Ağsuda Aşıq Şakir Günü

USTAD AŞIĞIN 90 İLLİK YUBİLEYİ GENİŞ MƏRASİMLƏ QEYD OLUNUB

AMEA Nizami Gəncəvi adına Milli Azərbaycan Ədəbiyyatı Muzeyinin Aran Regional şöbəsi növbəti dəfə saz-söz həvəskarlarını Ağsu rayonunda bir araya topladı. Soyuq, çiskinli hava, dumana qərq olmuş Ağsu dolayları qonaqların vaxtında məkana çatmağına əməlli-başlı mane oldu. Qonaqların gecikməsi tədbir təşkilatçılarını narahat edirdi. Ancaq dörd saat davam edən tədbirin sonunda bir nəfərin belə zalı tərk etməməsi narahatçılığın əsassız olduğunu, ağsuluların saza, sözə, sənətə məhəbbətini, rayonlarına təşrif buyurmuş qonaqlarına nə qədər hörmətlə yanaşdıqlarını bir daha sübut etdi.

Nəhayət, təyin olunmuş vaxtdan bir az gec qonaqlar və tədbir iştirakçıları Uşaq Bədii Yaradıcılıq Mərkəzində, Aşıq Şakir Otağında yığışdılar. Otaqda Aşığın sazı, geyimi sərgilənir, ifa etdiyi mahnılardan parçalar səsləndirilirdi. Sonra tədbir iştirakçıları ümummilli lider Heydər Əliyevin abidəsi önünə çiçək dəstələri qoyub, tədbirin keçiriləcəyi məkana- Ağsu şəhər mədəniyyət sarayına üz tutdular. Beləliklə, AMEA Nizami Gəncəvi adına Milli Azərbaycan Ədəbiyyatı Muzeyinin Aran Regional şöbəsi və Ağsu rayon icra hakimiyyətinin təşəbbüsü ilə əməkdar mədəniyyət işçisi, aşıq sənətinin görkəmli nümayəndəsi Aşıq Şakir Hacıyevin 90 illik yubileyinə həsr olunmuş tədbir açıq elan edildi. İlk sözü tədbirin aparıcısı AMEA Nizami Gəncəvi adına Milli Azərbaycan Ədəbiyyatı Muzeyinin direktoru, professor Rafael Hüseynov dedi. Qonaqları salamlayaraq bu günün nə qədər əlamətdar olduğundan danışdı, sonra sözü Ağsu rayon icra hakimiyyətinin başçısı Ənvər Seyidəliyevə verdi. Ənvər Seyidəliyev Aşıq Şakirin həyat və yaradıcılığı haqda ətraflı danışdı, qonaqlara xoş arzularını bildrib çıxışını yekunlaşdırdı.

Sonra Milli Məclisin deputatı Ərəstun Cavadov, akademik, əməkdar elm xadimi Vasim Məmmədəliyev, professor Nizaməddin Şəmsizadə, AMEA folklor İnstitutunun şöbə müdiri Elxan Məmmədli çıxış etdilər. Çıxışçılar arasında daha çox yadımda qalan Nizaməddin Şəmsizadə oldu. Şirvan aşıq məktəbini çox sevdiyini qeyd edən professor bir xeyli sürən çıxışında tədbirlə bağlı, aşıq sənəti barədə ikinci bir söz demədi. Əvəzində çıxışını “Qubada hansı qapını döysən, qabağına bir “dövlət” çıxar” – sözlərilə və bizi Qubaya dəvət etməklə bitirdi. Rafael Hüseynov: “Bu çıxışdan sonra mən ancaq Aşıq Əlini səhnəyə dəvət edə bilərəm” – deyib, boylu-buxunlu Əlini səhnəyə dəvət etməsi məclis iştirakçılarının marağına səbəb oldu. Tədbirin bədii hissəsi məclisin ab-havasını tamamən dəyişdi. Xalq artisti Mələkxanım Əyyubova, Xanəndə Mirələm Mirələmov, Nigar Şabanova, Aşıq Yanvar Bədəlov, Aşıq Ağamurad Mərzəngəli, Aşıq Əhliman Şirvanlı, Aşıq Əli Tapdıqoğlu, Aşıq Məhəmməd Şirvanlı bir-birinin ardınca gözəl çıxışlar etdilər. Sonda Aşıq Şakirin oğlu Ağaməhəmməd Hacıyev və nəvəsi Aşıq Babək Şakirli məclis təşkilatçılarına – AMEA Nizami Gəncəvi adına Milli Azərbaycan Ədəbiyyatı Muzeyinin direkoru Rafael Hüseynova, Aran Regional şöbəsinin müdiri Yaqut Bahadurqızıya, Ağsu rayon icra hakimiyyətinə təşəkkürlərini bildirdilər.

Məclis Aşıq Şakirin ifasında səsləndirilən “Şirvan şikəstəsi” ilə sona çatdı.

Nərmin HÜSEYNZADƏ

525-ci qəzet.- 2012.- 31 mart.- S.25.