Naxçıvanda Beynəlxalq Rəsm Festivalı

Ötən həftə Naxçıvan şəhərində başlayan rəssamların Beynəlxalq Rəsm Festivalı öz işini tamamlamışdır. Bu nüfuzlu tədbir Naxçıvan Muxtar Respublikası Ali Məclisinin sədri Vasif Talıbovun “2012-ci ili milli-mənəvi dəyərlərin qorunması və təbliği ili” elan etməsi qarşılığında baş tutub. Qeyd edək ki, yaranmış ənənə üzrə Naxçıvan Muxtar Respublikasında hər yeni il başlayarkən həyata keçiriləcək tədbirlərin xarakterinə uyğun olaraq konkret məqsədlər də müəyyənləşdirilir.Elə bununla bağlı Ali Məclis sədrinin imzaladığı sərəncamda da 2012-ci ildə milli-mənəvi dəyərlər sahəsində tədbirlərə diqqət artırılacağı, milli dəyərlərin bərpası, qorunması və gələcək nəsillərə çatdırılması ilə bağlı əvvəlki illərdə başlanılmış tədbirlərin daha geniş miqyasda davam etdiriləcəyi vurğulanır. Elə üç gün ərzində sənət adamları ilə yanaşı şəhər əhalisinin maraq dairəsində olan bu tədbirin yüksək səviyyədə təşkil olunması da göstərdi ki, respublikada milli –mənəvi dəyərlərin cəmiyyətin inkişafındakı önəmli roluna duyulası əhəmiyyət verilir.

Qədim diyarın həm də dünya incəsənəti xəzinəsinə verdiyi əvəzsiz töhfələrə rəğmən Beynəlxalq rəsm festivalının “Naxçıvan-bəşəriyyətin beşiyi” adlandırılması da məntiqli səslənirdi. Festivalın əsas tədbirlərinin Əcəmi Naxçıvani təxəyyülünün bənzərsiz ifadəsi olan Mömünə xatun türbəsinin qarşısındakı “Açıq səma altında muzey”in ərazisində keçirilməsi də dünyanın müxtəlif ölkələrindən bura gəlmiş sənət adamlarının şərəfli tarixi keçmişimizlə təmas yaratmaq, onun unikal abidələri ilə təmas yaratmaq məqsədi daşıyırdı. Festivalın ilk günü beynəlxalq tədbirə qatılan rəssamlar və sənətşünaslar Naxçıvanın müxtəlif muzeylərində olmuş, tarixi yerləri ziyarət etmişlər. Heydər Əliyev və Xalça muzeyi ilə, Naxçıvan Dövlət Rəsm Qalereyası, Xan sarayı, Qədim musiqi alətləri mərkəzi, Nuhun türbəsi, Əshabi-kəhf və məşhur Duzdağla tanışlıq qonaqlarda zəngin təəssürat yaratmışdır. Ertəsi gün keçirilən tədbirin təntənəli açılış mərasimində Naxçıvan Muxtar Respublikasının mədəniyyət və turizm naziri Sarvan İbrahimov, Naxçıvn Rəssamlar Birliyinin sədri, respublikanın əməkdar rəssamı Ülviyyə Həmzəyeva, Azərbaycan Rəssamlar İttifaqının katibi, xalq rəssamı Ağali İbrahimov, Naxçıvan Dövlət Universitetinin rektoru, akademik, millət vəkili İsa Həbibbəyli və əməkdar rəssam Eldar Qurbanov çıxış edərək görkəmli fırça ustası Bəhruz Kəngərlinin vətənində keçirilən tədbirin əhəmiyyətindən danışıblar. Sonra bura toplaşanlar yerli musiqi kollektivlərinin çox maraqlı konsert proqramına şahidlik ediblər. Bundan sonra festivalın yaradıcılıq hissəsinə start verilmişdir. Türkiyə, Rusiya, Azərbaycan və Filippindən gəlmiş fırça ustaları yerli rəssamlarla birlikdə “Açıq səma altında muzey”in daş abidələrlə zəngin ərazisini yaradıcılıq emalatxanasına çevirmişlər. Əksəriyyəti Naxçıvanı ilk dəfə görən sənət adamları qədim Naxçıvan torpağından aldıqları təəssüratı gün ərzində elə tamaşaçıların gözü qarşısında kətan üzərində əbədiləşdiriblər. Festivalın üçüncü günü çəkilmiş əsərlərə baxış keçiriləndə tamaşaçılar əcnəbi rəssamların çox qısalığına baxmayaraq bu yerlərin səciyyəvi xüsusiyyətlərini duyub kətanda əks etdirmələrini yüksək dəyərləndiriblər. Elə ilk festivalın təşkilatçıları da alınan nəticələrdən çox məmnun qalıblar. Həm də sənətkarlıq nümayişinə çevrilən bu tədbirin iştirakçılarına frstivalın bağlanış mərasimində təqdim olunan sertifikat və qiymətlə hədiyyələr də nə qədər yerli qonaqpərvərliyin əlaməti idisə, bir o qədər də sənətsevərlərə həm də yüksək ustalıq dərsi nümayiş etdirənlərin əməyinin dəyərləndirilməsi idi. Festival iştirakçılarının və yerli əhalinin hələ uzun müddət unutmayacağı tədbir Rəssamlar Birliyində yerli yaradıcıların əsərlərinə baxış və Naxçıvan Dövlət Universitetində təşkil olunan gənc rəssamların sərgisi və konsertlə tamamlanıb.

ZİYADXAN ƏLİYEV,

Əməkdar incəsənət xadimi

525-ci qəzet.- 2012.- 26 iyun.- S.7.