Məhsəti Gəncəvinin 900 illiyi Fransanın Miluz
şəhərində qeyd olunub
Heydər
Əliyev Fondunun təşkilatçılığı və Azərbaycanın Fransadakı səfirliyinin
dəstəyi ilə Miluz şəhərində
ilk Azərbaycan şairəsi
Məhsəti Gəncəvinin
yaradıcılığının 900 illiyinə həsr olunmuş sərgi və konsert təşkil edilib.
Fransadakı səfirliyimizdən verilən
məlumata görə,
Miluzun Tanpl San-Etyen kilsəsində təşkil olunan konsertin aparıcısı
Alen Tremoliyer Qafqazın mirvarisi olan Azərbaycanın Cənubi Qafqazda qədim İpək Yolunun üzərində, Şərq ilə Qərb arasındakı strateji qovşaqda yerləşdiyini, bəşəriyyətin
beşiklərindən biri
kimi dəyərləndirilən
zərdüştlüyün vətəni olduğunu xatırladıb: "Azərbaycan
dünya ədəbiyyatına
və musiqisinə dahilər bəxş edib, Şərq aləmində ilk demokratik
respublika da Azərbaycanda qurulub,
1918-ci ildə qadınlara
seçki hüququ verilib, müsəlman dünyasında ilk dünyəvi
teatr, opera, balet və milli akademiya
burada yaranıb. Azərbaycan yeraltı sərvətlərlə
yanaşı, tarixi və mədəni irslə zəngin ölkədir. Azərbaycan ilə
Fransa arasında mədəni əlaqələrin
özünəməxsus tarixi
kökləri vardır.
Böyük fransız
yazıçısı Aleksandr
Dümanın (Ata) XIX əsrin
ikinci yarısında Azərbaycana səyahəti,
Jorj Sandın məşhur "Koroğlu"
epik poemasını fransız dilinə tərcümə etməsi,
XX əsrin əvvəllərində
Parisdə "Qafqaz"
məcmuəsinin çap
olunması, azərbaycanlı
yazıçı Ümbülbanu
Əsədullayevanın Fransada
yaşayıb yaratması
və nəhayət Fransanın ictimai-siyasi həyatında mühüm
rol oynayan Prezident Şarl de Qolla Əhmədiyyə Cəbrayılovun görüşü
xalqlarımız arasındakı
dostluğun parlaq nümunəsidir. Tarixən yaranan
dostluq əlaqələri
Heydər Əliyev Fondunun təşkilatçılığı
ilə bu gün də davam edir və
möhkəmlənir. Azərbaycanın fransızlara daha
yaxından tanıdılması
istiqamətində Fondun
Fransada keçirdiyi mədəni tədbirlər
təqdirəlayiq hadisədir.
Keçən ay Reymsdə, bu
gün isə Miluzda Azərbaycanın görkəmli şairəsi
Məhsəti Gəncəvinin
yaradıcılığının 900 illiyi münasibətilə
təşkil olunan sərgi və konsert Fondun Fransada həyata keçirdiyi mədəni
tədbirlərin davamıdır".
Daha sonra aparıcı Məhsəti Gəncəvinin
Azərbaycanın ikinci
böyük şəhəri
qədim Gəncədə
yaşayıb yaratdığını,
Qafqazda ilk dəfə
olaraq Gəncənin
2016-cı il üçün
"Avropanın gənclər
paytaxtı" seçildiyini
bildirib. Tədbirdə çıxış edən Yuxarı-Alzas Universitetinin ədəbiyyat
fakültəsinin dekanı
xanım Greta-Komur-Thilloy Məhsəti Gəncəvi yaradıcılığının
əsas məziyyətlərindən
danışıb, azərbaycanlı
şairənin əsərlərində
bəşəri ideyalardan
söhbət açdığını
diqqətə çatdırıb.
"Xocalı-613" əsərinin bəstəkarı
Pyer Tilua çıxışında Azərbaycanın
qədim və zəngin mədəniyyətə
malik olduğunu vurğulayaraq xalqımıza
məxsus ayrı-ayrı
musiqi alətləri barədə tamaşaçılara
məlumat verib.
Azərbaycanın Fransadakı səfiri
Elçin Əmirbəyov
Miluzda təşkil olunan konsert və sərginin dahi Azərbaycan şairəsi Məhsəti
Gəncəvinin yaradıcılığının
900 illiyinə həsr
olunduğunu diqqətə
çatdırıb, Heydər
Əliyev Fondunun təşkilatçılığı və səfirliyin dəstəyi ilə Fransanın müxtəlif
regionlarında, o cümlədən
Miluzda mədəni tədbirlərin keçirildiyini,
bu konsert və sərginin
2013-cü il üçün
nəzərdə tutulmuş
tədbirlərdən biri
olduğunu bildirib.
Sonra incəsənət
ustalarının ifasında
Azərbaycan bəstəkarlarının
əsərləri, Məhsəti
Gəncəvinin sözlərinə
bəstələnmiş mahnılar
və xalq yaradıcılığı nümunələri
səslənib.
Fransanın müasir tipli "Fundari" sarayında Məhsəti Gəncəvinin
yaradıcılığının 900 illiyi münasibətilə
təşkil olunan sərgini açan Yuxarı-Alzas Universitetinin
rektoru xanım Kristin Gangloff Ziegler Gəncədə
səfərdə olduğunu
və görkəmli şairənin abidəsinə
baş çəkdiyini,
onun öz xalqı tərəfindən
yüksək hisslərlə
yad edildiyini xatırladıb, rəhbərlik
etdiyi ali təhsil müəssisəsinin
Azərbaycan Dövlət
Aqrar, Gəncə Dövlət və Azərbaycan Texnologiya universitetləri ilə əməkdaşlıq perspektivlərindən
və tələbə
mübadiləsi imkanlarından
söhbət açmışdır.
Miluz şəhərinin meri Jan
Rottner iki xalq arasında dostluq əlaqələrinin
inkişafında bu cür sərgi və konsertlərin təşkilinin mühüm
rol oynadığını,
bu istiqamətdə Heydər Əliyev Fondunun Fransada Azərbaycanı tanıtmaq
baxımından həyata
keçirdiyi mədəni
tədbirləri yüksək
qiymətləndirib, ölkələrimiz
arasında əməkdaşlıqda
iqtisadi əlaqələrlə
yanaşı, mədəni
əlaqələrin də
mühüm rol oynadığını qeyd
edib.
Səfir Elçin Əmirbəyov Məhsəti Gəncəvinin Şərq intibahının böyük mədəniyyət mərkəzlərindən biri olan Azərbaycanın ikinci böyük şəhəri Gəncədə doğulduğunu və bu şəhərdə yaşayıb-yaratdığını, Gəncənin dünya mədəniyyətinə Nizami Gəncəvi kimi bir düha bəxş etdiyini xatırladıb, şairənin öz fikirlərini açıq şəkildə bildirən Şərq qadınlarından biri olduğunu, yaşadığı cəmiyyətdə qadın problemini və rolunu ortaya qoyduğunu, yaradıcılığının əsas qayəsini bərabərlik, qardaşlıq və azadlıq kimi bəşəri ideyalar təşkil etdiyini vurğulayıb: " Məhsəti Gəncəvinin yalnız şairə deyil, eyni zamanda, fəal bir qadın olub, o gənc qızları ətrafına toplayıb ədəbi dərnək yaradıb, onların arasında öz dövrünün tanınmış şairələri yetişib. Şairənin əsərlərində əks olunan ideyalar və fikirlər səsləndiyi vaxtdan 900 il keçməsinə baxmayaraq, bu gün də öz aktuallığını itirməyib. Azərbaycan Prezidenti İlham Əliyev Məhsəti Gəncəvinin yaradıcılığının 900 illik yubileyi ilə bağlı sərəncam imzalayıb, ölkənin birinci xanım Mehriban Əliyevanın prezidenti olduğu Heydər Əliyev Fondunun şairəni dünya ictimaiyyətinə yaxından tanıtmaq məqsədi ilə onun fars və ərəb dillərində yazdığı əsərləri xarici dillərdə nəşr etdirib". E.Əmirbəyov Parisdə, Reymsdə və Miluzda təşkil olunan sərgilərdə Məhsəti Gəncəvinin yaşadığı dövrə məxsus eksponatların nümayiş olunduğunu bildirib. Sərgi dekabrın 20-dək davam edəcək.
S.ABDULLAYEVA
525-ci qəzet.- 2013.- 12 dekabr.- S.7.