Rahim Sadıqbəyli: “Araz TV”nin fəaliyyətini bərpa etmək ölkəmizin təbliği baxımından vacibdir”

Müsahibimiz İsveçdə yaşayan soydaşımız, ixtisasca rejissor olan Rahim Sadıqbəylidir. R.Sadıqbəyli 2010-cu ildə İsveçin 3-cü böyük şəhəri olan Linköping bələdiyyəsində web tv prodüseri və 2011-ci ildən İctimai Tədris kanalı olan R-də süjetlər prodüseri kimi fəaliyyətdədir. Ötən ilin sonlarında İsveçdə ilk dəfə olaraq onun təşəbbüsü ilə swedenaz.se saytı fəaliyyətə başlayıb. Onunla söhbətə bu saytın hansı məqsədlə yaradılması ilə başladıq.

–Saytın əsas məqsədi həmyerlilərimizin İsveç həyatında daha fəal iştirakına yardım edib, onların problemləri ilə yaxından tanış olmaqdır. Saytı həm şəxsi hesabıma və həm də texniki imkanlarım hesabına yaratmışam. Hər gün sayta ən azından 10-15 nəfər insan baxır. “Twitter”də və “Facebook”sosial şəbəkələrində də saytın öz səhifəsi var.Eyni zamanda ötən ilin iyun ayında “Araz TV” fəaliyyətə başlayıb. “Araz TV” Azərbaycan və “Online WebTV” artıq 1 ildən çoxdur ki, qeydiyyatdan keçib. Hətta burda lisenziya da almışıq. Əvvəl sayt düzəltdim və bir neçə vaxt canlı yayım etdim. Amma sonra bu işə çox maraq görmədim. Öz şəxsi vəsaitim hesabına bu iş çox getmədi və ona görə dayandırmaq məcburiyyətində qaldım. Amma lisenziya və professional kollektivimiz var. Nə vaxt maddi vəsait olarsa, onda TV yenidən fəaliyyətə başlayacaq. Görünür, bu gün Avropada Azərbaycan TV-sinin olması kimlərisə narahat edir. Baxmayaraq ki, bizim fikrimiz burda heç bir siyasi ambisiyalı olmayan ictimai və tanıtım TV idi. Hətta verilişlərimizin yarıdan çoxunu həm isveç , həm də ingilis dilində efirə verməyi planlaşdırmışdıq. Çünki çox zamanlar Azərbaycanda olduğu kimi burdakı təşkilatlarımız da özümüz üçün nəzərdə tutulmuş proqramlar və tədbirlər edirlər.

–İsveçdə hazırda rejissoru kimi fəaliyyətinizi davam etdirirsinizmi?

–Onu deyim ki, gələn gündən həm dil öyrənmişəm, həm də ayrı-ayrı kurslara getmişəm. Artıq 6 aydır ki, İsveçin İctimai Tədris Kanalında süjetlər prodüseri kimi fəaliyyət göstərirəm. İlk dəfə fəaliyyət göstərdiyim “Dünya dilləri” proqramında Cənubi Azərbaycandakı soydaşlarımızın dil haqlarının pozulması haqqında süjet efirə getdi. Bu vaxta qədər iki povest və üç kinossenari yazmışam. Povestlərimin biri alman, o biri isveç dilindədir. Kinossenarilərimin ikisi isveç, biri isə azərbaycan dilindədir. Azərbaycanca olan ssenari müasir həyatımızdan tarixə bir səyahətdir. Məşhur “Əli və Nino” əsərinin motivləri əsasında 30 seriyalı bir televiziya filminin ssenarisidir. Hadisələr müasir dövrdə Stokholmdan başlayır və sonra qəhramanlardan biri bizi Bakıya və Tiflisə səyahətə apararkən , 19-cu əsrlərin sonu 20-ci əsrlərin əvvəllərindəki “Əli və Nino” dastanı nəql edilir. Ssenarinin adı “Avropa və Asiya şəhəri” adlanır. Hazırda Nobellərin Bakı fəaliyyəti haqqında çox maraqlı bir kitab oxuyuram. Bu İsveç yazıçısı Brita Osbinkin “Ludvig Nobel: Neft üfüqdə görünən işıqlı gələcəkdir” adlı tarixi essesidir. Faktlar əsasında yazılmış əsərdir. Amma mən yeni bir kinoroman yazmağı düşünürəm. Mənbə kimi həm bu əsərdən, həm də o dövrdən bəhs edən başqa əsərlərdən istifadə etməyi planlaşdırıram. Artıq eskizlər yavaş-yavaş canlanmaq üzrədir.

–Siz Azərbaycan Federasyonu İsveç Təşkilatında təmsil olunursunuz. Bu barədə nə deyə bilərsiniz?

–Biz nəinki AFİ-nin, hətta burda fəaliyyət göstərən Azərbaycan, Türk və başqa millətlərin də dərnək və federasiyaları ilə əməkdaşlıq edirik, elə məhz 20 Yanvarda “Yeni Azərbaycan” dərnəyinin təşəbbüsü ilə keçiriləcək “20 Yanvar”a həsr olunmuş ədəbi-bədii gecənin ssenarisini və aparıcılığını öz boynumuza götürmüşük. Bu proqramı mən və professional teleaparıcı, artıq bir neçə ildir ki, İsveçdə yaşayan Sevinc Abbasova ilə birlikdə aparacağıq.

Düşünürəm ki, xaricdə yaşayan hər bir soydaşımız Azərbaycanın tanıdılması, həqiqətlərimizin təbliği üçün çalışmalıdır. Yuxarıda qeyd etdiyim kimi, “Araz TV” məhz buna xidmət etmək əzmində idi. Baxın, keçən ilin sonunda İsveçin SVT ictimai kanalı “Avroviziya”dan qabaq Azərbaycandan bir 30 dəqiqəlik proqram elədi. Proqramda Bakı barədə mənfi məqamlar yer almışdı. Əgər siz swedenaz.se saytına baxsanız, mən o proqramın həm qısa məzmununu və həm də tam videosunu qoymuşam. Bir il öncə mən İHA-nın (İhlas Haber Agentliyi) Skandinaviya nümayəndəsi Mətin Altın İşıkla birlikdə bir proyekt yazıb, həm səfirliyə, həm də Diaspor Komitəsinə verdim. Amma hələ də xəbər yoxdur. Bizim proyektə görə İsveçdə akkreditasiya olan müxtəlif ölkələrdən 20-ə qədər jurnalist Bakıya gəlib, ordan reportajlar hazırlamalıydılar. Bilirsiniz, hərdən mən öz-özümə sual verirəm “Niyə kürdlərin, suriyanilərin, assurilərin elə götürək ermənilərin diasporları belə güclüdür? Axı onların heç dövlətləri belə yoxdur , düzdür, ermənilərin dövləti var, amma inanmıram ki, hökumətləri onlara yardım edir. Biz diaspora sahəsində daha da güclənməliyik.

–Azəri diasporunun genişlənməsi üçün sizcə, nə kimi addımların atılması zəruridir?

– Düşünürəm ki, vətənimizə pul və gəlir mənbəyi kimi baxmamalıyıq. Hər kəs fikirləşməlidir, vətən bizim nəyimizə lazımdır? Axı vətənimiz olmasa biz nəyə, kimə lazımıq? Məşhur filmdə deyildiyi kimi, “Biz anasız böyüyə, yaşaya bilmərik. Bizim hamımızın bir anamız var, o da Vətəndir. Vətənsiz olmaq bayaq saydığım toplumlar kimi, anasız-atasız olmaqdır. Yetim olmaqdır. Yetimə isə gəl-gəl deyən çox olar. Hər yerdə yad olarsan.

Pərvanə

525-ci qəzet.- 2012.- 31 yanvar.- S.5.