Ürək çox dərdə dözmür

QARABAĞ AĞRISI ZİYƏDDİN SULTANOV QƏLƏMİNDƏ

Azərbaycanın son vaxtlarda apardığı uğurlu təbliğat siyasəti nəticəsində dünya ictimaiyyətinə məlum oldu ki, Xocalı faciəsi təkcə bir xalqın deyil, bütövlükdə bəşəriyyətə, insanlığa qarşı çevrilmiş ən rəzil, ən dəhşətli bir qətliam faktıdır. İndi dünyanın bir çox demokratik mətbuatı ermənilərin bu vəhşiliyinin miqyasını duymağa və onun gətirdiyi faciələri öz ölkəsinin oxucularına, tamaşaçılarına çatdırmağa başlamışlar. Xocalı faciəsinin iyirminci ildönümünün prezident sərəncamı ilə qeyd edilməsi bu hadisənin günlərlə, həftələrlə beynəlxalq mətbuatın gündəminə çıxardı. Lakin bütün bunların əsasında faktlar, qeyd olunmuş informasiyalar və bir də iri həcmli publisistik əsərlər dayanır. Bugünkü siyasətçiləri, insanlığı qiymətləndirə bilən ictimai xadimlərə və gəncliyin tarixçilərinə Xocalı faciəsinin xronikasını dəqiqliyi ilə çatdırmaq çox böyük səmərə verir. Bu sahədə jurnalist və publisistlərimiz misilsiz işlər görmüş və görməkdədirlər. İstedadlı jurnalist və publisist Ziyəddin Sultanov bütün Qarabağ hadisələrinin, xüsusilə Xocalı soyqırımının içərisində nəinki şahid kimi, həm də elə bir vətəndaş-döyüşçü kimi iştirak etmişdir. Onun Qarabağ hadisələrini, o cümlədən Xocalı faciəsini anbaan, günbəgün əks etdirən əsərləri bu günün və gələcək nəslin əlində erməni vandalizminin geniş, hərtərəfli xronikası kimi vacib sənədlər silsiləsindəndir. Publisistin “Qarabağ gündəliyi”, “Qarabağın qara günləri” , “Xocalı faciəsi”, “Burdan bir atlı keçdi”, “Ağdərədən gələn var”, “Əsirlər, itkinlər, girovlar”, “Ölüm sevinməsin qoy”, “Xatırla məni”, “Qarabağ müharibəsi: faktlar, hadisələr, düşüncələr”, “Göylərdən gələn gəlin” kitablar silsiləsi də bu xronikanın əvəzolunmaz sənədləri kimi qəbul olunur. Publisistin bu yaxınlarda nəşr olunan “Ürək dözmür ayrılığa...” kitabı həmin silsilənin davamı kimi qiymətlidir.

1988-2011-ci illər... aradan gör nə qədər keçib. Ancaq müqəddəs torpaqlarımız hələ də düşmən tapdağı altındadır. Hələ də müharibə qurtarmayıb, hələ də cəbhə xəttində atəşkəs rejimi pozulur, hələ də hücum və basqın ara vermir. Deməli, bu mövzuda, bu yöndə hər gün, hər saat, hər an yazmalıyıq, danışmalıyıq. Dünya haqq səsimizi eşidənə qədər, qələbə gününə qədər, ata-baba torpaqlarımız azad olunana qədər.

İstedadlı yazıçı-publisist Ziyəddin Sultanovun “Ürək dözmür ayrılığa...” adlı növbəti kitabında da Qarabağ müharibəsindən, torpaq itkisindən, ölümün gözünə dik baxan Azərbaycan oğullarından və qızlarından, od-ocaq, yurd-yuva həsrətindən bəhs edilir.

Kitaba istedadlı tənqidçi Vaqif Yusifli “Yaddaşın mühakiməsi, yaxud yeni bir Qarabağnamə” çox maraqlı ön sözü ilə bir arada toplanan əsərlərin qiymətini vermişdir. Maraqlıdır ki, Z.Sultanov bu kitabda daha çox yazıçı-publisist kimi çıxış edir. Onun kitaba daxil etdiyi “Xocalı faciəsi”, “Göylərdən gələn gəlin” əsərləri bir tərəfdən hadisələrin xronikası təsiri bağışlayırsa, digər tərəfən bədii-publisistik üslubu ilə faciəni yaşamış insanların ümumiləşdirilmiş obrazlarını yaradır. Bu sənədli povestlərdə Xocalı faciəsinin qurbanları, onların qəhrəmanlıq faktları, azərbaycanlı qadınların əsirlik həyatında belə öz milli qürurlarını qorumaları oxucuda bu torpaqlara mütləq qayıtmaq inamını gücləndirir, düşmənə nifrət hissini alovlandırır.

Kitabda toplanan sənədli hekayələrin hamısı, o cümlədən “İşıq həsrəti”, “Üzü bəri baxan dağlar, mənim səndə anam qaldı”, “Fəryad”, “Min yüz əlli beş gün düşmən əlində girov qalmış Fərman Quliyevin hekayəti” və s. əsərlər Qarabağ gündəliyinin sənədli-bədii ifadəsidir. Bu əsərlərin hamısında ustad bir yazıçı-publisistin ürək döyüntüləri, vətəndaşlıq hissləri var. Kitabın ən qiymətli cəhəti düşmənin düşmən olduğunu heç vaxt unutmamaq, torpaqlarımızın xilası uğrunda mübarizədən heç vaxt çəkinməmək və bir də öz ləyaqətini itirməmək kimi idealları aşılamasındadır. Müəllif kitabı “Ürək dözmür ayrılığa...” adlandırıb. Lakin bu kitabın təlqin etdiyi qayələrə görə ürək təkcə ayrılığa deyil, həm də unutqanlığa, etinasızlığa, torpaq itkisinə, acı talelərə dözmür.

İqbal ASLANOV,

BDU, Jurnalistika fakültəsinin

IV kurs tələbəsi

525-ci qəzet.- 2012.- 14 iyun.- S.7.