ADMİU-da VI Beynəlxalq konfrans keçirilib

Hər bir ali təhsil ocağının həyatında elmi-praktik konfransların əhəmiyyəti danılmazdır. Yetər ki, belə tədbirlər mövcud ehtiyacdan doğsun, qarşıda duran problemin həllinə yönəlsin, quru, boğazdan yuxarı sözlər yığınağı yox, elmin, təhsilin inkişafına xidmət etmiş olsun.

Azərbaycan Dövlət Mədəniyyət və İncəsənət Universitetində keçirilən “Mədəniyyət: problemlər və perspektivlər “ adlı doktorant və gənc tədqiqatçıların VI Beynəlxalq konfransı ənənəvi olaraq ölkəmizin ictimai-mədəni həyatında baş vermiş əlamətdar hadisələrə həsr olunmuşdu. ADMİU- nun 90 illik yubileyi ərəfəsində təşkil olunan silsilə tədbirlər sırasında bu tədbirin də öz yeri, öz çəkisi vardı. Konfransın devizi həm sadə idi, həm də düşündürücü. Qloballaşan dünyada milli-mənəvi dəyərlərimizi qoruyaraq mədəni inteqrasiyanın optimal yollarını müəyyənləşdirmək baxımından mövcud baxışları konseptual bir şəklə gətirmək. Məsələyə bu aspektdən yanaşmaq konfrans iştirakçılarının, istərsə də xarici ölkələrdən dəvət olunmuş sahə mütəxəssislərinin ürəyincə idi. Mərasimi giriş sözü ilə açan, həm də konfransı təşkil edib onun gündəliyini tərtib edən Elm və yaradıcılıq işləri üzrə prorektor, professor Maral Manafova tədbirdə iştirak edənləri salamladı, iki gün davam edəcək müzakirələrdə onlara uğurlar dilədi və ADMİU-nun rektoru, professor Timuçin Əfəndiyevin hər bir problemin həllində onlara dəstək olduğunu məmnunluqla qeyd etdi.

Sonra “Ədəbi yaradıcılıq” kafedrasının müdiri, professor Aqşin Babayev, Tədris və tərbiyə işləri üzrə prorektor, professor Rafiq Sadıqov, “Tətbiqi kulturologiya” kafedrasının müdiri, kulturologiya üzrə elmlər doktoru, professor İlqar Hüseynov, “Musiqi sənəti” fakültəsinin dekanı, sənətşünaslıq üzrə fəlsəfə doktoru, dosent Ellada Hüseynova, Tələbə Elmi Cəmiyyətinin sədri Yeganə Əliyeva çıxış edərək hərəsi öz sahəsi üzrə həlli vacib məsələlərdən danışdılar. Konfransın plenar iclası da böyük maraqla ötüşdü. Türkiyə Respublikasının nümayəndələrindən magistrlər Maşidə Nemətlə Adəm Altuntaşın “Azərbaycan və Türkiyə əməkdaşlığı” və “Qarabağ mövzusunun teatr və kinoda əks etdirilməsində ədəbi-bədii problemlər” , İran İslam Respublikasından magistr tələbə Sadiq Barenji Nigar “Fikrət Əmirov və Elmira Nəzirovanın ərəb mövzuları əsasında fortepiano konsertinin bəzi üslub xüsusiyyətləri” mövzusunda məruzələri böyük maraqla dinlənildi. AMEA-nın dissertantı Jalə Məhərrəmovanın, ADMİU-nun magistrı Günəş Cəbrayılovanın mədəniyyət mövzusundakı çıxışları elmi yeniliyi ilə fərqləndilər.

Plenar iclasın sonunda “Musiqi sənəti” fakültəsinin müəllim heyətinin verdiyi kiçik konsert konfrans iştirakçıları tərəfindən heyranlıqla dinlənildi.

İNTİQAM

525-ci qəzet.- 2012.- 1 may.- S.7.