90 illik şərəfli yolun hesabat ili...

2 dekabr 2013-cü il tarixdə Azərbaycan Dövlət Mədəniyyət və İncəsənət Universietində ənənəvi olaraq "2013-cü tədris ilinin Azərbaycan Dövlət Mədəniyyət və İncəsənət Universitetinin professor-müəllim heyətinin elmi-tədqiqat işlərinin hesabat konfransı" keçirildi. Konfrans Azərbaycan Respublikası Prezidenti İlham Əliyevin 1 mart 2013-cü il tarixli Sərəncamı ilə sənət məbədgahı olan ADMİU-nun 90 illik şərəfli yolunun təntənəli şəkildə qeyd olunması ərəfəsində təşkil olunmuşdu.

Şöhrət ordenli, Əməkdar incəsənət xadimi, filologiya üzrə elmlər doktoru, professor Timuçin Əfəndiyevin rəhbərliyi ilə Azərbaycan Dövlət Mədəniyyət və İncəsənət Universitetinin professor-müəllim heyəti dövlətimizin daimi qayğı və diqqətinə cavab olaraq elmin müasir dövrün tələbləri səviyyəsinə hərtərəfli inteqrasiya olunmaq üçün var qüvvəsi ilə çalışır, dövlətçiliyimizin, milli maarifçilik strategiyamızın inkişafına sədaqətlə xidmət edir. Bu il də ənənəvi olaraq Universitetin Elmi Şura zalında bu bədii təhsil ocağının elmi -tədqiqat işlərinin hesabatı dinlənildi. Konfrans il ərzində Universitetin professor-müəllim heyətinin apardığı elmi axtarışlar, çap etdirdikləri məqalələr, monoqrafiya və dərsliklər barədə dəyərli fikirlər söylənilən ali kürsüdür. ADMİU-nun Elm və yaradıcılıq işləri üzrə prorektor, professor Maral Manafovanın təşəbbüsü ilə keçirilən konfransda ali məktəbin elmi-pedaqoji potensialının görkəmli nümayəndələri, tanınmış alim və ziyalılar təmsil olunurdular.

Konfransı giriş sözü ilə ADMİU-nun Elm və yaradıcılıq işləri üzrə prorektoru professor Maral Manafova açdı. O, nitqində 2013-cü ildə universitet üzrə aparılan elmi-tədqiqat işlərinin hesabatını verdi, cari ildə 20 kafedrada 118 professor - müəllim heyətinin tədqiqat işinə cəlb olunmasını qeyd etdi. 2013-cü ildə Universitetdə 114 adda elmi - tədqiqat işi planlaşdırılıb ki, onlardan 9-u dərslik, 2-si dərs vəsaiti və 103-ü elmi tədqiqat işidir. Azərbaycanda elm və təhsilin inteqrasiyasını təmin etmək məqsədilə Universitetin Elmi Şurasının müvafiq qərarı ilə professor-müəllim heyətinin apardığı elmi-tədqiqat işlərinin elmi nəticələrinin nüfuzlu beynəlxalq nəşrlərdə çap olunmasına nail olunub. Belə ki, 2009-2013-cü illərdə 120 elmi məqalənin xarici nüfuzlu jurnallarında dərc edilib.

2013-cü ildə ADMİU-da aparılan elmi-tədqiqat işlərinin mühüm nəticəsi kimi görkəmli alim Timuçin Əfəndiyevin "Mədəniyyət və İncəsənətimizin məbədgahı", "Heydər Əliyev . Mədəniyyət və ədəbiyyat", "Hüseyn Cavid: ideal həqiqət axtarışı" adlı monoqrafiyaları təqdim olundu. Natiq nəfis tərtibatla işıq üzü görmüş bu kitabları mədəniyyət və incəsənət tariximiz üçün dəyərli tövfə kimi vurğuladı. Daha sonra Elm və yaradıcılıq işləri üzrə prorektor hesabat dövründə ADMİU-da çalışan professor-müəllim heyətinin üzə çıxardığı çoxsaylı monoqrafiya, dərslik, dərs vəsaiti, fənn proqramları barədə ətraflı məlumat verərək, bir neçəsini xüsusi qeyd etdi. Xalq artisti, professor Ağakişi Kazımov "Rejissor sənətinin əsasları" dərs vəsaitinin, filologiya üzrə elmlər doktoru, professor Gülşən Əliyevanın "Türk təsəvüf fəlsəfəsi" , filologiya üzrə elmlər doktoru, professor Aydın Abi Aydının "Sərvəti fünun ədəbiyyatı", filologiya üzrə fəlsəfə doktoru , dosent Vəfa Xanoğlanın "İlyas Əfəndiyev və Azərbaycan mədəniyyəti" monoqrafiyalarını, kulturologiya üzrə fəlsəfə doktoru, dosent Sədaqət Əliyevanın "Ünsiyyət mədəniyyəti" dərsliyinin, kulturologiya üzrə fəlsəfə doktoru, dosent Yeganə Əliyevanın "Mədəni sahənin diplomatiyası" dərs vəsaitinin elmi dəyərini təhlil etdi.

Konfransda təbrik sözü ilə filologiya üzrə elmlər doktoru, professor Aqşin Babayev və sənətşünaslıq üzrə elmlər doktoru, professor Məryəm Əlizadə çıxış edərək, universitetdə elmi-tətdqiqat işinin müasir tarixi şəraitə və tədris prosesinə tam uyğun şəkildə həyata keçirməsini qeyd etdilər.

Konfransda "Azərbaycan teatrının inkişaf yolları" mövzusunda konseptual məruzə ilə Tədris işləri üzrə prorektor, professor Rafiq Sadıqov çıxış etdi.

Daha sonra müvafiq elmi sahələr üzrə İdeoloji və tərbiyə işləri üzrə prorektor professor Gülşən Əliyevanın, Universitetin Metodiki Şurasının sədr müavini dosent Kamilə Dadaşzadənin, Doktorantura şöbəsinin təlimatçısı dosent Sevinc Şahhüseynovanın, Tələbə Elmi Cəmiyyətinin sədri dosent Yeganə Əliyevanın və digərlərin hesabatları dinlənildi.

Konfrans bədii hissə ilə yekunlaşdı. Tədbirdə ADMİU-nun müəllimi Afaq Ağayeva öz muğam ifası ilə tədbiri xoş ovqatla yekunlaşdırdı.

Konfrans boyu ADMİU-nun elmi-tədqiat işlərinin mühüm nəticələrini əks etdirən foto-slayd nümayiş etdirildi.

Yeganə Əliyeva

Kulturologiya üzrə

fəlsəfə doktoru, dosent

525-ci qəzet.- 2013.- 4 dekabr.- S. 2.