Xalq yazıçısı Elçinə

“Aydınlı gecələr” hekayəsinin müəllifinə

Yarpaq bitər yaşıl-yaşıl,

Qonar budağa quş kimi.

Kimi baxar naşı-naşı,

Kimi görər bihuş kimi.

Kimi ömrün manqalına

Xeyirdən çır-çırpı atar.

Kimi şərin tonqalında

Özünü yandırıb yaxar.

Nəfsi, qəlbi möhürlüysə

Pislikdən yorulmaz biri.

Kimi alçaq könüllüysə

Anlayar sonsuz Xeyiri.

Su axdıqca dolar səhəng,

Uşaqla uçar çərpələng,

Yaşayar adam, kəpənək

Bütöv bir ömrü hər biri.

Yarpaq qopar sarı-sarı,

Düşər torpağa quş kimi.

Naşı görməz gözəl Yarı,

Aşıq sevər sərxoş kimi

SƏLİM BABULLAOĞLU

525-ci qəzet.- 2013.- 27 aprel.- S.16.