İsmayıllıda Təhsilin İnkişafı üzrə Dövlət Strategiyası müzakirə olundu

İsmayıllıda Heydər Əliyev Mərkəzində "Azərbaycan Respublikasında təhsilin inkişafı üzrə Dövlət Strategiyası" çərçivəsində dəyirmi masa keçirilib. Tədbirdə Təhsil Nazirliyinin rəsmiləri ilə yanaşı İsmayıllı, Qəbələ, Göyçay və Ağsu rayonunun təhsil işçiləri iştirak ediblər. İsmayıllı şəhər 1, 2 və 3 saylı, Lahıc qəsəbə, Cülyan, İvanovka, Talıstan, Qurban Əfəndi, Ruşan, Qoşakənd və Təzəkənd kənd tam orta məktəblərinin direktorları və müəllimləri çıxış edərək Dövlət Strategiyasında qarşıya qoyulan vəzifələrin yerlərdə daha dolğun izahı baxımından belə tədbirlərin əhəmiyyəti haqqında fikirlərini bildiriblər.

Təhsil Nazirliyinin İnformasiya şöbəsinin müdir müavini Cəsarət Valehov bildirib ki, "Azərbaycan Respublikasında Təhsilin inkişafı üzrə Dövlət Strategiyası" cari ilin 24 oktyabr tarixində Prezident İlham Əliyev tərəfindən təsdiq olunub. Sektor müdirinin sözlərinə görə, strategiyanın müzakirəsi ilə bağlı regionlarda müxtəlif tədbirlər, dəyirmi masalar keçiriləcək və burada müxtəlif məsələlər müzakirə olunacaq.

Tədbirdə çıxış edən Təhsil Nazirliyinin İnsan resursları şöbəsinin müdiri Fərzəli Qədirov bildirib ki, "Azərbaycan Respublikasında təhsilin inkişafı üzrə Dövlət Strategiyası" çox əhəmiyyətli sənəddir. O qeyd edib ki, nazirlik hökumətlə birgə adı çəkilən sənədin icrası ilə bağlı plan hazırlayır. Dəyirmi masalarda müzakirə edilən məsələlər və irəli sürülən təkliflər Təhsil Nazirliyi üçün mühüm əhəmiyyət daşıyır və bu məsələlərin həlli istiqamətində lazımi addımlar atılacaq. Qeyd olunan sənəddə müəllimlərin peşəkar inkişafı ilə bağlı çox ciddi məsələlər nəzərdə tutulub.

Şöbə müdiri müəllimlərin kadr hazırlığı və onlara sertifikatların verilməsi ilə bağlı danışıb. Bildirib ki, müəllim kadr hazırlğı 4 il ola bilər, ancaq onlar 1 il də internaturadan keçməli olacaqlar. "Bu məsələlərə indiyə qədər sistemli yanaşma olmadığına görə, bundan sonra bu sahədə operativ iş görmək lazımdır. Müəllimlərin yerdəyişməsi, onların menecer kimi fəaliyyətləri ilə yaxından tanış olmaq, düşünürəm ki, maraqlı olar. Biz müəllimlərə müəllimlik keyfiyyətinə xas olan amillərə yiyələndikdən sonra sertifikat verəcəyik. Kadr hazırlığını uzun müddət aparmaq da həmişə mümkün olmur. Güman edilir ki, müəllim kadr hazırlğı 4 il olsun, ancaq 1 il onlar internaturadan da keçməli olacaqlar. Həmçinin, müəllimlərin dərs yükünün 12 saatdan 18 saata qaldırılması da qarşıda duran işlər sırasına daxildir".

Fərzəli Qədirov jurnalistlərə açıqlamasında deyib ki, son illər Azərbaycan kolleclərində müəllim hazırlığı məhdudlaşdırılıb. Təhsil Nazirliyinin bu işlə daha ciddi məşğul olmaq fikrində olduğunu deyən F.Qədirov qeyd edib ki, son illər nazirlik tərəfindən müəllimlərin işə qəbulu həyata keçirilir: "Ötən il 20 minə yaxın müəllim mərkəzləşmiş müsabiqədə iştirak edib. Onun xeyli hissəsi kollecləri bitirən məzunlar olub. Ancaq onlardan yalnız barmaqla sayılacaq qədər məzun işə qəbul olunub. Bu bizə əsas verir deyək ki, kolleclərdə müəllim hazırlığının keyfiyyəti bizi qane etmir. Beynəlxalq təcrübədə də kollec səviyyəsində müəllim hazırlanmır. Müəllimlər yalnız ali təhsil, hətta bəzi ölkələrdə magistratura səviyyəsində hazırlanır. Dövlət Strategiyası çərçivəsində kolleclərdə müəllim hazırlığının tamamilə məhdudlaşdırılması və yalnız ali təhsil səviyyəsində hazırlanmasına keçilməsi qarşıda duran əsas vəzifələrdən biridir ".

Onun sözlərinə görə, Azərbaycanda bakalavr təhsili 4 ildir və şəxs bu illəri başa vurduqdan sonra müəllim kimi məktəbdə fəaliyyət göstərə bilər. Həmin 4 ildən 3 ilini müəllimlərin pedaqoji sahə üzrə nəzəri biliklər əldə etməsi nəzərdə tutulur. Son bir ildə isə bilavasitə məktəblərdə müəllim kimi fəaliyyət göstərə bilər. Hətta fikrimiz var ki, ehtiyac olan ucqar kənd məktəblərinə də müəllimlər göndərilsin və orada işləsinlər. Orada təcrübəli müəllimlər onlara rəhbərlik etsinlər, təcrübə mübadiləsi sayəsində gənc müəllimlər peşəkar təcrübi bacarıqlar əldə edərək məktəbə hazırlıqlı müəllim kimi gəlsinlər".

Nazirlik rəsmisi əlavə edib ki, Azərbaycanda yaxın zamanlarda müəllim ixtisasına qəbul zamanı müəyyən dəyişikliklər həyata keçiriləcək: "Hazırda bu sahədə qabiliyyət imtahanların keçirilməsi ilə bağlı müzakirələr aparılır. Düşünürük ki, gələcəkdə müəllimlər düşünərək, dərk edərək bu peşəni seçməlidirlər. Hesab edirik ki, qısa zamandan sonra müəllimlik ixtisasına qəbulda müəyyən dəyişikliklər həyata keçiriləcək".

Təhsil Nazirliyinin Məktəbəqədər və ümumi təhsil şöbəsinin müdiri Aydın Əhmədov isə qeyd edib ki, İsmayıllı rayonunda təhsildə yüksək nəticələr əldə olunub, yaxşı məktəblər, müəllimlər və şagirdlər var. Şöbə müdiri əlavə edib ki, İsmayıllı rayonun şagirdlərinin qəbul və buraxılış imtahanlarında göstərdikləri nəticələr qənaətbəxşdir.

Qeyd edək ki, tədbirdə Dövlət Strategiyasında nəzərdə tutulan məsələlər, müəllimlərin inkişafı, müəllimlərin məktəblərdən ayrılmadan peşəkarlığının artırılması, müəllimlərin sertifikatlaşdırılması, müəllim fəaliyyətinin qiymətləndirilməsi sisteminin yaradılması, məktəb direktorlarına tələblər, onların rotasiyası və digər məsələlər müzakirə olunub.

12 illik təhsilə keçid məsələsi mütərəqqidir. Bu uşaqların tədris və fənlər üzrə təlim yükünün hansısa mərhələdə yüngülləşməsinə xidmət edir. Bunu Təhsil Nazirliyinin Məktəbəqədər və ümumi təhsil şöbəsinin müdiri Aydın Əhmədov İsmayıllı rayonu Heydər Əliyev Mərkəzində "Azərbaycan Respublikasında təhsilin inkişafı üzrə Dövlət Strategiyası" çərçivəsində təhsil işçiləri üçün keçirilən dəyirmi masada çıxışı zamanı bildirib.

Onun sözlərinə görə, məktəb kollektivi və valideynlər dərs yükünün ağır olmasından hər zaman şikayət edir: Əlavə 1 ilin hansı səviyyənin uzadılmasına verilməsi vacibdir və burada müxtəlif fikirlər səslənə bilər. Bu bir ilin ibtidai, yoxsa V-XI siniflər arası orta siniflərə verilməsi dəqiq məlum deyil. Fikrimcə, bu orta hissəyə verilsə, yaxşı olar. Belə ki, icbari təhsil ölkədə 9 illikdir. Əgər bu pillə 1 il artırılsa, uşaqlar icbari təhsil dövründə həmin fənlər üzrə daha yüksək biliyə malik ola bilərlər. Bir ilin təhsil sisteminə gətirilməsi üçün proqramlar dəyişməli, keçid təmin olunmalıdır. Eyni zamanda, mövcud kurikulumlar 12 illik təhsil sisteminə uyğunlaşdırılmalıdır. 12 illik təhsilə keçid asan iş deyil, bu məsələ strategiya sənədində də göstərilib.

Təhsil Nazirliyi Azərbaycanda müəllimlərin fəaliyyətinin qiymətləndirilməsi ilə bağlı konkret və dəqiq addımlar müəyyənləşdirilməlidir.

Heydər Əliyev mərkəzində dəyirmi masa yekunlaşdıqdan sonra Təhsil Nazirliyinin nümayəndələri və media Lahıc kənd orta məktəbində olublar. Məktəb 17 komputer, 4 notbuk, 22 netbuk və 2 rometor lövhələrlə təmin olunub. Bu il Lahıc kənd məktəbində 1 nəfər qızıl medalla təltif olunub. Məktəb 16 layihədə iştirak edib. 1 nəfər isə Türkiyənin Qazi Universtetinə daxil olub. Kitabların az olmasından danışan Lahıc kənd orta məktəbinin müəllimi Rövşən Əliyev iş dəftərlərinin dövlət tərəfindən təmin olunmasından danışıb.

Lahıc qəsəbə tam orta məktəbi 2013-cü ildə "Ən yaxşı ümumtəhsil məktəbi" və "Elektron təhsil" Respublika müsabiqələrinin qalibi seçilib. Məktəbin fizika müəllimi Rövşən Əliyev isə "Azərbaycan Respublikasının əməkdar müəllimi" və 2009-2010-cu tədris ilində keçirilən "Ən yaxşı müəllim" müsabiqəsinin qalibi adına layiq görülüb. VI sinif üzrə Fizika dərsliyinin həmmüəllifi R.Əliyev tədris etdiyi "Açıq dərs"də fəal interaktiv təlim metodlarından səmərəli istifadə etməklə olduqca maraqlı və məzmunlu dərs təşkil etməyə nail olub.

Vəfa MƏMMƏDLİ

525-ci qəzet.- 2013.- 26 dekabr.- S.2.