“Media ilə yüksək səviyyəli əlaqələr qurmaq üçün gərək piar meneceri də öz işinin peşəkarı olsun”

“BAKI PARK BULVAR”ın PİAR MENECERİ GÜNAY MALİKQIZI:“GÖRDÜYÜMÜZ İŞLƏRİN CƏMİYYƏT ARASINDA TƏBLİĞ EDİLMƏSİ VƏ MAARİFLƏNDİRMƏ İŞLƏRİNİN APARILMASINDA JURNALİSTLƏRİN BÖYÜK ƏMƏYİ VAR”

Azərbaycan teleməkanında bir sıra tanınmış jurnalistlər var ki, bəzi gənc həmkarları onlara müxtəlif rakursdan yanaşaraq, özlərinə örnək sayırlar. Peşəkarlıq səviyyələrinə, təqdimata görə bir-birlərindən fərqlənən tanınmış telejurnalistlər həm də çalışdıqları telekanalların imicini formalaşdırırlar desək, yanılmarıq. Nahaq yerə “yaxşı jurnalist, yaxşı aparıcı televiziyanın üzüdür” demirlər. Teleməkanda öz sözünü demiş aparıcılar izləyicilərin sevimlisinə çevrilir və həmişəlik onların yaddaşında qalır.

Tamaşaçıların rəğbətini qazanmış, xəbərləri özünəməxsus şəkildə təqdim edən belə aparıcılardan biri də Günay Malikqızıdır. Bir müddətdir ki, televiziyadan ayrılmasına baxmayaraq özünün də söylədiyi kimi yolda rastlaşdığı insanlar hələ də onu televiziya aparıcısı kimi xatırlayırlar.

G.Malikqızı 1995-ci ildə Bakı Dövlət Universitetinin jurnalistika fakültəsini bitirib. Jurnalist kimi fəaliyyətə də elə həmin ildən başlayıb. İlk olaraq “Virtuoz” teleradio kompaniyasında idman müxbiri kimi çalışıb. Sonra “Space” və “Lider” telekanallarında xəbər aparıcısı kimi fəaliyyətini davam etdirib. Hazırda isə “Bakı Park Bulvar” Ticarət Mərkəzinin piar meneceri vəzifəsində çalışır.

G.Malikqızının sözlərinə görə, o, “Space”telekanalına müsabiqə yolu ilə qəbul olunub: “Müsabiqədə iştirak edən 365 nəfər içərisindən cəmi beş nəfər seçilmişdi ki, onlardan da biri mən idim. O vaxt mənin 19 yaşım var idi. Bu kanalda ana xəbər buraxılışının aparıcısı kimi 7 il çalışdım. Sonra “Lider” telekanalına keçdim və kanalın Xəbərlər Departamentində aparıcı və redaktor kimi fəaliyyətimi davam etdirdim.

G.Malikqızı deyir ki, jurnalist peşəsi çox zəhmətli, insandan böyük güc, qüvvət tələb edən bir peşədir: “Bizim işimiz özünə qarşı həqiqi sevgi tələb edir. Ancaq qəlbində jurnalistikaya böyük sevgisi olan insan bu peşəni seçə bilər. Məni jurnalistikaya böyük sevgi bağlayır, mən peşəmin vurğunuyam. Jurnalistika peşəkarlıq, cəsarət, zəhmət tələb edir. Bu işdə ya yaxşı peşəkarsan, ya da ümumiyyətlə yoxsan. Peşəkarlıqla yanaşı, aparıcının aydın, rəvan, səlist danışıq tərzi olmalıdır ki, informasiyanı tamaşaçıya olduğu kimi çatdıra bilsin. Mən televiziya aparıcısı kimi 15 il fəaliyyət göstərmişəm. Bu az bir müddət deyil. Deməli peşəmə sevgi məni 15 il efirdə saxlayıb. Sual oluna bilər ki, necə oldu ki bu qədər sevdiyim aparıcılıqdan, efirdən uzaqlaşdın. Əslində bu suala mən özümdə indi də cavab tapa bilmirəm. Hər şey 3 gün ərzində baş verdi. cvimi göndərdim və 3 günə işə götürüldüm. Düşünürəm ki, piar-meneceri vəzifəsi mənə maraqlı gəldiyi üçün bu addımı atdım. Mən “Lider”dən dostcasına ayrılmışam. “Lider”dən, efirdən öz istəyimlə uzaqlaşmışam. Mən hər zaman “Lider”də özümə qarşı hörmət, sevgi görmüşəm. Öz növbəmdə mən də bu kanalda çalışan əməkdaşlarıma və digər çalışanlara sevgilə, hörmətlə yanaşmışam. Mən işdən çıxacağımı deyəndə bu xəbər hər kəs tərəfindən təəccüblə qarşılandı. Çünki mən artıq 7 ilidi ki, burada çalışırdım və işdən uzaqlaşmağım üçün heç bir ciddi səbəb yox idi. Həmkarlarım çoxu kanaldan getməyimi istəməsə də seçimimə hörmətlə yanaşdılar. Hər kəs mənə deyirdi ki, sən peşəkar aparıcı kimi özünü teleməkanda çoxdan təsdiq etmisən, biz əminik ki, piar-meneceri kimi də təsdiqləyəcəksən. Artıq üç aya yaxındır ki, mən kanaldan uzaqlaşmışam. Ancaq bügün də “Lider”dəki əməkdaşlarımla mütəmadi ünsiyyətdə oluram, tez-tez görüşüb söhbətləşirik”.

G.Malikqızının sözlərinə əsasən, həyatda və işində qazandığı uğurlarda ailəsinin rolu böyükdür: “Doğurdan da ailə qadın üçün çox önəmlidi. Mənim üçün də ailə çox önəmlidir və birinci yerdədir. Hər bir qadının onu başa düşən, anlayan, dəstək olan həyat yoldaşına ehtiyacı var. Mən piar-meneceri kimi işə başlayanda ailəmdən, anamdan, həyat yoldaşımdan böyük dəstək gördüm. Onlar bügün də mənə böyük dəstəkdirlər”.

G.Malikqızı bildirib ki, artıq xeyli vaxtdır ki, “Bakı Park Bulvar” Ticarət Mərkəzinin piar meneceri vəzifəsində işləyir: “Piar plüralist cəmiyyətlərdə müxtəlif təşkilatlar və insan qrupları arasında qarşılıqlı anlaşmaya yardım edən qərarların qəbul edilməsinə və cəmiyyətin daha effektiv fəaliyyət göstərməsinə xidmət edir. Piar meneceri olaraq mənim əsas vəzifəm Ticarət Mərkəzində təşkil olunan tədbir və aksiyaları mətbuat vasitəsilə ictimaiyyətə çatdırmaqdır. Həmçinin “Park Bulvar”in daim ictimaiyyətin diqqət mərkəzində olması və bu məqsədlə KİV-də Ticarət Mərkəzi haqda məlumatların yerləşdirilməsinə xidmət etmək. Piar-meneceri işi bir qədər fərqli işdi. Aparıcı olan zaman mən böyük bir komanda ilə çalışırdım. Ancaq burda işi yalnız mən icra edirəm, bütün məsuliyyət mənim üzərimdədi. Düzünü deyim ki, piar-meneceri olmaq o qədər də asan iş deyil. Bu işin də öz çətinlikləri var. Ancaq mən bu çətinlikləri rahatlıqla aşır və işimin öhdəsindən məharətlə gəlirəm. Bu iş mənim çox xoşuma gəlir, olduqca maraqlı bir işdi. Bəlkə də piar meneceri olmağı ilk gündən çox sevdiyim üçün bu çətinliklər mənə asan gəlir. Bizim fəaliyyətimizdə KİV əməkdaşları ilə yaxşı əlaqələrin qurulması başlıca məqsədlərdən biridir. Çünki gördüyümüz işlərin cəmiyyət arasında təbliğ edilməsi və maarifləndirmə işlərinin aparılmasında jurnalistlərin böyük əməyi var. Biz də bunu nəzərə alaraq fəaliyyətə başladığımız ilk vaxtlardan etibarən bu əməkdaşlığı ən yaxşı şəkildə davam etdirmək məqsədilə bir sıra layihələr həyata keçirmişik. Mətbuatla əlaqələrimiz daha çox qarşılıqlı işgüzar münasibətlərə söykənir. Biz hər bir KİV-in, hər bir jurnalistin sorğusunu cavablandırırıq və ya əlaqədar şəxslərlə birləşdiririk. Jurnalistlərlə mütəmadi olaraq əlaqə saxlayır, tədbirlər zamanı görüşürük. Mən hər zaman çalışıram ki, tədbirlər zamanı mətbuat nümayəndələrinin yanında olum, onları maraqlandıran suallara cavab verim. Bu əməkdaşlığımız getdikcə səmimi tanışlığa çevrilir”.

G.Malikqızı deyir ki, əsas prinsipimiz KİV-lə əlaqələri peşəkar səviyyədə qurmaqdır: “Media ilə yüksək səviyyəli əlaqələr qurmaq üçün gərək piar meneceri də öz işinin peşəkarı olsun. Media ilə uğurlu əməkdaşlıq üçün piar menecerindən çox keyfiyyətlər tələb olunur, bunun ən əsası peşəkarlıqdır: “Piar meneceri çox məsuliyyətli və vacib vəzifədir. Çünki bizim işimizdə qarşılıqlı əlaqə prinsipi var. Piar meneceri təmsilçisi həm təmsil etdiyi qurumun mənafeyini unutmamalı, həm də həmkarlarla işgüzar əməkdaşlığı qorumalıdır. KİV-lə əməkdaşlığın əsasında peşəkarlıq keyfiyyətləri başlıca meyar kimi dayanır. Əksər KİV nümayəndələri bu məsələdə çox tələbkardırlar və biz də bunu mütləq nəzərə almağa çalışırıq. Amma hərdən qeyri-peşəkar səviyyəli, təmsil etdiyi KİV-in adını doğrultmayan media nümayəndələrilə də rastlaşırıq. Bütün bunlara baxmayaraq, biz peşəkar jurnalistlərlə hər zaman yüksək səviyyədə öz işimizi qurmağa can atırıq”.

Piar menecerinin dediyinə görə, ötən il “Bakı Park Bulvar” Ticarət Mərkəzində bir-birindən maraqlı tədbirlər təşkil olunub və bütün bunlar mediada lazımi səviyyədə işıqlandırılıb:

G.Malikqızı vurğulayıb ki, “Park Bulvar”ın fasebook səhifəsinin daim yenilənməsi və üzvlərinin sayının artması da əsas məqsədlərdəndir. “Park Bulvar”ın internet səhifəsinə də diqqət artırılıb. Saytda mütəmadi olaraq xəbərlər 3 dildə yenilənir. Hər gün mərkəzin internet səhifəsini çoxlu sayda insan daxil olur. Hər kəs mərkəzdə keçirilən tədbirlər və aksiyalar haqda məlumat əldə etməyə çalışırlar. Bu da bizi çox sevindirir”.

Gələcək planlarından, piar meneceri kimi görəcəyi işlərdən söz açan G.Malikqızı vurğulayıb ki, KİV nümayəndələri ilə əməkdaşlıq əlaqələrini daha da genişləndirmək fikrindədi: “Mərkəzdə təşkil olunan bütün tədbirlər, aksiyalar KİV-də işıqlandırılır. Mətbuatda, televiziyada mərkəzin fəaliyyətinin işıqlandırılma səviyyəsi məni qane edir. Ancaq mən əməkdaşlıq etdiyim telekanalların, radioların, informasiya agentliklərinin, qəzetlərin sayını artırmaq fikrindəyəm. İstəyirəm ki, mərkəzin keçirdiyi bir-birindən maraqlı tədbir və aksiyalar ölkədə fəaliyyət göstərən bütün KİV-də işıqlandırılsın. Bununla yanaşı biz qarşıdakı günlərdə maraqlı və fərqli mövzuları əhatə edən tədbirlər keçirməyi düşünürük. Planlar, layihələr çoxdu. Hazırda onların icrası istiqamətində işlər görürük”.

Sevinc QARAYEVA

525-ci qəzet.- 2012.- 11 yanvar.-S.6.