Müqəddəs amallara qarşı yönələn qara əməllər

ORDUMUZU GÖZDƏN SALMAĞA CAN ATANLAR SADƏLÖVH GƏNCLƏRİ ÖZ NİYYƏTLƏRİ ÜÇÜN VASİTƏYƏ ÇEVİRMƏYƏ ÇALIŞIRLAR

Son vaxtlar Azərbaycan ordusunun qüdrətinə kölgə salmağa çalışan bəd niyyətli qüvvələrin və onların əlaltısına çevrilənlərin fəallığı artıb. Hətta əsgər ölümlərindən siyasi vasitə kimi istifadə edən belə bədxahlar bu gün-sabah ordumuzun əsgərləri olacaq gəncləri, yeniyetmələri də öz ətraflarına cəlb edərək ictimai yerlərdə aksiyalar keçirməyə səy göstərirlər. Ancaq xalqın gözü tərəzidir, hamı yaxşı bilir ki, kim nə niyyətdədir, kim nə işlə məşğuldur! Elə ona görə də martın 10-da “Fəvvarələr” bağında keçirilən aksiyaya çox az sayda insan qatılmışdı. Oraya yalnız bir qrup emosional gənc toplaşmışdı. Bəlkə də bu gənclərin əksəriyyətinin 15-18 yaşı var, onlar hələ lazımi səviyyədə düşüncə, dünyagörüş sahibi deyillər, sadəcə öz ani hisslərilə hərəkət edirlər. Əslində də qara qüvvələrə, müstəqil Vətənimizin və doğma ordumuzun inkişafını, qısa zaman ərzində qazandığımız uğurları gözü götürməyənlərə belə gənclər lazımdır ki, onları arxalarınca aparmağa imkanları olsun. Halbuki sabahımızın əsgərləri olacaq bu gənclərə vətənpərvərlik, Vətən sevgisi aşılamaqla onların hər birini yurdumuzun etibarlı müdafiəçisi olmağa hazırlamaq daha vacib və ən müqəddəs vəzifədir. Axı sabah, o biri gün bizim taleyimiz həmin gənclərə etibar ediləcək, onlar səngərlərdə dayanıb ölkəmizin ərazi bütövlüyünü qorumalı olacaqlar.

Heç kimə sirr deyil ki, ordu cəmiyyətin ayrılmaz tərkib hissəsidir və ətrafda baş verən hadisələr ordu quruculuğundan da yan ötmür. Bu gün gənc nəslin vətənpərvərlik tərbiyəsini gücləndirmək ailə və məktəbdən tutmuş, bütün ictimai təşkilatlarda çalışanlara kimi, hamının əsas vəzifəsi olmalıdır. Çünki yetərli təlim-tərbiyə görməyən və ilkin hazırlığı olmayan gənclər ordu sıralarına çağrılanda belələrini bir döyüşçü kimi tərbiyə etmək vəzifəsi komandir heyətinin üzərinə düşür, bu isə olduqca ağır və çətindir. Məsələn, belə bir gənc əlində silahla gecənin bir aləmində və düşmənin 3-5 addımlığında döyüş növbəsi çəkir, bu vaxt isə müəyyən psixoloji sarsıntılar keçirir. Çətinliyə azacıq da olsa dözümü olmayanlar hətta bəzi hallarda intihara əl atır və özlərinə qəsd edirlər. Halbuki bu vaxta qədər həmin gəncləri müəyyən qədər ordu həyatına mənəvi-psixoloji baxımdan hazırlamaq lazım idi. Bax, vətənpərvərlikdən geninə-boluna dəm vuran insanlar bu məsələdə lazımi kömək göstərsələr, gənc nəslin hərbi xidmətə hazırlanması üçün əllərindən gələni əsirgəməsələr, onda bunun cəmiyyətimiz üçün böyük faydası olardı.

Hissiyyatla hərəkət edib ortaya atılan gənclər ilk növbədə onları meydana səsləyənlərin, vətənpərvərlikdən ağız dolusu danışanların kimliyilə maraqlanmalıdırlar. Onda bir çox vacib həqiqət gənclər üçün aydın olar. Anlayarlar ki, əslində həmin şəxslər heç də təmiz niyyətdə deyillər, gənclərdən özləri üçün vasitə kimi istifadə etməkdən başqa fikirləri yoxdur. Belə olarsa, gənclər daha faydalı, ölkəyə lazımlı işlərə meyllənərlər. Onlar ordumuzu ləkələmək istəyən keçmişi qaranlıq, dəyərsiz şəxslərin ətrafına toplaşmaz, belələrinin sözü ilə hərəkət etməzlər. Onlar müqəddəs amallara xidmət edənlərin əleyhinə yönələn bəd əməllərə dəstək verməz, əksinə, bunların qarşısını almağa can atarlar.

Çünki həmin fərdlərin – ordumuzu ləkələmək istəyənlərin yeganə bir məqsədi var: təcrübəli, döyüş yolu keçmiş, həqiqi idarəçilik qabiliyyəti olan yüksək rütbəli zabitlərin fəaliyyətinə kölgə salmaqla ümumən ordumuza zərbə vurmaq, onun güclənməsinə əngəl törətmək! Beləliklə də Azərbaycan xalqını və dövlətini düşmən qarşısında zəif vəziyyətə salmaq! Onların ordu rəhbərliyinə qarşı qara əməllərinin arxasında yalnız bu kimi yolverilməz məramlar dayanır.

Gənclər bilməlidirlər ki, odlu-alovlu çıxışlarla onları aksiyalara səsləyən, orduya qarşı çağırışlar etməyə həvəsləndirən şəxslər öz niyyətlərinə layiq olduqda da, yaxud iflasa uğradıqda da dərhal aradan çıxacaq, gəncləri çətin vəziyyətdə qoyacaqlar. Həmin adamlar ya sakitcə bir kənara çəkiləcəklər, ya da xaricə, oradakı havadarlarına üz tutacaqlar, meydana çağırdıqları gənclərin taleyilə əsla maraqlanmayacaqlar. Bununla əlaqədar neçə-neçə misallar gətirmək olar. Bu yaxınlarda həmin adamlardan biri də eyni yolla getdi. Ordudan yarıtmaz xidmətinə görə qovulandan sonra bir çox tədbirlərdə özünü “əsl vətənpərvər, ordu təəssübkeşi” kimi göstərməyə çalışan, ara qızışdırmaqdan başqa işi olmayan bir şəxs iş bərkə düşən kimi xaricə üz qoydu.

Nə qədər gec deyil, gənc nəslin ağılla düşünməsi, təxribatlara uymaması lazımdır! Gənclərimiz bilməlidirlər ki, Vətənə xidmət etmək və dar gündə Vətənə gərəkli olmaq ən şərəfli və ən müqəddəs vəzifədir. Bu gün nəinki xidmətdə, hətta ehtiyatda olan elə zabitlərimiz var ki, onların hər biri istənilən an ordumuzu ləkələmək istəyən insanları susdurmağa, onlara öz layiqli əməllərilə təsirli cavablar verməyə hazırdırlar. Çünki onlar yaxşı bilirlər ki, beş-on gün, uzağı bir ay cəbhə bölgəsində xidmət etməyə, oradakı çətin şəraitə dözüm göstərməyə gücü çatmayanların bütövlükdə ehtiyatda olan zabit kontingenti adından danışmağa qətiyyən haqqı yoxdur.

Bu gün Azərbaycan cəmiyyətində sağlam mövqeyə malik olan vətəndaşlarımız yaxşı başa düşürlər ki, doğma ordumuz qısa zaman ərzində əhəmiyyətli uğurlara imza atıb. Hətta beynəlxalq təşkilatların hərbi ekspertləri də ölkəmizin az bir vaxtda ordu sahəsində əldə etdiyi uğurları qiymətləndirir və Silahlı Qüvvələrimizin yüksək döyüş hazırlığına malik olduğunu etiraf edirlər. Şübhəsiz, bu böyük nailiyyətlərin qazanılması ilk növbədə Azərbaycan Prezidentinin yürütdüyü uğurlu siyasətin, Ali Baş Komandanın misilsiz xidmətlərinin nəticəsidir. Ancaq bu siyasətin, qarşıya qoyulan vəzifələrin müvəffəqiyyətlə həyata keçirilməsində Müdafiə Nazirliyinin hazırki rəhbərliyinin də böyük xidməti, danılmaz əməyi var.

Dövlətimizin rəhbərliyi ordumuzu daima diqqətdə saxlayır, hərbi sahəyə böyük qayğı göstərir və görülən işləri layiqincə qiymətləndirir. Təsadüfi deyil ki, dövlətimizin başçısı bu yaxınlarda keçirilən yüksək səviyyəli bir toplantıda vurğuladı ki, bəzi antimilli ünsürlər ordumuzun uğurlarına kölgə salmağa çalışırlar, lakin belələrinin əməllərinə heç zaman imkan verilməyəcək. Vətənini, dövlətini sevən hər kəs bu sözləri özü üçün bir vəzifə kimi qəbul etməlidir. Buna görə də müstəqil Azərbaycanımızın parlaq gələcəyini, doğma ordumuzun qüdrətlənməsini düşünərək, sağlam mövqe tutmalı, bədxah fərdlərin, qara niyyətli qrupların əməllərinin qarşısının alınması üçün fəallıq göstərməliyik.

Rövşən MƏHƏRRƏMOV,

Polkovnik

525-ci qəzet.- 2013.- 13 mart.- S.4.