Məmməd İsmayılın yaradıcılığı xarici mətbuat səhifələrində

Şair Məmməd İsmayıl ömrünün son on altı ilini Türkiyədə yaşamasına baxmayaraq, dünyanın fərqli diyarlarında keçirilən şeir festivallarında, yayınlanan jurnal və qəzetlərdə ölkəmizi ləyaqətlə təmsil edir. Şairin kitabları yayınlanır və önəmli sənət adamları onun haqqında adına, istedadına yaraşan fikirlər deyirlər. Bunlar barədə qəzetimizdə dəfələrlə yazılar gedib. Moskvada çap olunan ünlü “Drujba narodov” jurnalı sonuncu – iyun nömrəsində şairimizin “Danışan çinarlar” lirik poemasını oxucularına təqdim edir. Əsəri rus şeirinin öndə gələn imzalarından biri, M.İsmayılın qələm dostu Gennadi Kalaşnikov tərcümə edib. Kalaşnikov təqdimat məqaləsində belə yazır: “Bir zamanlar Azərbaycan şairi Məmməd İsmayılın şeirləri ilə oxucularımız yaxşı tanış idilər. Əsərləri sıx-sıx tərcümə və çap edilirdi. Ümid edirəm ki, insanların taleyini ağrılı düşüncələrlə dilə gətirən, həqiqi ehtirasla nəfəs alan əsərlər yaradan bu böyük və seçgin şairin adı unudulmayıb, unudulmaz da! Həqiqi şeir, gec ya tez, mütləq öz oxucusunu tapır. Şair Türkiyədə yaşayıb-işləsə də, şeirləri qaranquş kimi vətəninə doğru uçar. Bir dəfə Məmməd İsmayıl “ayrılıq dərsi” ifadəsini işlətmişdi. Bütün “ayrılıq dərsləri”, çətinliklər və onların ağrıları onu böyük Azərbaycan və böyük rus şeirindən ayrı sala bilməz...”

Məmməd İsmayılı redaksiya heyətinə üzv seçmiş, Moskvada yayınlanan başqa bir rus jurnalı “Literaturnaya znakomstvo” bu ayda çıxan nörməsindən başlayaraq, hər sayında “Şərqdən baxış” rubrikasında şairimizin köşə yazılarını çap etməyi planlaşdırıb. Həmyerlimizin ilk yazısı dostu – böyük rus şairi Yuri Kuznetsovun Azərbaycana və Şərqə olan sevgisinə həsr edilib. Bundan başqa, jurnalın bu nömrəsində dərginin baş redaktorunun M.İsmayılla müsahibəsinə də yer verilib.

Avrasiya Yazarlar Birliyinin orqanı “Qardaş qələmlər” dərgisi də son nömrəsində şairimizin “Dua”,”Allah unutmur”, “Ey göyərçin, nə gəzirsən pəncərəmin önündə” və “Hələ bir kimsənin yoxdu xəbəri” şeirlərinə yer ayırıb.

Günel

525-ci qəzet.- 2012.- 28 iyun.- S.6.