Səsi içindən baxan şair

Xalq şairi Fikrət Qoca üçün

Həyatımızda işığına inandığımız gözlər

varsa,

varsa

Adına sevindiyimiz kəslər

Yaşamağa dəyər...

Başının üstündə Allahı görənlər varsa,

Bilənlər ki

Ayağının altı torpaqdı...

Şairim, sənin səsin içindən,

Qəlbin gözlərindən baxdı...

Dünyanın bu vaxtı,

Dünyanın bu vaxtı

Nə yaxşı

Adamla dolu dünyada

Az da olsa insanlar var,

Ağaclar var,quşlar var

Adamı yaşamağa səsləyəcək yaşamlarıyla.

Hayandasa göylər misra-misradı

Tanrı o yerlərə səsləmiş səni,

Şeir Allahındı, şairlər göyün,

Şairim, qismətin söz imiş sənin.

Sənə qələbədən danışacam, oğlum...

Sənə qələbədən danışacam, oğlum,

Müharibəni dəlicəsinə oynayıb,

Ağılsızcasına uduzmağımızdan

Danışmayacam.

Məğlubiyyətdən deyil,

Şəhid olub qapı-qapı paylanmaqdan,

Qaçqın olub ev-ev səpələnməyimizdən,

26 fevralda donan ahımızdan,

Xocalının yayın istisində də

canımızdan çıxmayacaq soyuğundan

Danışmayacam.

Sənə qələbədən danışacam, oğlum

Ora necə yüyürməyimizdən

Aparmağımızdan bayrağı Şuşaya

ürəyimizdə.

O torpağa sancandan sonra bayrağı

Alçaq boyumuzun

Necə böyüməyindən,

Ordakı qanların yerində açan al lalərdən

Danışacam, oğlum.

Mən danışdıqca

Sənin gözlərin böyüyər

- Qan necə laləyə dönər, ana,

- soruşarsan.

Mən:

- Axı, ikisi də qırmızıdır, deyərəm.

Sənin təsəvvüründə rənglər sayrışar,

O qırmızıyla qaçdı-tutdu oynayarsan.

Axı uşaqlar rəngləri və işığı çox sevir,

Rəngsizliyi deyil.

Sənə qələbədən danışacam, oğlum...

Sən qələbədən sonra doğulacaqsan.

lll

Səni gizli sevmişdim,

Aşkarca unudacam.

İsti xatirələrlə

Gözümü qurudacam.

Əynimdə köhnəldəcəm,

Kədərin siyah donun,

Sən inadcıl,mən də tərs

NeyləsinYaradanım.

Keçmişi düşünəndə

Həmişə köks ötürdün,

Bəsdir, gələcəyə bax,

Bax... 2014dü...

lll

Kimin atdığı sözdən

Xatirən çilikləndi,

Qırıldın öz içində

Baxışın gileyləndi...

Gecə

Ucuz yuxunu

Sənə baha sırıyır

Səni yarıdmayanlar

Səndən yaman yarıyır..

Heç bilmədiklərin

Xatırlayır adını..

Gələcək nə vəd edir,

Sənə, bədbəxt qadın...

Yanvarın sehri

Çöldə yanvarın sehri,

Bir də soyuq gecə var,

Gecəni aydınladan

Sən olduğun küçə var.

Aldığın hər nəfəsin,

Bəsimdi, elə bəsim,

Can dediyin - qəfəsim,

Eşq dediyin acı var.

Eh, üzüldüm nələrçin,

Dən gəzən sərçələrçin,

Zavallı bəndələrçin

Tanrı adlı Uca var.

Sara Selcan

525-ci qəzet.- 2014.- 1 aprel.- S.7.