Firəngiz Əlizadənin əsərləri Venesiyada ifa olunub

Azərbaycan Bəstəkarlar İttifaqının sədri, bəstəkar Firəngiz Əlizadənin əsərləri Venesiyada 46-cı dəfə keçirilən “Asiago-2012” musiqi festivalında səsləndirilib.

525.az-ın məlumatına görə, bəstəkarın əsərləri “Composer-in-residence” (əsərlərinə üstünlük verilən bəstəkar) statusuna layiq görülüb. Bundan başqa, Norveçin Oslo, Tronheym və Stavanger şəhərlərində də bəstəkarın əsərləri ifa edilib.

F.Əlizadə Asiago şəhərinin meriyasında keçirilən mətbuat konfransında jurnalistlərin çoxsaylı suallarına cavab verib. Festivalın prezidenti Roberto Brattsale vurğulayıb ki, F.Əlizadə İtaliyada ilk dəfə 1976-cı ildə çıxış edib. Həmin vaxt o, Rossininin vətəni Pezaro şəhərində özünün Alban Berqin xatirəsinə “fortepiano üçün sonatasını” məharətlə səsləndirib. F.Əlizadənin musiqisi İtaliyada, məşhur Roma ansamblı “Alter Ego”nun ifasında dəfələrlə dinləyicilərə təqdim edilib. Sonralar o, violonçel ifaçısı Elizabet Vilsonun rəhbərlik etdiyi “Xenia” instrumental kvarteti ilə birlikdə Turin, Milan və Florensiyada qastrol səfərlərində olub.

GÜNEL

525-ci qəzet.- 2012.- 4 sentyabr.- S.7.