Rumıniyada Əyyub Quliyevin dirijorluğu ilə konsert keçirilib

İyunun 15-də Rumıniyanın “Olteniya” Dövlət Filarmoniyasında beynəlxalq müsabiqələr laureatı, Azərbaycan Akademik Opera və Balet Teatrının dirijoru Əyyub Quliyevin konserti təşkil edilib.

Gənc dirijorun idarəsi altında Olteniya Filarmonik orkestrinin ifasında Azərbaycan, Avropa və Cənubi Amerika musiqisinin parlaq nümunələri səslənib. Rumıniya Mədəniyyət Nazirliyi, Krayova şəhər meriyası və Olteniya Dövlət Filarmoniyasının təşkilatçılığı ilə keçirilən konsertdə ilk dəfə olaraq Rumıniyada dahi Azərbaycan bəstəkarı Üzeyir Hacıbəylinin “Koroğlu” operasından Üverturası ifa olunub. Rumıniya Filarmonik orkestri tərəfindən məharətlə səsləndirilən, Azərbaycanın milli simvoluna artıq çevrilmiş bu əsər dinləyicilər tərəfindən böyük alqışlarla qarşılanıb. Konsertin instrumental bölməsində məşhur rumın zərb ifaçısı, Buxarest Filarmonik orkestrinin solisti Aleksandru Anastasiunun ifasında tanınmış Braziliya bəstəkarı Ney Rozauronun Vibrafon və orkestr üçün konserti dinləyicilərə təqdim edilib.

Qeyd etmək lazımdır ki, həmin əsər Krayova Filarmoniyasında ilk dəfə olaraq Əyyub Quliyev və Anastasiu tərəfindən səsləndirilib. Konsertin ikinci bölməsində dahi fransız bəstəkarları Jorj Bize və Kamil Sen-Sansın müxtəlif səhnə əsərlərinin simfonik orkestr üçün işləmələri yer alıb. Dünya şöhrətli “Karmen Süita” ilə bərabər Bizenin “Arlezianka” süitasından nümunələr dinləyicilər tərəfindən böyük məhəbbət və maraqla qarşılanıb. Konsertin sonunda isə Sen-Sansın “Samson və Dalila” operasından “Vakxanaliya” simfonik lövhəsi proqrama yekun vurub və dinləyicilər ayaqüstə alqışlayaraq bu ifanı qiymətləndiriblər. Qeyd etmək lazımdır ki, Əyyub Quliyev 2009-cu ildə Rumıniyada keçirilən Dirijorların Beynəlxalq müsabiqəsinin qalibi olub. Müsabiqədən sonra “Olteniya” Filarmoniyasının rəhbəri, məşhur dirijor və bəstəkar Mixal Xristesku Azərbaycanlı dirijoru Rumıniyaya konsertə dəvət edib. Rumıniya musiqi yarışması ilə bərabər, Əyyub Quliyev V.Lyutoslavski adına dirijorların IV Beynəlxalq müsabiqəsinin (Polşa), D.Mitropulos adına dirijorların IX Beynəlxalq müsabiqəsinin (Yunanıstan) və Arturo Toskanini adına dirijorların IX Beynəlxalq müsabiqəsinin (İtaliya) qalibidir.

525-ci qəzet.- 2012.- 20 iyun.- S.7.