"Mən Azərbaycanlıyam" İkinci Bədii Qiraət Müsabiqəsi keçirilib

Bugünlərdə Azərbaycan Milli Konservatoriyası nəzdindəki İncəsənət Gimnaziyasında Dünya Azərbaycanlılarının Həmrəylik Gününə həsr olunmuş "Mən Azərbaycanlıyam" adlı İkinci Bədii Qiraət Müsabiqəsi təşkil edilib. Müsabiqənin əsas təşkilatçıları "Hicaz Production", Azərbaycan Dövlət Mədəniyyət və İncəsənət Universiteti, İncəsənət Gimnaziyasıdır.

Aparıcı Elməddin Məmmədovun giriş sözü ilə açılan müsabiqənin əvvəlində Azərbaycanın Dövlət Himni səsləndirilib. Yarışmanın münsiflər heyətində xalq artisti Ramiz Əzizbəyli, əməkdar artistlər Gülşad Baxşiyeva, Ağalar Bayramov, Yaqut Paşazadə, əməkdar müəllim Ənvər Vəliyev, Sevda Teymurova və gənc aktyor Əbdül Məcidli təmsil olunub. Şagirdlər bir-birinin ardınca şeirlər səsləndiriblər. Onların hər birinin ifası münsifər heyəti tərəfindən 10 ballıq sistemlə qiymətləndirilib.

Ənvər Vəliyev, Gülşad Baxşıyeva, Ağalar Bayramov müsabiqənin əhəmiyyəti, iştirakçıların yaradıcılığındakı rolu barədə fikirlərini bildiriblər.

Müsabiqənin qalibləri elan edilməzdən əvvəl bir neçə iştirakçı həvəsləndirici diplomlarla, həmçinin münsiflər heyəti və layihədə zəhməti olanlar təşəkkürnamə ilə təltif olunu. Layihənin rəhbəri və "Hicaz Production"un direktoru Ayaz Məmmədov İncəsənət Gimnaziyasının direktoru M.Şabanbəyova tərəfindən "Böyüməkdə olan gənc nəslin nitq mədəniyyətinin formalaşmasındakı xidmətlərinə görə" fərmanla təltif edilib.

1-ci yeri 60 balla Zəhra Rzayeva, 2-ci yeri 58 balla Mirböyükağa Abbasov, 3-cü yeri isə 57 balla Cavidan Səfərli tutub.

Ayaz Məmmədov müsabiqəni gələcəkdə də keçirmək fikrində olduqlarını, həmçinin başqa bu kimi tədbirlər təşkil etməyi planlaşdırdıqlarını açıqlayıb.

Vəfa MƏMMƏDLİ

525-ci qəzet.- 2013.- 28 dekabr.- S.7.