Elçin Mirzəbəylinin “Poz bu sükutu” kitabının Yazıçılar Birliyində təqdimatı olub

Bu gün Azərbaycan Yazıçılar Birliyinin “Natəvan” klubunda jurnalist, publisist və şair, “Xalq Cəbhəsi” qəzetinin baş redaktoru Elçin Mirzəbəylinin “Poz bu sükutu” adlı kitabının müzakirə və imza günü keçirilib.

Publika.Az-ın məlumatına görə, təqdimat mərasimini giriş sözü ilə AYB – nin Gənclər üzrə katibi, “525 – ci qəzet”in baş redaktoru Rəşad Məcid açıb. Rəşad Məcid bir qədər nostalji hislər doğuran məqamlara toxunaraq “Ağdama gedən qatar” şeirinin yazılma tarixçəsini danışıb. O, bir qədər də kitabla bağlı fikirləri ilə bölüşüb.

Daha sonra AYB-nin Gənclər üzrə katibi sözü tənqidçi Əsəd Cahangirə verib. Tənqidçi Əsəd Cahangir Elçin Mirzəbəylinin “Poz bu sükutu” adlı kitabında toplanan şeirlər haqqında tədbir iştirakçılarına geniş məlumat verdikdən sonra son dövrlərdə ədəbi mühitdə gedən proseslərə də toxunub.

Daha sonra söz AYB – nin katibi, şair Fikrət Qocaya verilib. Fikrət Qoca Elçin Mirzəbəyli yaradıcılığı ilə tanış olduğunu, həmçinin indiki zamanda insanları şeirlə təəccübləndirməyin çətin olduğunu deyib: “ Fikrət Qoca öz çıxışında qeyd edib ki, Elçin Mirzəbəyli isə öz poeziyası ilə nəinki təəccübləndirir, hətta həyata, mübarizəyə, fərqli fikirləri aşılamağa səsləyir: “Amma məni narahat edən bir məqam da var ki, belə gözəl və səmimi şeirlər yazan Elçin Mirzəbəyli son illər nədənsə şeir yazmaqdan qaçır, qələmini daha çox publisistikada sınayır. Amma buna baxmayaraq publisistika da şeirləri kimi gözəldir”.

AYB katibi Arif Əmrahoğlu və tənqidçi Bəsti Əlibəyli öz çıxışlarında Elçin Mirzəbəylini həm köhnə, həm də yeni nəslin qəbul etdiyi şair, poeziya və publisistika adamı kimi dəyərləndiriblər.

Daha sonra çıxış edən şair Abbas Abdulla Acaloğlu, şairə Rəsmiyyə Sabir, Tərxis Olunmuş Hərbçilərin Gəncləri Maarifləndirmə İctimai Birliyinin sədri Emin Həsənli, Yeni Yazarlar və Sənətçilər Qurumunun sədri, “kitabxana.net” saytının rəhbəri, yazıçı-kulturoloq Aydın Xan Əbilov, şair Balayar Sadiq Elçin Mirzəbəylinin bu gün ədəbi mühitdə, öz fərqliliyi, öz dəsti – xətti ilən seçilən bir şair və publicist olduğunu qeyd ediblər.

Sonda çıxış edən şair Elçin Mirzəbəyli tədbir iştirakçılarına, dəyərli fikirləri ilə bölüşən hər kəsə öz dərin təşəkkürünü bildirib. Təqdimat mərasimi Elçin Mirzəbəylinin “Poz bu sükutu” kitabındakı lirik şerlərdən kiçik parçalar söyləməsi ilə başa çatıb.

Həmçinin qeyd edək ki, kitabda şair Elçin Mirzəbəylinin müxtəlif illərdə yazdığı şeirlər, esselər və publisistik məqalələrdən seçmələr yer alıb.

Mürvətqızı Sevinc

525-ci qəzet.- 2012.- 27 sentyabr.- S.7