Yazıçı və publisist Pərvinə məktub

Hörmətli Pərvin, qələmindən çıxan yazıları ilk dəfə nə vaxt oxuduğum yadımda olmasa da, iki cəhət yaxşı yadımdadır. Böyük qızımın adını daşımağın və təfəkkürün. “525-ci qəzet”in daimi abunəçisi olduğum üçün yazılarını izləyə bilirəm. Yazılarından hasil etdiyim qənaətlər qədərincədir. Hər şeydən əvvəl sənin təvazökarlığın, müşahidə qabiliyyətin, dünyagörüşün, ədəbiyyatımız və ədəbiyyatşünaslıq elmimizə bələdliyin, yeni söz demək qabiliyyətin, ən mühümü təfəkkürün məni razı salır.

Qəzetinizin bitgin bir əsərə bənzər sayında (3.XI.12) yer alan “Rafiq Yusifoğlunun könül səltənəti” məqalən istisna təşkil etmədi. Mən yaşda olan adamlar bütün yazıları başdan ayağa oxumurlar. Buna ömür də çatmaz. Bir də ki, dəniz suyunun duzlu olduğunu bilmək üçün bir damcı kifayət edir. Sənin bu yazını iki dəfə, özü də diqqətlə oxudum və çox da sevindim. Əvvəla, ədəbiyyatımıza dair biliklərinin haradan qaynaqlandığı mənə məlum oldu. Filoloq olduğun, hətta Azərbaycan Dövlət Pedaqoji Universitetində magistratura pilləsini bitirdiyin (şübhəm yoxdur ki, əla qiymətlərlə) məni daha da sevindirdi. Bu əsassız deyildir. Nə yaxşı ki, mətbuatda xalqımıza, ədəbiyyatımıza vicdanla xidmət edən sənin kimi qələm sahiblərimiz vardır. Xalq yazıçısı Elçinin “səviyyəsiz mətbuat, səviyyəsiz də oxucu yetişdirir” kəlamı böyük həqiqətlərdən söz açır. Məlumdur ki, mətbuat azadlığı və ölkədə bərqərar olan demokratiyadan istifadə edərək indi kimin əlinə qələm keçir, qəzet və ya jurnal buraxır.

Qloballaşmanın qlobal təzadları ilə aləmə meydan oxuduğu, ciddi mənəvi aşınmalara gətirib çıxardığı, Xalq şairi Sabir Rüstəmxanlının doğru olaraq qeyd etdiyi kimi, mətbuatda qeyri-peşəkarlığın tüğyan elədiyi, sözün ucuzlaşdığı, özünü və sözünü bilməyənlərin jurnalistlik iddiası ilə ortaya çıxdığı bir zamanda sizin kimi fədakar jurnalistlərə böyük ehtiyacımız vardır.

Pərvin, qızım, “Rafiq Yusifoğlunun könül səltənəti” adlı məqaləni bir şeir kitabına rəy kimi qiymətləndirmək ən azı insafsızlıq olardı. Bu məqalədə söz açılacaq çox mətləblər vardır.

Ədəbiyyatşünas alim, professor Rafiq Yusifoglunun portretini çox ustalıqla yaratmısan. Rafiq müəllim doktorluq dissertasiyasını mənim 1994-cü ildən üzv olduğum Nizami adına Ədəbiyyat İnstitutunun nəzdində fəaliyyət göstərən Dissertasiya Şurasında müdafiə etdi. Təsdiqini alan kimi onu şuramıza üzv seçdik. Bu faktın özü onun ədəbiyyatşünaslıq sahəsində həqiqi nüfuza malik olduğundan xəbər verir. Rafiq müəllim səmimi və xeyirxah insan, tanınmış şairdir. Sən haqlısan, doğrudan da qafiyə sistemi və ənənəvi mövzulara fərqli yanaşma tərzi, bədii təsvir və ifadə vasitələrindən ustalıqla istifadəsi Rafiq Yusifoğlunun poeziyasının orijinallığını təmin edir.

Hörmətli Pərvin, sən öz dəst-xəttinlə yaşıdların arasında seçilən yazıçı və zamanın tələbini duyan jurnalistsən. Hiss olunur ki, daim öz üzərində işləyirsən. Yazılarında heç vaxt özünü təkrar etməməyin mənə bu qənaətə gəlməyə imkan verir.

Yadındadırsa bir dəfə Yazıçılar Birliyində sənin hədəfə düz dəyən dərin mənalı və məzmunlu çıxışından sonra söz alıb bəyan etdim ki, “525-ci qəzet”in ən arzuolunan, ən çox oxunan qəzetlər sırasında olmasında sənin də zəhmətin və halalca payın vardır. Qəzetinizin redaktoru sənin haqqında ürəkaçan sözlər dedi və bizi məmnun etdi. Həmişə belə təriflərə layiq olasan. Heç vaxt insan əskildən şöhrət xəstəliyinə mübtəla olmayasan.

Yaradıcılığına dərin hörmət bəsləyən, sənə yeni-yeni uğurlar diləyən

4.XI.12

Qəzənfər Paşayev,

Professor

525-ci qəzet.- 2012.- 9 noyabr.- S.12.