"Diqqət, mikrofon!"

Zərxanım Əhmədlinin yenicə nəşr olunmuş "Diqqət, mikrofon!" adlı kitabında müəllifin Azərbaycan Radio və Televiziyasının bir sıra korifey sənətkarları haqqında hazırladığı və "Ədəbiyyat qəzeti"ndə çap olunmuş silsilə portret yazıları, həmçinin radio-televiziya jurnalistikası, efir mədəniyyəti, radio-televiziyanın dil xüsusiyyətləri və bu sahədəki bir sıra milli-mənəvi dəyərlər barədə hazırladığı məqalələri toplanmışdır.

"Efir bir dünyadır" deyən müəllifin özü də uzun illər bu dünyanın ən cəfakeş sakinlərindən biri olub. Onun fikrincə, bu dünyanın öz dili, öz sirləri, öz qanunları, öz sakinləri var. Bu dünyanın sakinləri yalnız özləri üçün yaşamırlar. Bəzən özləri min dərd içində olsalar da, kimsəyə bildirməzlər, bəzən bir görməzin gözü, bir dilsizin danışan dili olarlar bu dünyanın sakinləri.

Haqqında söhbət açdığı insanların bir çoxusu ilə uzun illər ünsiyyətdə olan Z.Əhmədli onlardan qayğı, diqqət görüb və tövsiyələrini dinləyib. Ona görə də çiynində haqqı olan hər bir insanı dəyərləndirməyi özünün mənəvi borcu hesab edir. Onların hər birisinin sənət yolunu bir məktəb hesab edir. "Efir bir dünyadır", "Diqqət, mikrofon!", "Kökə bağlılıq", "Efir mədəniyyəti", "Danışır Bakı", "Ənvər Əlibəyli", "Bakı vaxtilə saat", "Sabutay Quliyev", "Ofeliya Sənani", "Ekranda gördüm səni", "Poeziya dərsləri", "Gün keçdi", "Nə yaxşı ki, siz varsınız", "Gün Səhər ilə başlayır", "Bu dünyanı nağıl bilək", "Əcəli də təbəssümlə qarşıladı", "Yadındamı" yazılarının hər biri kövrək notlarla qələmə alınmışdır.

Azərbaycan Radiosunda fəaliyyətə başladığı illərlə bağlı xatirələrini "Kökə bağlılıq" yazısında müəllif belə xatırlayır: "Mən radioya təzə gələndə həftəlik verilişlərin müzakirəsini çox maraqla dinləyirdim. Çünki məruzəçilər peşəkar radio jurnalistləri idi. O insanların çıxışları sözün əsl mənasında Radio dərsləri idi".

Azərbaycan Radiosunu sözün həqiqi mənasında böyük məktəb hesab edən Z.Əhmədli "Danışır Bakı" məqaləsində bu məktəbin yaradıcılarından biri - ədəbi ictimaiyyətin daha çox şair, tərcüməçi Teymur Elçin kimi, Azərbaycan Radio-Televiziya əməkdaşlarının isə Teymur müəllim kimi tanıdığı, o vaxtkı Azərbaycan Tele-Radio Verilişləri Komitəsinin sədri vəzifəsində çalışmış Teymur Əliyev haqqında böyük məhəbbətlə söz açır: "Cəmisi 7 il sədr vəzifəsində çalışıb, amma Azərbaycanın efir dünyasında əbədiyaşar bir ömür qazanıb. Mən onu görməmişəm, amma 70-ci illərdə o məkana ayaq basdığım andan adını eşitmişəm. Onunla birgə çalışan yaşlı nəslin nümayəndələri öz xatirələri ilə onun obrazını elə yaradıblar ki, o, sanki mənim gözlərim qarşısında da canlanır. Tanınmış diktor Züleyxa Hacıyeva deyir ki, bugünkü radio-televiziya məktəbi onun yadigarıdır".

Z.Əhmədli kitabın sonunda bir daha Teymur Əliyev fenomenini xatırlayaraq qeyd edir ki, onu tanıyanlar Teymur Elçin haqqında elə məhəbbətlə söhbət açdılar ki, mən də onların həmin söhbətlərini mətnləşdirib təqdim etməyə qərar verdim.

"Diqqət, mikrofon!" kitabında diqqəti çəkən cəhətlərdən ən birincisi insana, insanlığa, sözə, milli dəyərlərə verilən yüksək qiymətdir. Bu da müəllifin öz vətəninə, xalqına, öz peşəsinə olan sonsuz məhəbbətinin təcəssümüdür.

Qələm və məslək dostumuz Zərxanım Əhmədlini Radio Günü münasibətilə təbrik edir, yeni kitablarının işıq üzü görməsini arzulayıram.

Maral POLADOVA

525-ci qəzet.- 2013.- 6 noyabr.- S.2.