Tanınmış şair Təvəkkül Yanarın xatirəsi anılıb

Ağcabədidə tanınmış şair, istedadlı qələm sahibi Təvəkkül Yanarın xatirəsinə həsr olunmuş mərasim keçirilib. Mərasim rayon icra hakimiyyətinin və təhsil şöbəsinin təşəbbüsü ilə şairin doğulduğu Rəncbərlər kəndində təşkil olunub. Tədbirə rayon ağsaqqalları, ziyalılar, təhsil işçiləri, şairin qələm dostları, ailə üzvləri, yerli icra hakimiyyəti və bələdiyyə nümayəndələri, media mənsubları qatılıb.

Mərhum şairin vaxtilə işlədiyi Rəncbərlər kənd orta məktəbinin direktoru İsmayıl Həsənov yığıncağı giriş sözü ilə açaraq qonaqları, bütün iştirakçıları salamlayıb. Unudulmaz şair Təvəkkül Yanarın həyat və yaradıcılığından ətraflı söz açan natiq qeyd edib ki, əyalətdə yaşamağı üstün tutan şair özünəməxsus yaradıcılıq yolu, dəsti-xətti olan sənətkar kimi xalqın sevgisini və hörmətini qazanıb. Onun ilhamla qələmə aldığı yüksək bədii dəyərə, tərbiyəvi əhəmiyyətə malik şeirləri həmişə seilə-sevilə oxunub, kitabları nəşr olunub, sözlərinə mahnılar bəstələnib. Təsadüfi deyildir ki, şairin qələmə aldığı “Heydər” poeması geniş şöhrət tapıb, “Axtar Qarabağda, gəz Qarabağda” adlı qəzəli dillər əzbərinə çevrilib, xanəndələrin ifasında tez-tez səsləndirilib.

Gözəl ailə başçısı, səriştəli pedaqoq olan Təvəkkül Yanar bölgənin ictimai-siyasi həyatında, gənc nəslin təlim-tərbiyəsində, yeni yazarların üzə çıxarılmasında və yetişdirilməsində, ədəbi mühitin formalaşmasında fəal rol oynayıb. Şairin anım mərasiminin keçirilməsinin mühüm əhəmiyyət kəsb etdiyini vurğulayan İ.Həsənov tədbirin təşkilatçılarına öz təşəkkürünü bildirib. Rayon ağsaqqallar şurasının sədri Qəni Cəfərov, təhsil şöbəsinin müdiri Mehdi Əhmədov, “Qaçqınkom”un bölgə üzrə nümayəndəsi Səyyaf Qafarov, kənd ziyalıları Adil İsmayılov, Eldar Quliyev, şair Dilarə Cabbarlı, Rəncbərlər məktəbinin müəllimi Yusif Bağırov, rayon icra hakimiyyəti başçısının müavini Əbülfət Tapdıqov və başqaları çıxış edərək Təvəkkül Yanar yaradıcılığının bədii dəyərindən, sənətkarlıq xüsusiyyətlərindən və əhəmiyyətindən söz açıb, onun haqqında xoş xatirələrini danışıblar. Tədbir iştirakçılarına Təvəkkül Yanarın sözləri əsasında tərtib olunmuş musiqili-ədəbi kompozisiya təqdim olunub.

Rəncbərlər kənd məktəbi şagirdlərinin söylədikləri şeirlər, muğam ustası Zülfiyyə Yusifovanın, gənc ifaçılar Elgiz Muradov, Elvin Nağıyev, Elmurad Mirzəliyev, Cəfər Qurbanov, Bəhruz Usubov, Habil Ağayev, Xəyalə İsmayılovanın məharətlə oxuduqları “Şur”, “Segah” muğamları, təsniflər “Qarabağ şikəstəsi”, “Uca dağlar”, “Sarı gəlin” və sair mahnılar tamaşaçılara xoş ovqat, yüksək əhval-ruhiyyə bəxş edib. Sonda şairin qardaşı oğlu, fəlsəfə elmləri namizədi Mahir Səlimov çıxış edərək keçirilən tədbiri şeirə, ədəbiyyata verilən yüksək qiymət kimi dəyərləndirib, buna görə Təvəkkül Yanarın ailəsi adından rayon icra hakimiyyətinə və təhsil şöbəsinə dərin təşəkkürünü və minnətdarlığını bildirib.

Yəhya PAŞAZADƏ

525-ci qəzet.- 2013.- 5 aprel.- S.7.