Küveytdə Xocalı soyqırımıyla bağlı silsilə tədbirlər keçirilir

Xocalı soyqırımının növbəti 20-ci ildönümü münasibətilə Azərbaycan Respublikasının Küveyt Dövlətindəki səfirliyi tərəfindən bir sıra silsilə tədbirlər həyata keçirilir.

Həmin tədbirlər çərçivəsində fevralın 20-də Sabah Əl-Səlim məntəqəsinin orta ümumtəhsil məktəbinin foyesində səfirliyin təşkilatçılığı ilə “Xocalı uşaqların gözü ilə” rəsm sərgisi öz işinə başlayıb. Sərginin açılış mərasimində səfir Tural Rzayev keçmiş sovet ordusunun yardımı ilə erməni silahlılarının Xocalı şəhərində törətdiyi vəhşiliklər və faciənin əsl mahiyyəti barədə məktəbin müəllim-şagird kollektivinə və tədbirdə iştirak edən valideynlərə ətraflı məlumat verilib. Sərgi iştirakçıları nəinki Azərbaycanın, həmçinin bəşəriyyətin müasir tarixində qanlı iz buraxmış bu faciənin onları olduqca kədərləndirdiyini bildiriblər. Ekspozisiya 27 fevral tarixinədək nümayiş etdiriləcək.

Fevralın 21-də isə Küveyt KİV-in iştirakı ilə səfir T. Rzayevin mətbuat konfransı keçirilib. Səfir Xocalıda törədilmiş soyqırım haqqında jurnalistlərə ətraflı məlumat verib, bu faciəni XX əsrin ən dəhşətli cinayətlərindən hesab olunduğunu vurğulayaraq, cinayəti İkinci Dünya Müharibəsi zamanı nasistlərin törətdiyi vəhşiliklərlə müqayisə edib. O, Xocalı həqiqətlərinin üzə çıxması, bütün dünya qarşısında Ermənistan Respublikasının təcavüzkar siyasətinin ifşa olunmasında Azərbaycan xalqının Ümummilli lideri Heydər Əliyevin mühüm rolunu xüsusilə vurğulayıb.

Daha sonra səfir T. Rzayev Ermənistan-Azərbaycan Dağlıq Qarabağ problemindən danışmış, bu problemin həlli üçün Azərbaycanın kifayət qədər hərbi qüdrətə malik olduğunu bildirib. O, 2011-ci ilin dekabr ayında Əl-Küveyt şəhərində keçirilən hərbi sərgidə ölkəsinin iştirakına işarə edərək, Azərbaycanın dəfələrlə Ermənistandan güclü olduğunu və münaqişənin müharibə yolu ilə həllinə atılarsa, Azərbaycanın qalib gələcəyini vurğulayıb. Ermənistanın BMT Təhlükəsizlik Şurasının qəbul etdiyi dörd qətnaməyə məhəl qoymadığına baxmayaraq, ölkəsinin işğal olunmuş əraziləri qaytarmaq üçün sülh vasitələrinə üstünlük verdiyini qeyd edib.

Səfir Ermənistanın Azərbaycana qarşı həyata keçirdiyi işğalçılıq və təcavüz siyasətinin BMT və İKT-də Küveyt Dövləti tərəfindən daim pisləndiyini qeyd edərək, dost və qardaş Küveytin ölkəsinin ərazi bütövlüyü və suverenliyini dəstəklədiyini vurğulayaraq, bu taleyüklü məsələdə tutduğu ədalətli mövqeyə və dəstəyə görə Azərbaycan hökuməti və xalqı adından minnətdarlığını ifadə edib.

Mətbuat konfransının sonunda səfirliyin təşəbbüsü və dəstəyi ilə ərəb dilinə nəşr olunmuş “Xocalı soyqırımı” kitabı və Xocalı faciəsini özündə əks etdirən filmin ərəb dilində CD variantı, həmçinin səfirlik tərəfindən hazırlanmış mətbuat bəyanatı jurnalistlərə təqdim olunub. “Xocalı soyqırımı” kitabı, sənədli film və qanlı faciə ilə əlaqədar səfirliyin bəyanatı Küveytin dövlət, hökumət qurumlarına, Parlamentinə, ölkədə fəaliyyət göstərən ictimai təşkilatlara da göndərilib.

Fevralın 22-də Küveytin çoxtirajlı və geniş oxucu kütləsinə malik, Əl-Ray, Əl-Nahar, Əl-Siyasə, Əl-Vatan, Əl-Vasat, Əl-Şəhid, Əl-Ənbəə, Aləm Əl-Yaoum qəzetlərində Xocalı soyqırımı zamanı xalqımıza qarşı törədilmiş erməni vəhşiliklərini özündə əks etdirən geniş məqalələr dərc edilib. Bundan əlavə, “Xocalı soyqırımının 20-ci ildönümü münasibətilə Xocalı əhalisinin dünya xalqlarına, Birləşmiş Millətlər Təşkilatına, Avropa Şurasına Avropada Təhlükəsizlik və Əməkdaşlıq Təşkilatına müraciəti” ərəb dilinə tərcümə edilərək, Küveytin dövlət, hökumət qurumlarına, Parlamentinə, ölkədə fəaliyyət göstərən ictimai təşkilatlara, KİV-ə göndərilib.

Silsilə tədbirlər çərçivəsində səfirliyin və Küveytdə yaşayan və işləyən Azərbaycan Respublikası vətəndaşlarını özündə birləşdirən “Vətənsevər” dostluq cəmiyyətinin təşkilatçılığı ilə səfirliyin əməkdaşları, Azərbaycan diasporasının nümayəndələri, eyni zamanda Küveyt vətəndaşlarının iştirakı ilə fevralın 23-də Xocalı faciəsinə həsr olunmuş anım mərasimi keçiriləcək.Fevralın 24-də isə bütün Küveyt məscidlərində söylənən cümə namazı xütbələrində Xocalı faciəsi şəhidlərinin xatirəsi yad ediləcək.

525-ci qəzet.- 2012.- 23 fevral.- S.4.