Mədəniyyət və Turizm Nazirliyində UNESCO-nun Bakıda keçirdiyi tədbirin yekunları müzakirə edilib

Mədəniyyət və Turizm Nazirliyində UNESCO-nun Qeyri-Maddi Mədəni İrsin Qorunması üzrə Hökumətlərarası Komitəsinin Bakıda keçirilmiş 8-ci sessiyasının yekunlarına həsr olunmuş iclas olub. Nazirliyin mətbuat xidmətindən "525"ə verilən məlumata görə, əlaqədar dövlət qurumları və təşkilatlarının nümayəndələrinin iştirak etdikləri iclasda çıxış edən mədəniyyət və turizm naziri Əbülfəs Qarayev belə genişmiqyaslı, beynəlxalq səviyyəli tədbirə ölkəmizin ev sahibliyi etməsinin Azərbaycan Respublikasının Prezidenti İlham Əliyevin rəhbərliyi ilə həyata keçirilən məqsədyönlü siyasətin nəticəsi, ölkəmizin beynəlxalq miqyasda artan nüfuzunun göstəricisi olduğunu diqqətə çatdırıb: "Tədbirdən sonra qonaqlar, UNESCO Komitəsi, katiblik sessiyanın çox yüksək səviyyədə təşkil olunduğunu, ölkəmizdə böyük qonaqpərvərliklə qarşılandıqlarını söyləyib, yüksək səviyyədə təşkilatçılığa görə Azərbaycan Respublikasının rəhbərliyinə təşəkkür ediblər. Azərbaycanda keçirilən silsilə beynəlxalq tədbirlər ölkəmizi dünyada tolerantlıq və mədəniyyətlərarası dialoq mərkəzinə çevirib. UNESCO-nun Qeyri-Maddi Mədəni İrsin Qorunması üzrə Hökumətlərarası Komitəsinin 8-ci sessiyasında iştirak etmək üçün 793 nəfər qeydiyyatdan keçib. Bu mötəbər beynəlxalq tədbirdə 116 ölkədən 611 nəfər (katibliklə birlikdə) iştirak dib. Ümumilikdə tədbirin iştirakçılarının ümumi sayı (Azərbaycan tərəfi ilə birlikdə) 900-ə yaxın olub və budəfəki sessiya UNESCO-nun Qeyri-Maddi Mədəni İrsin Qorunması üzrə Hökumətlərarası Komitənin tarixinə ən çox iştirakçı sayı olan iclas kimi düşüb. Sessiyada Təcili Qorunmaya Ehtiyacı Olan Qeyri-Maddi Mədəni İrs Siyahısına salınmaq üçün 12 nominasiya irəli sürülüb və cəmi 4 ölkənin - Azərbaycan, Qvatemala, Monqolustan və Uqandanın nominasiyaları siyahıya salınıb. Bəşəriyyətin Qeyri-Maddi Mədəni İrsinin Reprezentativ Siyahısına salınmaq üçün 31 nominasiya irəli sürülüb və onlardan 25-i qəbul olunub. Hökumətlərarası Komitənin Bakı sessiyası, həmçinin təşkilatın Qeyri-Maddi Mədəni İrsin Qorunması üzrə Konvensiyasının 10 illik yubileyinə təsadüf etməsi ilə əlamətdardır. Sessiya Azərbaycanda internet vasitəsilə onlayn yayımlanan ilk beynəlxalq tədbirdir və gündəlik izləyicilərinin sayı UNESCO Hökumətlərarası Komitəsinin əvvəlki sessiyalarından iki dəfə artıq - gün ərzində 14300 nəfər olub. UNESCO-nun Qeyri-Maddi Mədəni İrsin Qorunması üzrə Hökumətlərarası Komitəsinin Bakıda keçirilmiş 8-ci sessiyasının ölkəmiz üçün ən mühüm nəticələrindən biri xalqımızın qeyri-maddi mədəni irsində mühüm yeri olan, çövkənin - Azərbaycan Respublikasının ənənəvi Qarabağ atüstü oyununun Təcili Qorunmaya Ehtiyacı Olan Qeyri-Maddi Mədəni İrs Siyahısına daxil edilməsidir".

Sessiyanın ölkəmizin mədəni həyatı, beynəlxalq münasibətləri, o cümlədən UNESCO kimi mötəbər təşkilatla qarşılılıqlı səmərəli əməkdaşlığının inkişafı baxımdan mühüm əhəmiyyətini vurğulayan nazir, tədbirin yüksək səviyyədə təşkilində və uğurla həyata keçirilməsində əməyi olan ilə hər kəsə minnətdarlığını bildirib.

S.ABDULLAYEVA

525-ci qəzet.- 2013.- 12 dekabr.- S.7.