Türkər Qasımzadə beynəlxalq müsabiqə qalibləri arasında

Bu yaxınlarda istedadlı musiqiçi Türkər Qasımzadə özünün bəstəkarlıq yaradıcılığında daha bir önəmli uğura imza atıb. Onun Amerikada fortepiano üçün yazdığı musiqi “Composer’s Voice: Fifteen-Minutes-of-Fame” (Bəstəkarın səsi: On beş şöhrət dəqiqəsi”) seriyasından keçirilən beynəlxalq müsabiqənin münsifləri tərəfindən bəyənilərək fevralın 12-də Nyu Yorkda təşkil olunacaq konsert proqramına daxil edilib. O, dünyanın müxtəlif ölkələrindən müsabiqəyə qatılan 60 musiqiçi arasından seçilərək, 15 tanınmış bəstəkardan ibarət qrupda yer alıb. T.Qasımzadə yeni əsərinə Pablo Nerudanın “Gələcəyin boşluğu” şeirindən seçdiyi sətirlərlə quruluş verərək, bunu rəmzi bir musiqi şərhi kimi təqdim edir. “15-lər”in əsərlərini istedadlı pianoşu Shiau-uen Ding səsləndirəcək.

Türkər Qasımzadə Nyu York Konservatoriyasının məzunu olaraq hazırda Heydər Əliyev Fondunun dəstəyilə ABŞ-ın Ohayo ştatında, Sinsinnati Universitetinin bəstəkarlıq üzrə doktoranturasında təhsilini davam etdirir.

525-ci qəzet.- 2012.- 12 yanvar.- S.7.