Azərbaycan modelyeri beynəlxalq müsabiqədə uğur qazanıb

Moskvada Rusiya paytaxtı hökumətinin, "Avrasiya qadınlar forumu" Etnomədəni ənənələrin qorunub saxlanılmasına dəstək regional ictimai təşkilatının və Moskva Millətlər Evinin təşkilatçılığı ilə "Etno-Erato" II Avrasiya yüksək milli geyim modası müsabiqəsi keçirilib.

Seçim turu dekabrın 13-də Moskva Millətlər Evində keçirilib, qaliblərin qala-konserti isə ertəsi gün Moskva Hökumətinin Böyük salonunda baş tutub. Ümumrusiya Azərbaycanlılar Konqresi (ÜAK) müsabiqənin əsas sponsorlarından biri olub.

İlham pərisini xalq yaradıcılığında axtarmağa Rusiyanın və MDB ölkələrinin yüzədək modelyeri cəsarət edib. Modelyerlərin kolleksiyaları "Ən yaxşı slavyan geyimi", "Müasir geyimdə etnik motivlər", "Qafqaz xalqlarının ən yaxşı geyimi", "Ən yaxşı Şərq geyimi", "Fin-uqor xalqlarının ən yaxşı geyimi", "Şimal, Sibir və Uşaq Şərq xalqlarının ən yaxşı geyimi", "Etnik geyimə retro baxış" nominasiyalarında təqdim edilib.

Qeyd edək ki, Azərbaycanın Əməkdar İncəsənət Xadimi, tanınmış modelyer Fəxriyyə Xələfova və modelyer Orxan Sultan əvvəlki müsabiqənin iştirakçısı və mükafatçıları olublar. Builki dəb müsabiqəsində Azərbaycanı gənc və istedadlı modelyerlər Zümrüd Mirzəliyeva və Nərgiz İmanova təmsil ediblər. Zümrüdün kolleksiyası "Müasir geyimdə etnik motivlər" nominasiyasında ikinci yeri tutub. Mükafatı ÜAK-ın icraçı direktoru İlqar Hacıyev təqdim edib.

Bakıda yaxşı tanınan modelyer Zümrüd Mirzəliyeva hesab edir ki, geyim milli mədəniyyəti hər hansı insana çatdırmağın ən asan elementidir. Zümrüdün canlandırdığı obrazlar çox maraqlıdır. Müəllif rəsmlərindən, milli geyim elementlərindən istifadə edən modelyer ölkəmizin tarixini və mədəniyyətini printlərdə təsvir edib. Onlar basma üsulu ilə hərf şəklində parçaya köçürülüb və tikmə naxışlar ilə bəzədilib. 10 paltardan ibarət kolleksiya tam şəkildə ölkəmizin adını daşıyır: "Azərbaycan".

"Etno-Erato" II Avrasiya yüksək milli geyim modası müsabiqəsi artıq 15 ildir Moskva Hökumətinin dəstəyi ilə keçirilir. Layihə müxtəlif xalqların mədəniyyətlərinə inteqrasiyaya, etnomədəni dialoqun inkişafına dəstək məqsədi daşıyır.

525-ci qəzet.- 2014.- 17 dekabr.- S.7.