“Ümummilli lider Heydər Əliyev-90” mövzusunda konfrans keçirilib

21 fevral tarixində “Azərbaycan” qəzeti və Azərbaycan Prezidenti yanında Strateji Araşdırmalar Mərkəzinin təşkilatçılığı ilə “Ümummilli lider Heydər Əliyev - 90” mövzusunda konfrans keçirilib.

Tədbirdə çıxış edən Prezident yanında Strateji Araşdırmalar Mərkəzinin direktoru Fərhad Məmmədov qeyd edib ki, bu gün Azərbaycan Respublikasının elə bir sahəsi, elə bir fəaliyyət istiqaməti yoxdur ki, Heydər Əliyevin irəli sürdüyü dövlətçilik prinsiplərinə söykənməsin.

“Heydər Əliyevin iqtisadi siyasətinin, eləcə də neft strategiyasının əsas məqsədi də Azərbaycanın davamlı iqtisadi tərəqqisini təmin etməkdir. Bu baxımdan, Azərbaycanın perspektiv fəaliyyət proqramı olan, yeni strateji hədəflərinin müəyyənləşdirilməsi zərurətindən yaranan “Azərbaycan 2020: Gələcəyə baxış” İnkişaf Konsepsiyası kimi mühüm sənədin fəlsəfəsi də ümummilli lider Heydər Əliyevin Azərbaycan xalqının mənafelərinə yönəldilmiş siyasətindən qaynaqlanır”.

Azərbaycan Prezident Administrasiyası rəhbərinin müavini, xarici əlaqələr şöbəsinin müdiri Novruz Məmmədov bildirib ki, Heydər Əliyev qarşısında duran vəzifələri həll etmək üçün yalnız siyasi-diplomatik üsula üstünlük verib və ən çətin anlarda belə Heydər Əliyev danışıqlar, diplomatiya yolunu seçib:

“Heydər Əliyev Azərbaycanın xarici siyasət kursunun əsas istiqamətlərini konkret geosiyasi və tarixi şəraitə uyğun müəyyənləşdirməyə başladı. O, uzaqgörən gedişlərlə faktiki olaraq Azərbaycanın xarici siyasət kursunu sistemləşdirdi, ona yeni məzmun verdi və zamanın tələbləri səviyyəsinə qaldırdı”.

Milli Məclisin İqtisadi siyasət komitəsinin sədri Ziyad Səmədzadə qeyd edib ki, Ümummilli lider Heydər Əliyev hakimiyyətə gələndən sonra Azərbaycan sürətlə inkişaf etməyə başladı və qısa zaman ərzində keçmiş sovet məkanında ən inkişaf edən ölkəyə çevrildi:

“H.Əliyevin ikinci dəfə hakimiyyətə gəlişindən sonra isə Azərbaycanın inkişafında yeni bir mərhələ başladı. Hazırda Cənubi Qafqaz ölkələri üzrə ümumi gəlirlərin 80%-i yalnız Azərbaycanın payına düşür”.

Millət vəkili, "Azərbaycan" qəzetinin baş redakrotu Bəxtiyar Sadıqov tədbirin açılışında bildirib ki, bu il Azərbaycanda baş verəcək ən əhəmiyyətli hadisə Ümummilli lider Heydər Əliyevin 90 illik yubileyinin qeyd olunmasıdır. Sadıqov bu tədbirlərin keçirilməsi ilə bağlı Azərbaycan Prezidenti İlham Əliyevin müvafiq sərəncam imzaladığını xatırladıb.

"Dövlət müstəqilliyinin iki şərti var. Heydər Əliyev həm daxili, həm də xarici siyasətdə Azərbaycanın qüdrətlənməsinə nail olub", - Sadıqov bildirib.

Ailə, Qadın və Uşaq Problemləri üzrə Dövlət Komitəsinin sədri Hicran Hüseynova isə bildirib ki, ümummilli lider Heydər Əliyevin fəaliyyət istiqamətlərindən birini onun sosial siyasətində gender bərabərliyinin gücləndirilməsi təşkil edirdi:

“Ölkəmiz genderlə bağlı yeniliklərə ilk imza atan dövlətlərlə bir sıradadır. Ona görə ki, digər sahələrdə olduğu kimi gender problemində də bizim əlimizdən tutan bir böyük siyasi irs və siyasi məktəb var. Bu dahi Heydər Əliyev irsi, Heydər Əliyev məktəbidir”.

“İRƏLİ” İctimai Birliyinin sədri Rauf Mərdiyev Ümummilli lider Heydər Əliyevin gənclərə göstərdiyi diqqət və qayğıdan danışıb. Onun sözlərinə görə, Ulu Öndər Heydər Əliyev istər Azərbaycana birinci rəhbərliyi dövründə, istərsə də 1993-cü ildə ikinci dəfə ölkəyə rəhbərliyə başlaması dövründə ən çox güvəndiyi etibar etdiyi sosial qrup məhz gənclər idi:

“Heydər Əliyev hakimiyyətə gəldikdən sonra Azərbaycanda gənclər siyasətinin təməli qoyuldu. Məhz onun dəstəyi nəticəsində gənclər cəmiyyətin avanqard qüvvəsinə çevrilməyə başladılar. Gənclər siyasəti dövlət siyasətinin mühüm tərkib hissəsinə çevrildi. 2003-cü ildə Heydər Əliyev məktəbinin yetirməsi, İlham Əliyevin Azərbaycan Respublikasının prezidenti seçilməsindən sonra Azərbaycan gənclər siyasətində yeni mərhələnin başlanğıcı oldu. Əsası Ümummilli lider Heydər Əliyev tərəfindən qoyulmuş gənclər siyasəti hal-hazırda Prezident İlham Əliyev tərəfindən ən uğurlu formada davam etdirilir. Artıq əminliklə qeyd etmək olar ki, bu gün Azərbaycan gəncliyi qarşısına qoyulan məqsədlərə asanlıqla nail olmaq iqtidarındadır. Bu gün Azərbaycan prezidentinin ətrafında birləşən peşəkar gənclər ordusu vardır”.

525-ci qəzet.- 2013.- 23 fevral.- S.11.