Yazığın gəlsin

sən içində öldürdüyün

o, mənə yazığın gəlsin.

neçə mənsiz keçirdiyin

dünənə yazığın gəlsin...

dişimlə cırmaqladığım

...gahdaki sığalladığım

açıb öpüb,bağladığım

sinənə yazığın gəlsin...

həm sevib,həm də atdığım

saçlarını dağıtdığım

hər gün bir az unutduğum

qız,sənə yazığın gəlsin..

lll

hərdən də saçlarını

yığırsanmı,qadası

həfif-həfif gəzməyə

çıxırsanmı,qadası

üstəlik bu dəlini

sər üstümə telini

xərcləyəndə əlini,

sıxırsanmı,qadası

bu baxt,taleh oyununa

girərsənmi qoynuma

günahını boynuma

yıxırsanmı,qadası

Çıxır...

ruhum sızıldadıqca

bu can bir daha çıxır.

ucuzdu burda hər şey

bir ölüm baha çıxır...

yox,yox bu dərdə çözüm

nə gəzir canda dözüm

hər cümləm,hər bir sözüm

fəryada,aha çıxır...

yığ sən dərdimin kəfin

pozma düzələr kefin

vəzir,vəkilin səfin,

axtarın,şaha çıxır

soruşma niyə,nəyi

içək zəhrimar meyi.

bilə-bilə hər şeyi,

kimdi sabaha çıxır?!

Sağ-salamat, əlvida

batıram yavaş,yavaş

bu dərd qəmin içində.

sənə gəl yol göstərim,

keç qəlbimin içinnən...

yandırır baxışların

aciz durub baxanda

yaman gözəl olursan

ağlayıb darıxanda...

gərək ki tərgidəsən

bu cürə baxmağı da.

gəl öyrədim indidən

sənə darıxmağı da...

əynini qalın geyin.

ay ara bir sevdiyim.

çalış vaxtın olanda

gəl məni gör sevdiyim.

sağ-salamat, əlvida

nəyim var yır-yığış et

durub yola sal məni

bir az çalış qarğış et...

Məni bağışlama, ay unutduğum...

Gözlərim qapanıb ümidsizliyə

Tutub yerid bir az, dolaşdır məni.

Küsmüşəm ömürlük taa danışmaram

di gəl nə edirsən et, danışdır məni

Keçirdim vaxtımı darıxmaq ilə

Nə yaxşı bu gecə düşüb ölmədim.

Az qalsın yadımdan çıxa deməyə,

Qapını açıq qoy, bəlkə gəlmədim...

Ölmərəm bir qızdan ötəri heç vaxt

İncimə sevgisin əziz, tutduğum.

Gəlmişəm deyəm ki ömürlük belə,

məni bağışlama ,ay unutduğum.

Nə var...

Gizlənək gəl, adam bir ömür altda.

Sonrada bu ömrü bölərik, nə var.

Qoşulub dur gedək gedər, gəlməzə.

Vaxt olar qayıdıb,gələrik,nə var...

Getmə,ayaq saxla yolunnan qayıt.

Keç mənim sağımnan,solumnan qayıt.

Tut mənim nə olar qolumnan qayıt

Oturub ağlayaq, gülərik,nə var...

Qorxut hələm bir az kirisin, eşqim

Məni məndə burax ərisin eşqim

Nə edim azacıq yerisin, eşqim

ay canım, üzülmə,bilərik,nə var...

Durubdur elə bil bu qış gözümə

Axsın göz yaşların yağış, gözümə

Biryolluq, ay adam yığış gözümə

Sonrada ayrılıb, ölərik, nə var...

2014

Fikir yorğunluğu

özüm ölüm

heç ölmək istəmirəm!

indiki halımda,

olsa-olsa

bir şüşə sükut,ağzınacan dolu,

bir çay qaşığı rahatlıq

qarışdırıb çəkərdim başıma

pis olmazdı

parçalanmış

ümid qırıntılarını

gəzdirirəm

əlimdə təsbeh əvəzi

bir yerdə əyləşi

qarnımı doyuzdururam.

–göyə baxa baxa,

–göy qutabı yeyə-yeyə

cəmi altmış qəpikdi

ikisi birlikdə.

hesabı ödəyirəm

yerindəcə, anında.

durub səndələyirəm soyuqlu küçədə,

əllərim cibimin qarnında...

ahh,yenə yağış yağır

yuyulacaq xanımların

ağ günə çıxmış üzləri...

islanacaq yenə yaxaları

aman, Allah

yenə azacaq gözlərim...

Ruzbeh Məmməd

525-ci qəzet.- 2014.- 30 avqust.- S.29