Milli Kitabxananın 90 illik yubileyi qeyd edilib

Sentyabrın 25-də Opera və Balet Teatrında Azərbaycan Milli Kitabxanasının 90 illik yubileyi ilə bağlı mərasim keçirilib. Tədbiri giriş sözü ilə açan mədəniyyət və turizm naziri Əbülfəs Qarayev ölkə başçısı İlham Əliyevin kitabxana işçilərinin “Tərəqqi” medalı və “Əməkdar mədəniyyət işçisi” fəxri adı ilə təltif olunması haqqında sərəncamlarını oxuyub. Əbülfəs Qarayev Milli Kitabxananın müasir Azərbaycanın mədəni və elmi həyatında mühüm yeri olduğunu vurğulayıb.

Baş nazirin müavini, Xalq yazıçısı Elçin Əfəndiyev Milli Kitabxananın keçdiyi tarixi yol haqqında məruzə ilə çıxış edib: “Milli Kitabxananın 90 illik yubileyi lokal mədəni hadisə deyil. 90 il əvvəl bu böyük kitabxananın yaradılması müasir Azərbaycanın fikir tarixinin ən sanballı səhifələrindəndir. Şəxsi təşəbbüslər nəticəsində xüsusi kitabxanalar yaransa da, dövlət səviyyəli kitabxananın yaradılması yalnız 1920-ci ildə Azərbaycan Respublikası Xalq Ali Komissarlığının 13 noyabr tarixli iclasında müzakirə olunub. Ancaq kitabxananın yaranması prosesi üç ilə yaxın vaxt apardı. O zamanlar Milli Kitabxananın on üç nəfərdən ibarət kollektivi vardı. Məhz bu on üç nəfərin vətəndaş sədaqəti, onların kitaba sevgisi, dəyəri bizim bugünkü Milli Kitabxanamızın əsasını qoydu. Yaranandan on il sonra artıq kitabxananın otuz dörd min üç yüz doxsan dörd oxucusu olub. Bəlkə də bu rəqəm indi sadə görünür, ancaq o dövr üçün son dərəcə böyük əhəmiyyətli rəqəmdir. Bu gün kitabxanada çox qədim və nadir kitablar saxlanılır. 1998-ci ildə respublikada ilk internet zalı məhz Milli Kitabxanada açılıb. Milli Kitabxana statusu aldıqdan sonra kitabxananın fəaliyyət dairəsi, beynəlxalq əlaqələri xeyli dərəcədə genişlənib. Milli Kitabxana Türkiyədən tutmuş Çexiyaya qədər, Fransadan, Hollandiyadan tutmuş İran İslam Respublikasınacan və digər xarici ölkələrin kitabxanaları ilə 30-dan çox memorandum imzalayıb. Son illər ərzində Milli Kitabxananın təcrübəsində virtual oxucu termini daxil olub. 2006-cı ildən etibarən onun elektron kitabxanası oxucuların ixtiyarına verilib. Hazırda Azərbaycan Milli Kitabxanasının 60-dan çox xarici kitabxana ilə əlaqələri var. Kitabxana bir gündə 1500 oxucuya xidmət edir”.

Sonra çıxış edən Milli Kitabxananın direktoru Kərim Tahirov bu mədəniyyət ocağının bir neçə Azərbaycan ziyalı nəslinin yetişməsində böyük rol oynadığını vurğulayıb. O, ölkə başçısına kitabxana işçilərini təltif etdiyinə görə minnətdarlığını bildirib: “Cənab prezidentin bu sərəncamı təkcə bizim kollektivimizə yox, bütövlükdə Azərbaycanın kitabxana ictimaiyyətinə, elmin, təhsilin inkişafına verdiyi dəyərdir. Bu gün təqaüddə olan bizim keçmiş işçilərimizin hamısı bu yubiley gecəsinə dəvət olunmuşdur. İlk növbədə onlara təşəkkür edirəm. Onlar bizim bu uğurlarımızın özülünü, təməlini qoyub, bu günümüzə çatdırıblar”.

Daha sonra Avropa Milli Kitabxanaları Komitəsinin sədri, Fansa Milli Kitabxanasının direktoru Bruno Rasini, Asiya Milli Kitabxanaları Komitəsinin sədri Aleksey Bisney də çıxışlarında ölkəmizə gəlməkdən məmnun olduqlarını bildiriblər və Milli Kitabxananın Azərbaycanın mədəni həyatındakı əvəzsiz rolundan, mədəni irsimizin qorunmasının vacibliyindən danışıblar.

Bununla da yubiley gecəsinin rəsmi hissəsi başa çatıb. Tədbirin bədii hissəsində isə Üzeyir Hacıbəylinin, Qara Qarayevin, Fikrət Əmirovun və digər görkəmli bəstəkarların əsərləri səsləndirilib. Azərbaycan Dövlət Rəqs Ansamblı “Yallı” və “Cəngi” rəqslərini ifa edib.

RAMİL

525-ci qəzet.- 2013.- 27 sentyabr.- S.7.