Əbülfəs Qarayev: "Azərbaycanda kitab nəşri işinə təkan verən addımlar atılır"

M.F.Axundov adına Milli Kitabxanada III Bakı Beynəlxalq Kitab Sərgi Yarmarkasına həsr olunmuş mətbuat konfransı keçirilib. Mətbuat konfransını açan mədəniyyət və turizm naziri Əbülfəs Qarayev sərginin Azərbaycanda keçirilməsinin əhəmiyyətindən, indiyə qədər görülən işlərdən danışıb: «Azərbaycan Respublikasında kitab nəşri, poliqrafiya sahəsində davamlı olaraq mühüm tədbirlər həyata keçirilir, dövlət tərəfindən bu sahənin inkişafına təkan verən addımlar atılır, lazımi şərait yaradılır. «Nəşriyyat işi haqqında», «Kitabxana işi haqqında» və «Mədəniyyət haqqında» qanunlar bu sahənin hüquqi bazasını təşkil edir. Mədəniyyət və Turizm Nazirliyi kitab nəşrinin inkişafı ilə bağlı müvafiq addımlar atır. Hər il orta hesabla mədəniyyət, incəsənət və ədəbiyyat sahələrini əhatə edən 50-70 adda kitab nəşr olunur, müxtəlif nəşriyyatlardan, müəlliflərdən təqribən 10 min nüsxəyə yaxın kitab alınaraq ölkə kitabxanalarına, aidiyyəti müəssisələrə pulsuz paylanır. Bundan başqa iki ildən bir Mədəniyyət və Turizm Nazirliyi tərəfindən təsis olunan «Qızıl Kəlmə» mükafatı ədəbiyyat və mədəniyyət sahəsinin adamlarına verilir. Poeziya, nəşr, tərcümə, publisistika sahəsində seçilən kitablar qiymətləndirilir».

Nazir bildirib ki, Azərbaycanda nəşr olunan, bədii-poliqrafik baxımdan xüsusi dəyərə malik kitablar dünyanın bir sıra beynəlxalq kitab sərgilərində mütəmadi qaydada nümayiş etdirilməkdədir: «2006-cı ildən etibarən Azərbaycan kitabı İsgəndəriyyə, Frankfurt, Varşava, Pekin, İstanbul, Əbu-dabi, Saloniki, Moskva, Minsk, London, Tehran, Paris və başqa şəhərlərdə keçirilən kitab sərgilərində nümayiş etdirilib, ziyarətçilər tərəfindən maraqla qarşılanıb. Həmin sərgilərdə qazanılmış təcrübə Azərbaycanda kitab nəşri və poliqrafiyanın daha da inkişaf etdirilməsi, çap məhsullarına kütləvi marağın təmin edilməsi, xarici ölkələrin nəşriyyatları ilə əlaqələrin qurulması, kitab mübadiləsi, ölkə nəşriyyatlarının satış və təbliğat imkanlarının genişləndirilməsi üçün ölkəmizdə kitab sərgi-yarmarkasının keçirilməsinə şərait yaradıb».

Ə. Qarayev Bakı Beynəlxalq Kitab Sərgi -Yarmarkasının təşkilində əsas məqsədin Azərbaycan dövlətinin kitab nəşri, kitabın təbliği və yayılması, dərsliklərin, lüğətlərin, tərcümə və elmi ədəbiyyatın işıq üzü görməsinə yönəlmiş qərar və göstərişlərin mühüm rolunu vurğulamaq, gənc nəslin kitaba maraq və sevgisini daha da artırmaq, Azərbaycan oxucusunu dünyanın aparıcı nəşiyyatlarının nəşrləri ilə tanış etmək olduğunu diqqətə çatdırıb: «Ənənə halını alan bu beynəlxalq tədbir çərçivəsində dünyanın müxtəlif nəşriyyatlarının çap işləri nümayiş olunur, tanınmış yazarlarla görüşlər, ədəbi-bədii gecələr, təqdimatlar, mühazirə və müzakirələr keçirilir, ən yaxşı nəşriyyatlar və ən yaxşı kitablar mükafatlandırılır».

Nazir sərgi-yarmarkanın fəaliyyətə başlaması tarixindən danışaraq bildirib ki, sərgi ilk dəfə 2009-cu ilin sentyabrında Muzey Mərkəzində təşkil edilib: «İlk sərgiyə 50-dən çox milli, 20-yə qədər xarici nəşriyyat və təşkilat qatılıb. İki ildən bir təşkil olunan Bakı Beynəlxalq Kitab Sərgi-Yarmarkası daha sonra 2011-ci ildə Azərbaycanın dövlət müstəqilliyinin bərpasının 2-ci ildönümünə həsr olunmaqla Əl Oyunları İdman Sarayında keçirilib və bu sərgi yarmarkada 100-dən çox yerli, 20-dən çox xarici çap-poliqrafiya müəssisəsi və kitabxanalar iştirak edib».

Ə. Qarayev ümummilli lider Heydər Əliyevin həmişə kitaba böyük qayğı və sevgi ilə yanaşdığını, böyük dəyər verdiyini xatırladaraq bildirib: «III Bakı Kitab Sərgi-Yarmarkası ulu öndər Heydər Əliyevin 90 illik yubileyinə həsr olunub. Bu da təsadüfi deyil. Ümumilli ilder həmişə kitabın əhəmiyyətini önə çəkib. Əvvəllər olduğu kimi üçüncü dəfə keçirilən Bakı Kitab Sərgi-Yarmarkasında da kitab satışı və nümayişi üçün sahələr və bütün stend avadanlıqları beynəlxalq sərgilərdən fərqli olaraq iştirakçılara ödənişsiz veriləcək. Sərgi-yarmarkada 100-dən çox milli, 25 ölkədən 40-dan artıq beynəlxalq nəşriyyat və təşkilat , eləcə də səfirliklərin təmsilçiləri iştirak edir».

Əbulfəs Qarayev dünya kitabının mərkəzinə çevrilməkdə olan paytaxtımızın digər bir beynəlxalq tədbirə də ev sahibliyi edəcəyini diqqətə çatdırıb: «Bu ilki kitab sərgi-yarmarkası Milli Kitabxananın 90 illik yubileyi ilə üst-üstə düşdüyündən tədbirlər planının daha da geniş olması qərara alınıb. Azərbaycan Milil Kitabxanasının 90 illiyi ilə bağlı tədbirlər, eləcə də Avropa Milli Kitabxanaları Konfransının XXVII illik iclası və Avrasiya Kitabxanalar Assambleyası Əməkdaşlıq Təşkilatının XV ümumi iclası da sərgi-yarmarkanın keçirildiyi günlərə təsadüf edir. Dünyanın 65 ölkəsindən gələn nümayəndə heyəti də sərgiyə ziyarətçi və iştirakçı qismində qatılacaq. Adı çəkilən beynəlxalq tədbirlərin Azərbaycanda keçirilməsi beynəlxalq ictimaiyyətin ölkəmizdə kitab işi ilə bağlı görülən işlərə ehtiramının ifadəsidir».

Nazir builki sərginin işi ilə bağlı həyata keçiriləcək tədbirlər planından danışaraq vurğulayıb ki, sərgidə dünyanın müxtəlif ölkələrindən gələn dünyaca məşhur nəşriyyat assosiasiyaları və poliqrafiya müəssisələri («Oxford University press», «ACKİ», «SİESTA Publishing House LTD», Zvaigzne AVS Publishers LTD» və sair) öz nəşr məhsullarını nümayiş etdirəcəklər».

Ə. Qarayev sərgi-yarmarkanı da Azərbaycan Prezidenti İlham Əliyevin məqsədyönlü şəkildə apardığı siyasət və Mədəniyyət və Turizm Nazirliyinin mədəniyyətlərarası dialoqlar çərçivəsində həyata keçirdiyi tədbirlərin məntiqi davamı kimi qiymətləndirib, bunun gələcəkdə də davam etdiriləcəyini qeyd edib.

Mətbuat konfransında kitab sərgi-yarmarkasının fəaliyyətini işıqlandıran www.bakubookfair.com domenli rəsmi veb səhifəsinin təqdimat mərasimi də keçirilib. Üç dildə fəaliyyət göstərəcək sayt Azərbaycanın kitab sənəti sahəsində seçilən, ixtisaslaşan, sırf kitablarla, nəşriyyat işi ilə bağlı durumunu özündə əks etdirir.

Sərginin geniş proqramı var. Sentyabrın 23-də açılış günündə Fəxri Xiyabanın ziyarətindən və rəsmi açılış mərasimindən sonra kitab təqdimatları, dünya və Azərbaycan yazarları ilə görüşlər keçiriləcək. Sərginin ikinci günü də zəngin tədbirlər planı ilə seçilir. Bu cür əhəmiyyətli tədbirlərdən Rafael Hüseynovun «Söztək gözəl Məhsəti» adlı təhqiqat nəşrinin, xalq şairi Zəlimxan Yaqubun 13 cildliyinin təqdimatı, «Uşaqlar, kitab oxuyun» adlı müzakirə, uşaq ədəbiyyatı yaradıcıları ilə görüş və Rusiya nəşriyyatlarının tədbirləri nəzərdə tutulur. Tədbirin üçüncü, sonuncu günü «Müəllif günü» adlandırılıb. Mədəniyyət və Turizm Nazirliyinin təsis etdiyi və iki ildən bir təqdim edilən «Qızıl Kəlmə» mükafatının laureatları ilə, rus şairi Yevgeni Reyn ilə görüş, GUAM ölkələri nümayəndələrinin iştirakı ilə «Mədəniyyətlərarası dialoqda çağdaş ədəbiyyatın rolu» mövzusunda müzakirə nəzərdə tutulub. Sərginin sonunda «ən yaxşı kitab» və «Ən yaxşı nəşriyyat» nominasiyasında xüsusi ödüllər, eləcə də iştirak edəcək nəşriyyatların mükafatlandırılması planlaşdırılıb.

Konfransın sonunda jurnalistləri maraqlandıran suallar cavablandırılıb.

S.MÜRVƏTQIZI

525-ci qəzet.- 2013.- 21 sentyabr.- S.17.