Türkiyə efirində “Azərbaycandan əsən rüzgarlar”

Oktyabrın 9-da axşam saatlarında qardaş Türkiyənin ekranlarında Azərbaycanın musiqi mədəniyyətindən bəhs edən yeni 2 saatlıq canlı televiziya proqramı yayıma başlayıb. Kifayət qədər geniş auditoriyaya malik “Ekim TV” ilə yayımlanan proqramın qonağı Əməkdar artist Gülyanaq Məmmədova olub. Telekanalın yayım koordinatoru Zafer Tokakın verdiyi məlumata görə, tamaşaçılar yeni proqramı coşqu ilə qarşılayıb və verilişin ilk yayımı çox yüksək reytinq toplayıb.

“Biz bu proqramla Türkiyə tamaşaçılarını Azərbaycan musiqisinin ən parlaq nümunələri ilə tanış edəcəyik. Həm xalq, həm klassik, həm də estrada musiqisinə geniş yer verəcəyik. Aşıq musiqisinin isə ayrıca yeri olacaq” – deyə, verilişin aparıcısı Xumar Qarabağlı bildirib. Onun sözlərinə görə, proqramın yaradıcıları bu televiziya layihəsinin Azərbaycanla Türkiyə arasında yeni bir mədəniyyət körpüsü olacağına, sənətçilərimizin isə özlərini qardaş ölkədə tanıtma meydanına çevrilicəyinə ümid edirlər. Biz verilişimizin hasilə gəlməsi üçün Azərbaycandan bizə yardım edən hər kəsə, o cümlədən, proqramımızın orijinal formatını hazırlamış professor Qulu Məhərrəmliyə təşəkkürümüzü bildiririk. X.Qarabağlı İstanbulda yaşayan soydaşlarımızın bu proqrama göstərdikləri maraqdan da bəhs edib. Qeyd edək ki, “Azərbaycandan əsən rüzgarlar” proqramı ötən mövsümdə qısa müddətdə “Fləş TV” kanalında efirə getmişdi. Hazırda Star, ATV, Show TV kimi nüfuzlu telekanalların da ciddi maraq göstərdiyi proqram hər çərşənbə günü Bakı vaxtı ilə saat 19-da “Ekim TV” ilə canlı efirə çıxır.

S.ABDULLAYEVA

525-ci qəzet.- 2013.- 11 oktybar.- S.7.