Bir ailədən üç sənətçinin işləri “Üç künc” sərgisində

“Yeni Gallery” Bakı İncəsənət Mərkəzində “Üç künc” adlı sərginin açılışı olub. Sərgidə heykəltəraş Cəmaləddin Rüstəmovun və qızları – rəssam-dizayner Nilufər Rüstəmova ilə Zəhra Rüstəm-Osmanovanın əsərləri nümayiş olunur. Sərginin açılışında çıxış edən “Yeni Gallery” Bakı İncəsənət Mərkəzinin direktoru, sənətşünas Rəfael Gülməmmədov bildirib ki, bir ailədən üç nəfər insanın yaradıcılıq işləri ilə çıxış etməsi təqdirəlayiqdir: “ Cəmaləddin Rüstəmovun işləri ilə çox insan tanışdır. Sevindiricidir ki, onun övladları da incəsənətlə məşğuldurlar və bir ailədən üç istedadlı insan Azərbaycan incəsənətinə xidmət edir”.

Azərbaycan Rəssamlar İttifaqının üzvü Cəmaləddin Rüstəmov “Üç künc” adlanan layihə barədə məlumat verərək deyib ki, burada müxtəlif istiqamətlərdə işlər – heykəltəraşlıq, dekorativ-tətbiqi sənət nümunələri və fotoşəkillər sərgilənib: “Özüm əsasən monumental heykəltəraşlıqla məşğulam. Nizami ilə bağlı tarixi etnoqrafik heykəllərdən ibarət işlərim var. Monumental heykəltəraşlıqla bağlı axırıncı işim Şabranda Əfzələddin Xaqaninin monumental heykəlidir”.

Sərgidə Cəmaləddin Rüstəmovun 9 heykəltəraşlıq işi, Nilufər Rüstəmovanın dekorativ janrda 16 yaradıcılıq məhsulu, Zəhra Rüstəm-Osmanovanın isə qadın gözəlliyini əks etdirən 28 fotosu təqdim edilib. Maraqlı qadın obrazlarından ibarət fotolarla çıxış edən Zəhra Rüstəm-Osmanova Azərbaycan Dövlət Mədəniyyət və İncəsənət Universitetinin rejissorluq fakültəsinin tələbəsidir. 2010-cu ildən ANS telekanalında aparıcı kimi çalışır. Həvəskar fotoqraflığa 2010-cu ildən başladığını deyən Zəhra bu sahəyə uşaqlıqdan böyük marağı olduğunu bildirib: “Mənim işlərim əsasən qadın fiqurlarından qurulmuş şəkillərdir. Həmişə istəmişəm, şəkillər çəkim, amma rəssamlıq qabiliyyətim olmadığı üçün qərara gəldim ki, bu arzumu fotoaparatla həyata keçirim. Kadrları daha çox yuxularımda görürəm. Çəkdiyim şəkillərin, demək olar ki, hamısı yuxularımda gördüyüm şəkillərdir, bunların sonradan eskizlərinin qurub fotolara köçürmüşəm. Bu, ilk sərgimdir və inşallah davamı da olacaq. Sərginin “Üç künc” adlandırılmasının səbəbi isə bir ailədə üç yaradıcı insanın incəsənətə fərqli künclərdən baxdığını göstərmək idi. Hər üçümüz bacardığımız qədər gözəlliyi tərənnüm etməyə çalışmışıq”.

Azərbaycan Dövlət Rəssamlıq Akademiyasının rəngkarlıq fakültəsində bakalavr dərəcəsinə yiyələnən, Rəssamlar İttifaqının üzvü olan Nilufər Rüstəmova bu sənətlə artıq üç ildir məşğul olduğunu və yaratdığı işlərdə əsasən parçalar, düymələr, muncuqlardan istifadə etdiyini deyib. Nilufər Rüstəmova 2009-cu ildə “İki dövlət-bir millət” və digər sərgilərdə iştirak edib, uğurlar qazanıb.

Zəhra Rüstəm-Osmanovanın həyat yoldaşı, istedadlı teleaparıcı Cavid Osmanov xanımının yaradıcılığı haqda yüksək fikirdə olduğunu, onu həm həyatda, həm də yaradıcılıqda dəstəklədiyini vurğulayıb: “Bu onun ilk sərgisidir və mənə belə gəlir ki, bunun davamı da olacaq. Belə bir söz var ki, ilk iş o qədər də uğurlu olmur, amma biz, deyəsən, bu stereotipi dağıtdıq. Göründüyü kimi, sərgi çox uğurlu alınıb”.

GÜNEL

525-ci qəzet.- 2013.- 23 may.- S.8.