“Bu dünya Tanrıya səcdə yeridir”

Azərbaycan Yazıçılar Birliyinin üzvü, şair Qəşəm Çıraqlının “Bu dünya Tanrıya səcdə yeridir” kitabı çapdan çıxıb.

Kitabda şairin son iki ildə qələmə aldığı şeirlər toplanıb. Mövzu rəngarəngliyi, dil və üslub sadəliyi Qəşəm Çıraqlının yaradıcılığının başlıca məziyyətlərindəndir. Odur ki, bu şeirlər oxucuda ruh yüksəkliyi yaradır. Kitaba ön söz yazan tənqidçi Vaqif Yusifli Qəşəm Çıraqlı şeirlərini, onun yaradıcılığını belə qiymətləndirib: “Öz sözünə inam hissi, deyəcəyi sözün ehyaedici gücünə arxayınlıq Qəşəmin bütün şeirlərində hiss olunur. Qəşəm Çıraqlı sözə güvəndiyi kimi söz də ona güvənir. Məhz bu qarşılıqlı vəhdətdən şeirlər yaranır. Ən adi həqiqətlər onun şeirlərində yeni məna statusu qazanır”.

Şairin şeirləri həcmcə qısa olsa da, məzmunlu və dolğundur. Məhz bu cəhət onu şair kimi səciyyələndirən keyfiyyətlərdəndir.

İnsanlar

Torpaq üstündə

Dava salır:

Qan tökülür

Torpaq alır

Torpaq

Heç kəsə qalmır

Hamı torpağa qalır.

lll

İnsanı ağladan

Güldürəndi söz

İnsanı dirildən

Öldürəndi söz

Qılınca, qalxana

Dünəndi söz

Yenə qələmə

Güvəndi söz.

lll

Hər kəsin yaxası

Ölüm əlində

Ölüm heç kəsə

Yaxa vermir

Ölüm hamını görür

Heç kəs ölümü görmür

Heç kəs ölümü gözləmir

Ölüm hamını gözləyir.

Kitaba daxil edilən şeirlər arasında şairin uşaqlara, vətənə, sevgiyə həsr etdiyi və müxtəlif mövzularda qələmə aldığı poetik parçalar da öz əksini tapıb.

GÜNEL

525-ci qəzet.-2012.-11 iyul.-S.7.