baş müəllim, təhsil naziri Misir Mərdanov olmaqla hər kəs öz işinə cox ciddi yanaşır. İştirakçıları düzgün və ədalətli şəkildə qiymətləndirir. Burada heç bir güzəştdən söhbət gedə bilməz. Ancaq layiq olanlar “Ən yaxşı ümumtəhsil məktəbi” adına layiq görülür. Mən bu müsabiqədə düzgünlük, şəffaflıq, ədalətli seçim gördüm”.

S.Xanlarova bildirib ki, 25 nəfərlik Təşkilat komitəsinin üzvləri arasında Azərbaycan Həmkarlar İttifaqları Konfederasiyasının, Valideyn Müəllim Assosiasiyasının British Councilin nümayəndələri, alimlər var: “Təşkalat komitəsi üzvləri arasında Təhsil Nazirliyinin işçilərindən başqa, həm QHT-lərin, həm beynəlxalq təşkilatların nümayəndəsi var. Müsabiqə zamanı 1-2 nəfər yox, 25 nəfər peşəkar insan iştirakçılara qiymət verir. Bu 25 beş nəfər sözün əsl mənasında peşəkar insan qarşısında 10 dəqiqəlik təqdimatla çıxış etmək insandan hünər və məharət tələb edir. Bu 25 nəfərin yetkilliklə təqdimatıma düzgün qiymət – yüksək bal verməsi isə mənim üçün böyük fəxrdir. Təşkilat komitəsinin hər bir üzvü öz sahələri üzrə peşəkar fəaliyyətləri ilə fərqlənən şəxslərdir. Onlar müsabiqənin şərtlərinə uyğun olaraq ən layiqli namizədi seçirlər. Bu mütəxəssislərin işinə kölgə salmaq ən azı ədalətsizlikdir”.

“Ən yaxşı müəllim”müsabiqəsi haqda söz açan S.Xanlarova qeyd edib ki, müsabiqə ölkənin ümumi təhsil məktəblərində çalışan yaradıcı müəllim potensialını üzə çıxarmağa imkan verir: “Bu müsabiqə müəllimlərin öz üzərlərində çalışmalarına, peşəkarlıq səviyyələrini artırmalarına şərait yaradır. “Ən yaxşı müəllim” müsabiqəsi keçirilən zaman müəllim əməyinə, zəhmətinə, savadına, biliyinə, potensialına düzgün qiymət verilir. Ən yaxşı müəllim adını qazanmaq üçün müəllimlər 3 mərhələdən keçir. Sözün əsl mənasında savadı, bacarığı, novatorluğa və innovasiyalara meyilli, müasir təlim texnologiyalarının tətbiqi sahəsində uğurlu nəticələri ilə fərqlənən istedadlı müəllimlər də müsabiqənin Təşkilat komitəsi tərəfindən qalib seçilir. Bizim 11 müəllimimiz “Ən yaxşı məktəb” müsabiqəsinin qalibi olub. Bu müəllimlərin hər biri özü bir məktəb olan müəllimlərdir. Müasir təhsil sistemində şagirdlərin fəallığı, məntiqi düşünmələri, onlarda yaradıcı təfəkkürün inkişaf etdirilməsi əsas məqsəddir. Bu müəllimlər əsasən layihə metodikasına üstünlük verir, interaktiv təlim üsullarından istifadə edirlər. Onlar daim yenilik axtarışındadırlar, daim öz üzərlərində işləyirlər. Eyni zamanda digər ölkələrin təhsilində gedən dəyişikliklərdən, tətbiq edilən yeniliklərdən də xəbərdar olmağa çalışırlar”.

Sevinc QARAYEVA

525-ci qəzet.- 2012.- 22 dekabr.- S.15.